بسبوسة تينا

بسبوسة تينا بت خالي… وبالمرّه اوريكم طريقتي بتاعت الشيرة، فكرة بسيطة تضمن ليك الشيرة بتاعتك تكون مظبوطة وما تحبحب ليك… البسبوسة لزيزه وطاعمة وبتذوب في الخشم زي حلاوة قطن…مقادير البسبوسة باختصار في الصورة وبالتفصيل في التعليقات

 basbosat_teena_final
اول شي نبدا بالشيرة لانه مفروض نعملها وتبرد عشان تكون هي بارده والبسبوسة حاره… الشيرة مقاديرها ساهله.. بس كانت مرات بتعمل لي حركات.. السكر ما بذوب، او بتغاظ من الوقفة الطويلة والسواطة… او السكر يحبحب لي في جنبات الحلّة، او بعد تنتهي وتكون ممتازة، القى السكر عمل طبقة من فوق… عشان نتفادى المشاكل دي، بقيت اعمل حركة بسيطة ريّحتني شديد… اول حاجة المقادير حسب الكمية… انا بحب اعمل قدر استخدامي… كوب سكر… ومعاه مويه… كمية الموية حسب التقل العايزاه… لو عايزه شيرة تقيلة، اعملي ربع كوب موية.. البسبوسة بتحب الشيرة الرقيقة عشان تشربها، بقوم اعمل مع كوب السكر، نص كُوب موية
 basbosat_teena_1

كبيهم في الحلة العايزه تعملي فيها الشيرة… يفضّل تكون حلّة تقيلة عشان ما تسخن ليك بسرعة.. احنا عايزين النار تكون هادية… ما ترفعي الحلة في النار لسّه… كبي السكر والموية وسوطيهم سوا… ساي برّه على البارد… طبعا لانه كمية السكر اكتر بكتير من كمية المويه، ما حيذوب كله… لكن بذوب جزء كويس منه…
 basbosat_teena_2

ارفعي الحلة في النار، وتكون نار هادية… ارمي في الحلة تلاته حبّات هبهان او قرفة.. انا بحب الهبهان لانه ما بغيّر لي لون الشيرة… وسوطي شويه… هدفنا انه السكر يذوب في الموية قبل ما يغلو سوا.. يعني النار الهادية تسيّح السكر في الموية… عشان يبقى معقود.. النار بتربط السكر والمويه سوا وببقوا سائل لزج حتى لو برد ما بنفصلوا.. لو المويه غلت قبل ما يذوب فيها السكر، بتتبخر لانها اساسا شويه
 basbosat_teena_3

استمري في التحريك، ما حتطّولي كتير لانك بديتي قبل ما تختيها في النار… بعد شوية حتلاحظي انه السكر ذاب كله في الموية… بعد ده ما بتحتاجي تسوطي كتير … ببقى سائل شفاف، لكن ما نضيييف…
 basbosat_teena_4

خليهم سوا في النار، بتبدا تظهر فقاقيع.. والسائل ببقى شفاف اكتر.. ما تخليه يغلي كتير.. اطفي النار واعملي فيها تلاته نقاط ليمون.. الليمون بمنع السكر يتكتّل ليك.. ما تكتريه عشان ما يطغى طعمه..
 basbosat_teena_5

كده الشيرة جاهزه.. ختيها في برطمان لو عايزه.. قوامها الحالي وهي حارة بكون اخف، لمن تبرد بتبقى اتقل شويه
basbosat_teena_6

نجي للبسبوسة… مافيها بري كتير … في الخلاط ختي تلاته بيضات وكباية سكر وملعقة فانيليا وتلاته ارباع كوب زيت وعلبة قشطة.. حركة الخلاط ما ضروري ممكن بمضرب البيض ساي تعمليها.. بس كسل مني ساي… ما تخلطيهم كتير عشان ما يدخل فيها هوا كتير وتبقى ليك زي الكيكة… القشطة بتدي قوام وطعم خرافي… ممكن بدلها تعملي زبادي لو عايزه… بس بنصحكم بالقشطة بالجد عجيبة
 basbosat_teena_7

في كوره، كبي كباية سميد ومعاها كبايتين جوز هند.. وملعقة كبيرة باكينج باودر.. وحرّكيهم سوا.. لو عايزينها بسبوسة تقيلة زي حقت المحلات، اعملوا العكس.. كبايتين سميد وكباية جوز هند..
 basbosat_teena_8

ضيفوا محتويات الخلاط مع المقادير الجافة وسوطيهم سوا… وكبيهم في صينية تكوني مسحتيها بي زيت عشان ما تمسك ليك.. الألومنيوم في الغالب ما بمسك..
 basbosat_teena_9

فرنك طبعا لازم يكون مسخّن على درجة حرارة ١٨٠… بتاخد من ٣٥-٤٠ دقيقة.. اول ما تشعري بيها في الأطراف ظهر لون بنّي، معناها استوت من تحت.. اطفي النار وولعي من فول عشان تاخد تقميره بي فوق
 basbosat_teena_10

خليها تبرد حبة، وقطّعيها وسقّيها بي شيرتك ديك… نقطعها عشان تشرب لينا الشيرة تمام.. وغطيها عشان تطري بالحرارة.. شوفوا حتى لونها بقى مختلف بعد الشيرة.. غير الطعم بتديها لمعة حلوة كده
 basbosat_teena_final

One response to “بسبوسة تينا

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s