كيكة عادية جداً، بس شكلها مختلف وجذاب.. وبخلي الناس يتساءلوا كيف عملتيها!
تلاته بيضات، كوب سكر، كوب حليب، وكوب زيت، وفانيليا… اخلطيهم كوييييس عشان البيض ما يكون ليك زفر.. وعشان كيكتك يدخلها الهوا وتتنفش ما تعجّن ليك
في كوره، كبي الخليط ومعاه ملعقة كبيرة باكينج باودر وكبايتين دقيق .. على مرحلتين او تلاته مراحل بالكتير.. وحرّكي بمضرب الشبك.. ما تسوطي كتير… كيكتك بتعجن وما بتقوم ليك
كده انت جاهزه… ممكن لو عايزه تكبيها مباشرة وعلى الفرن… وتكون كيكة فانيليا زي العجب يا حلاة الدنيا عليها… لكن احنا عايزين نعملها كيكة زيبرا… انا بستعمل جكاكه صغيرة بي بوز… ده شكلها
كبي نص الخليط في الجك الاول… ما تقلقي يعني ما بالضروري بالنص بالضبط كده يعني..
باقي الخليط كبي فيه ملعقة كبيرة كاكاو… نوع الكاكاو احسن يكون الغامق.. الملعقة دي كافية تديك اللون… لو عملتي كاكاو لونه فاتح ما بجيك اللون ظاهر كده… ولو زدتي الكمية، ممكن تتشقق ليك.. حرّكيها بمضرب الشبك .. بس برضه ما تسوطي كتير.. اول ما الكاكاو يندمج، وقّفي
بعداك اتبعي الطريقة الفي الفيديو ده… بتشتغلي في النص بالضبط.. تكبي من الابيض حته ومن الكاكاو حته… ما تقللي الكمية شديد ما بتطلع ليك حلوه… يعني ربع كباية ابيض، وربع كباية كاكاو تقريبا كده… لحدي ما تنتهي الكمية العندك… ادي “تجّه” واحده بس عشان تطلع ليك متساويةبتدخل فرن يكون مسخّن، درجة الحرارة تكون ١٨٠… بتاخد تقريبا ٣٥ دقيقة حسب حجم القالب… لكن بشكل عام او ٢٠ دقيقة ما تفتحيها، بعداك ممكن تعايني ليها..
شكلها حلو بظهر لمن تتقطّع…
وطعمها احلى كمان
مطبخ مريم الحسين 
حاجة راقية جدا وشيك تسلم ايدك اكلك كافي وشرحك وافى وزيك مافي يا مريم الحسين…تحياتي ليك
إعجابإعجاب
رهييييبة ، بس ممكنة اعرف طريقة كيكة الشوكولاتة
إعجابإعجاب
شكرًا يا امينة، من ذوقك والله.. قصدك على جزء الشوكولاته الفي الكيكة دي؟ نفس الخليط بتقسميه قسمين واحد من غير كاكاكو وواحد بتضيفي ليه الكاكاو.. يعني نفس الوصفة ما بتعملي وصفة جديدة..
إعجابإعجاب