كيكة التمر بي صوص التوفي.. وحاوريكم طريقتين للتوفي.. واحده منهم ساهلة لمن تدهش! بشرحها هي اول، بعداك الكيكة نفسها حكاية.. طاعمة وطرية ولزيزه شديد.. الصورة بتاعت التوفي دي طالع من التلاجة.. عشان كده جامد شويه.. 
التوفي طريقته دي اكتشفتها كجزء من وصفة تانية.. واصلا كنت بتغاظ من عمله شديد.. لمن لقيت الطريقة دي اتبسطه بشكل… كل البنحتاجه هو علبة حليب مركز ومحلّى مقفولة، زي الفي الصورة دي.. دخليه في حلة بريستو وكبي فيها موية من الماسورة ساي.. لاحظي علبة الحليب مقفولة… اقفلي الحلة تمام وافتحي فيها النار اول شي نار عالية لحدي ما تسخن، وبعداك ترخيها وخليها مدة نص ساعة مقفولة…

بعد النص ساعة تنتهي، أَطْفِي النار وخلي الحلّة تبرد عشان تتفتح ليك… لما تفتحيها خليك حذره العلبة بتكون حارة.. اديها فرصة تبرد، وممكن تختيها في التلاجة لو عايزه.. بعداك افتحي علبتك.. حتلقى احلى توفي، طعم ولون متجانس وقوام مظبوط وتعملي بيه اي شي انت عايزاه .. الصورة د ما حقتي، لكن النتيجة الطلعت لي نفس النتيجة دي…

الفيديو ده بشرح وبوري نفس الطريقة.. بس هي بتعملها بحلة عادية، البريستو بتختصر ليك الوقت شديد

نجي للكيكة… اول شي حنحتاج تقريبا كوب من التمر العجوة نشيل النواه بتاعته… ولو انت في دول الخليج، في معجون بتاع تمر هم بعملوه في حلوياتهم… انا بستخدمه هو لانه جاهز ما بتعب… كبيه في كوره مع ملعقة صغيرة كربونات وكوب ونص موية مغلية.. الموية المغلية دورها مع الكربونات تذوب التمر وتبرز طعمه

حركيهم تمام بيطلع شكلهم زي العجينة كده.. كبي معاهم بهارك البتحبيه… اما قرفة او هبهان او الاتنين سوا.. انا بحب الهبهان اكتر مع كيكة التمر.. خليها زي تلت ساعة كده عشان تبرد

في كورة تانية، انخلي كوبين دقيق ونص ملعقة صغيرة ملح وتلاته ملاعق صغار باكينج باودر.. وخليهم بالجنبة

١٢٥غم زبدة (الزبدة بكون مكتوب عليها كميتها)، والفيها ١٠٠ غرام مقسمة ل٢٠ غم في القصدير عشان تقدري كميتك لو ما عندك ميزان… اضربي الزبدة تمام بمضرب البيض ممكن باليدوي، ومعاها كوب الا ربع سكر اسمر.. ممكن سكر ابيض .. بس الأسمر فيه نكهة ولون حلوات.. أضيفي ليهم بيضتين على درجة حرارة الغرفة..

بعداك أضيفي شوية من المكونات الجافة (الدقيق واصحابه) وشوية من التمر وحركي بملعقة خشب.. لحدي ما تكملي الكميات كلها ويبقى عندك خليط متجانس زي كده

كبيه في قالب كيك بمزاجك.. ودخليه الفرن.. بتاخد ٤٥-٥٠ دقيقة .. على درجة حرارة ١٨٠ (الكيك دااااايما ١٨٠).. اول نص ساعة ما تهبشيها.. ولا تفتحي الفرن خاااالص.. لو اتهورتي وفتحتيه بتهبط ليك لمن تصل ٤٠ جربي بي سكينه دخليها جوه الكيكة، لو طلعت نظيفة معناها استوت..زوجي بحبها كده ساي… لكن لو عايزه تتفنني تضيفي التوفي من فوق

انا هنا استعجلت، الكيكة كانت حاره، التوفي بقى سائل.. لكن بعد بردت رجع اتماسك تاني عادي… ممكن تعملي التوفي بطريقة تانية.. تجيبي حلة تذوبي فيها حوالي ٦٠غ زبدة، ومعاهم حبة فانيليا وكوب كريمة سائلة وكوب سكر اسمر .. خليهم في النار لحدي ما السكر يذوب.. النار تكون هادية عشان ما يحرق ليك السكر