طعمية بالفرن.. لي زمن بعملها كده لاني بصراحة بكره التحمير… زمان كنت مجننه امّي في البيت من شدة ما ريحة التحمير بتضايقني… وبعد اتزوجت لقيت زوجي توجّهه انه الأكل يكون صحّي على قدر ما نقدر.. غير كده، اعتقد حتنفع برضه مع اهلنا في السودان مع أزمة الغاز بتاعت الايام دي.. والله انا قاعده اتأثر لمن اتذكر الحاجات الناقصاكم.. الله يصلح الحال، اعفو لينا

الريحة بتاعت الطعمية بتملا البيت كأنك بتحمري فيها… قوامها اخف شوية من الطعمية المحمّره.. وطبعا الزيت فيها ما ظاهر خالص.. طعمها لزيز جدا.. وممكن تتعمل باي طريقة تحبيها… بديكم افكار حسي… قوامها ما زي الطعمية العادية، لكن بديل ممتاز

اول حاجة في خلاطك الجنناه معانا جن ده، تعملي تلاته بيضات وبصلة متوسطة وطماطمية متوسطة ونص ملعقة ملح ونص كباية زيت .. بعداك تعملي البهارات بمزاجك.. انا بحبها بالشمار الاخضر.. في ناس بحبوها بالكزبرة او البقدونس او من غير.. المهم الأساس واحد.. انا عامله هنا شمار اخضر.. اخلطيهم تمااااام لمن يندمجوا كويس

 

بعداك كبي الخليط في كوره، وضيفي ليه دقيق بتاع كبكبي، بالضبط كوباية…ممكن تستعملي دقيق الفول برضه.. عندنا هنا في السعودية بتباع دقيق الكبكبي في السوبرماركتات.. وممكن تسحنيه براك في البيت.. في الامارات بسموه دقيق “نخّي”… كبي مع الكبكبي ملعقة كبيرة باكينج باودر.. وملعقة كبيرة سمسم اختياري… ما ضروري بي مضرب الشبك، انا براي معذبة روحي.. ممكن تسوطيها بملعقة ساي

 

خلي العجينة شويه بس عشرة دقايق، عايزين دقيق الكبكبي يشرب السوائل وينفش شويه ويلين… في المسافة دي سخّني الفرن لدرجة حرارة ١٨٠… حنسوّيها زي الكيكة بالضبط.. بعداك نجي للتشكيل.. انا لمن اكون مستعجلة بختها في صينية زي الكيكة بالضبط

 

بتاخد من ٣٠-٣٥ دقيقة.. حسب حجم صينيتك.. انا رشيتها بالسمسم من فوق، وبعد استوت فتحت الفرن من فوق بس اخدت لون.. وقطعتها مربعات… تاكليها والله بدون عيش… اعتقد كمان شكلها غريب بنفع لو عندك بوفيه.. او عايزه تعملي ساندوتشات بالخبز المربعات تطلع ظريفة

 

او لو عندك وقت، انا بعملها بصينية الكبكيك.. بس اقنعي منها لانه ريحة الطعمية قوية… دي صينية ايكيا، بعجبني انه حجمها صغار…

 

كبي في كل حفرة بالضبط ملعقة كبيرة… وبعد تكبيهم ارفعي الصينية واديها تجّة بالطربيزه عشان تتساوى ليك وما يكون فيها فراغات او هوا