لازانيا بالحلّة… بصراحة اولادي بحبوا اللازانيا، وانا بتعب من شغلها لانه كتير… قمت لقيت الفكرة دي… بتختصر جزء كبير من الشغل، والنتيجة حلووووه…
طبعا طريقة اللازانيا الأصلية نزلتها ليكم زمان هدي هنا بالتفصيل
لكن هنا القصد تقليل الجهد.. عشان لو عايزه تعمليها لأسرتك ما تاخد منك زمن كتير.. اول خطوة، ختي حلّتك في النار وخليها تسخّن شديد، يعني لمن تختي فيها حبة موية تعمل ليك حركة زي فقاقيع كده
بعداك ختي اللحمة المفرومة في الحلة بدون اي شي، وكبي ليها حبة ملح وفلفل… عايزين اللحمة تطلع مويتها وبعداك تطلع الدهن الفيها وتتحمر فيه… لو لحمتك ما فيها دهن، ممكن تكبي ليها حبة زيت.. بس كبيه بعد ما تنشف
قلبيها لمن لونها يبقى رمادي ويا طلعت دهن يا كبيتي زيت، وقطعي ليك بصلة متوسطة مكعبات وكبيها في اللحمة
قلبي لحدي ما البصلة تذبل بس ما تصفّر… كبي فيها فلفلة خضراء مقطعة صغار.. ما ضرورية لكن لزيزه… بعداك كبي فيها تقريبا كوبايتين من صوص المكرونه.. انا بستخدم الجاهز.. لكن ممكن يوم أنزل ليكم طريقته.. قلبيها شويه واهرسي ليك فيها تلاته فصوص توم
خليهم سوا شويه، وكبي في الحلة موية مغلية، تقريبا اربعة كبابي وكبي ليها نص ملعقة صغيرة ملح.. خلي نارك متوسطة.. لحدي ما تغلي الحاجات سوا وتجقجق..
كسري اللازانيا في المويه وهي بتجقجق ضروري… مربعات متوسطة.. طبعا الوصفة دي ممتازة لو عندك باقي لازانيا مفضّل وما عارفه تعملي بيه شنو
حرّكي اللازانيا في الصوص شويه.. وغطي حلّتك.. وكل شويه تعالي حرّكي.. لو شعرتي المويه قلت واللازانيا لسه قوية، أضيفي موية حاره… وخلي اللازانيا تستوي والصوص يتسبّك… انا عملته طبقة بتاعت بشميل، لكن الوصفة الأصلية من غيرو… عشان كده نقصته شوية من الصوص.. لكن الخطوة دي ممكن تفطوها لو ما عايزين تعملوا بشميل
كبيت البشميل… لاحظوا الصوص تقيلة البشميل ما غرق
ورجعته كبيت باقي الصوص الطلعته..
وكبيت الأجبان.. موزيريلا .. وبارميزان (ناس السودان اعتقد بسموها جبنة رومي)..خلي نارك من تحت هاااادية.. عايزنها تتسبك سوا من غير ما تكون هايجة.. وخلي حلّتك مغطية
الجبنة حتسيح.. والمكرونة من تحت حتتسبك اكتر… اطفي ليها النار.. وكان بتقدروا تصبروا لمن تبرد، يكون احسن.. لانه لو حاره حتشتشكم… اسألوني
اغرفيها في الصحون.. وجبة شتاء عن جدارة… ولزيزه وسريعة ومافي عدة كتيرة اتوسخت، نقعد نرصرص لمتين! اصلا هم الناس لمن ياكلوها ما فارقه معاهم طبقات ولا ما طبقات
مطبخ مريم الحسين 
تسلمي كتير.. اولادي برضو بيحبو اللازانيا و شغلتها ثقيلة، عملتها في الحلة و كانت سريعة وجميلة جداً . تسلم ايدك
إعجابإعجاب