صينية الدجاج السريعة

صينية الدجاج السريعة … مافي صور الليلة لانه خطوات زاتو مافي… بكتب ليك التتبيلة كيف والسوا كيف في الفرن.. وحتاكلوا احلى دجاج… الوصفة بعملها لي تسعة سنين، ما حصل خذلتني.. جميلة في العزومات شديد…

التتبيلة
كوب زبادي
تلاته فصوص توم مهروسة
ملعقة صغيرة ملح وزيها فلفل
ملعقتين صغار صلصة
ملعقة صغيرة خل
ملعقة كبيرة مما يلي:
شمار ناشف ومسحون
قرفة مسحونة
هبهان مسحون
بابريكا او شطة حمرا
كزبرة ناشفة ومسحونة
جنزبيل مسحون (اختياري)
طحينة
ليمون

سوطي التتبيلة تمام بعداك غمّسي فيها الدجاج بس يكون بي جلده عشان ما يطلع ليك ناشف… رصّيه في صينية ودخليه في فرن حار لمدة ساعة… ما تغطيه.. حيطلع مويته ويشربها تاني… والريحة حتملا البيت… ما بحتاج تفتحي الفرن من فوق، بياخد لون براه كده… في فرن الكهرباء بياخد وقت اقل.. ما عارفه كم بالضبط لكن أكيد اقل من ساعة… الصوص التحت ده حلوووووه مع الرز او الرغيف.. لكن انا بتحاشاها عشان دهن الجلد بنزل فيها..