فسيخ المغتربات… حأشرح طريقة الفسيخ اساسا بتعمل كيف.. وطريقتي فيه.. لاني طبعا بره السعودية وما متوفر… ولقيت بدائل ظريفة شديد.. اساسا انا جديدة في اكل الفسيخ… ما كنت بطيقة، بس سبحان الله وانا حامل بي بتي الصغيرة نفسي اشتهته وبقيت اكله… حأشرح كيف بعمله بالفسيخ البودرة… والبدائل الحأقولها هي التونه او الانشوجة… قلت الحقّكم فطور الجمعة
الفسيخ ببدا عادة بالبصلة…. قطّعيها صغار، او لو كسلانه زيي اعمليها في الكبة.. ديل بصلتين صغار
الكمية الحأشرحها حسي دي بتعمل لأسرة من شخصين.. على أساس مافي شي تاني غير الفسيخ في الصينية.. اصله الفسيخ ما بدور شريك! قلّبي البصلة ديك في زيت.. يلا لو انتو ما شغالين بموضوع الصحة كتير، كبي زيت كافي عشان يعمل ليك وش بعدين… احنا ما بناكل زيت كتير في بيتنا.. ممكن تكبي حببببة ملحة عشان البصلة تذبل ليك سريع… لكن خليك حذرة، الفسيخ مالح اساسا
قلبي البصلة تمام لمن تبدأ تاخد لون خفييييف.. ما عايزينها تتحمّر… لو عندك طماطمات حمرا، قطعي ليك حبتين صغار وقلّبيهم مع البصلة.. لو ما عندك ما ضروري… قلبيهم كويس لمن الطماطم تبدأ تذبل
كبي ليك ملعقة كبيرة صلصة.. وقلّبيها مع الحاجات الفي الحلة تقليدية سريعة بس يندمجوا
بعداك كبي فسيخك.. للكمية دي محتاج حوالي خمسة ملاعق فسيخ بودره.. لو حتعملي بالانشوجة، كبي ليك تقريبا نص علبة.. لو حتعملي بالتونه، انتظري شويه بوريك تكبيها متين… قلبي الفسيخ البودرة او الانشوجة تمام مع الحاجات البصل والطماطم
اعملي ليك تلاته-خمسة فصوص توم.. حسب لو بتحبوا التوم ولا لأ… وأطفي الحاجات بي كبايتين ونص مويه… ما كتيرة الموية لانه الفسيخ البودره بشرب المويه وبنفش… لو عامله بالانشوجة، كباية ونص كفاية.. احتمال تحتاجي زيادة موية..
اجدعي ليك فيها فلفلة خضرا او شطة خضرا، العندك.. ارخي النار وخلي الحاجات دي تتسبك تمام مع بعضها .. لمن تشعري بيها تقلت… كبي ملعقة كبيرة دكوة… انا بعمل دكوة قودي ما بحتاج اذوبها بره… لو بتعملي حقت السودان ذوّبيها بشوية موية
الدكوة حتتقل ليك الفسيخ ولو في شوية موية بتندمج معاها… وبتلم ليك الحاجات كلها مع بعض وبتبقى متجانسة… كبي فلفل اسود.. ما بحتاج ملح طبعا.. خليه تاني على نارك الهادية يتسبّك… يعني الزيت بتاعك القبيل داك يظهر ليك بالجنبات.. اخر خطوة انا بحب اعملها هي اني اضيف نص ملعقة صغيرة خل… واظبطي شطة حمرا بي ملح وليمون.. وصحن بصل ابيض…
بالنسبة للتونه، بنكبها قبل الدكوة مباشرة… لانه التونه لو قعدت في النار كتير ممكن تتفّل ليك…
اعمليه في الفطور، مافي زول حيجيب ليك سيرة الغدا… والبيت كله حينوم باقي اليوم
مطبخ مريم الحسين 
يا سلاااااام عليك يا مريم انا بحب الفسيح شديد اكيد ح اجربه تسلم ايدك ووصفاتك كلها ابدااااااااع …نتعبك شويه عايزين طريقة ل عجينة الفطائر وبالاشكال كمان
إعجابإعجاب
أبشري يا ام عمر 🙂
إعجابإعجاب
تسلمي مريم ع الوصفات الجميلة ياريت بس تنزلي لينا وصفات السلطات
إعجابإعجاب
شكرا مريوم العسل 😘😘
إعجابإعجاب
شكرا مريوم العسل😘😘
إعجابإعجاب
تسلمي يا منى 🌺
إعجابإعجاب
سلامات مريم الحسين.. شغل جميل ما شاء الله.. لو سمحتي بس كميه التونة قدر شنو لو عايزه فسيخ التونة ولو بالسردين المعلب ينفع؟.. ولو نزلتي لينا طريقه يكون أفضل.. شكككككررررااا ليك ساعدتينا كتير
إعجابإعجاب
اهلًا بيك يا لولو.. بتّي بدلعها لولو برضه، اسمها ليلى 😊
بالنسبة للسيخ التونه، لعلبة واحده تونه بتحتاجي بصلة واحده متوسطة وطماطمة واحده.. ودبّلي الكمية حسب ما عايزه.. الساردين ما بنفع زي التونه.. بمشي الحال، لكن ما بطلع زي التونه..
ان شاء الله احاول انزّل ليك الطريقة.. وهنيئا
إعجابإعجاب
تعرفي يا شيف مريم كلامك حلو شديد لدرجة انه لما اكمل الوصفة بكون كأني اكلت من دقة الوصف وعمقه – السهل الممتنع والممتعت
إعجابإعجاب
الله يخليك يا اخ صلاح، وان شاء الله تجرب الوصفات وتطلع الذ من الشرح..
إعجابإعجاب