كيكة الحليب

كيكة الحليب.. اسمها بالإنجليزي ترجمته، كيكة الثلاثة انواع من الحليب… Tres leche cake طالعة موووووضة في السعودية.. المحلات البتعملها، بالحجز والنَّاس تقيف فيها بالصف! تنفع كيكة شاي وتنفع تحلية.. كيكة طرية ولزيزه وبتذووووب وانت بتاكليها.. نوصفها خطوة خطوة..


عشان اختصر الكلام، الكيكة دي ممكن تتعمل باي وصفة بتاعت كيك.. لكن انا هنا حاشرح ليكم الطريقة الأصلية..اول شي في كوره نخلط المقادير الجافة، كوبين الا ربع دقيق مع ملعقة صغيرة ملح وملعقة صغيرة باكينج باودر.. في كورة تانية نضرب ١٠٠ جرام زبده تكون طرية مع كوب سكر، وخمسة بيضات…


بعد نضربهم تمام، نضيف ليهم المقادير الجافة ونضربهم.. كويس لما تبقى عجينة متماسكة وطرية وظريفة شديد


بعداك نفردها في صينية مربعة او مستطيلة.. العجينة بتكون تقيلة ما تقلقوا.. واسيها كويس ودخليها الفرن .. بتاخد ليها دي تلت ساعة في الفرن.. بتكون بيضاء بس بتاخد لون خفيف في أطراف الصينية


لما تطلع بتكون منفوووووخة وهشة، تقومي بالشوكة تقدديها اكبر عدد ممكن من القدود..حاولي شكّليهم بمزاج بدوا شكل جميل للكيكة


لحدي هنا الكيكة عادية.. بعد تقدديها خليها تبرد شويه… وجيبي جك كبيييير، كبي فيه كباية حليب عادي، وكباية حليب مكثف ومحلى وكباية حليب مبخر.. دي تلاته انواع مختلفة من الحليب، وكل واحد فيهم بكون مكتوب عليه.. طبعا الحليب العادي معروف، والحليب المخبر هو حليب طعمه مختلف شويه من الحليب العادي وبشربوا بيه الشاي، دي حليب ابوقوس.. والحليب المركز المحلى ده حليب تقيييييل وفيه سكر.. ويستخدم في الحلويات


سوطي انواع الحليب دي مع بعض تمام عشان تكون متجانسة… احسن تستخدمي مضرب البيض اليدوي


بعد تبرد الكيكة، كبي الجك داك كلللللله في الكيكة… ما تخافي حتشربها كلها تماما..


غطي الكيكة بي بلاستيك شفاف.. وادي الكيكة فرصة تشرب الحليب… بالكتير ربع ساعة بتكون شربته


بعد تشربها، دخليها التلاجة تبرد .. لزيزه بارده… ولما تجي تقطعيها، بتطلع ليك متماسكة لكن شرباااااانه حليب وتذوب في الخشم


بصراحة الوصفة الأصلية فيها طبقة بتاعت كريمة من فوق.. زي الصورة دي.. بس انا بحس انها بتطلع دسمة شديد جدا… رغم انها لزيزه.. ممكن تعملوها في المناسبات


السعوديين بقوا يتفننوا في الحليب زاتو.. بعملوا ليها نكهات.. ممكن زعفران ممكن هبهان او قرفة… وممكن تستخدموا حليب التمر زي ده

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s