كيكة التلاتة جزرات… انا سميتها كده لانه في كيكة الجزر ديك براها… ديك فيها مكسرات وطريقة مختلفة… بعملها في فرصة تانية لو قدرته… الوصفة لقيتها في الفيسبوك هنا وجربتها وطلعت لزيزه شديد.. اولادي وأبوهم عجبتهم جدا، ودي المره التانية اعملها… غيرته شوية في الوصفة… حاوريكم الغيرته اثناء الشرح… احب انبه انه الوصفة دي ساهله وسريعة كالعادة، ما بحب الشي الداير شغل كتير..
اول حاجة في الخلاط قشري تلاته جزرات حجم كبير.. لو جزرك صغير زيدي الكمية.. خلاطك لو ما قوي، ساعديه بأنك تقطعي الجزر لقطع اصغر.. ما تبشريه، احنا عايزين الجزر يتخلط لمن ما يظهر شي.. لو بشرتيه ما حيختفي
مع الجزر اعملي تلاته بيضات، تلاته ارباع كوب زيت، ملعقة صغيرة فانيليا عشان ريحة البيض ومعاهم كوب سكر.. الوصفة الأصلية فيها كوب ونص سكر، لينا في البيت بنحب السكر اقل شويه… اخلطي تماااااام لمن يختفي الجزر تماماً ويبقى لون الخليط برتقالي متجانس
بعداك فضّي الخليط في كوره، لاحظوا خليط ما ظاهر فيه اي جزر، وسائل وخفيف كأنك كبيبي معاه مويه .. ولونه غريب
للخليط كبي كباية ونص دقيق وملعقة كبيرة باكينج باودر.. كبيهم على مراحل وحرّكي بمضرب الشبك.. ما تسوطي كتير، اول ما يندمجوا ويختفي الدقيق وقّفي… لو سوطي كتير كيكتك ما بترتفع ليك وبتكون زي البلاستيك… النصيحة دي لكل انواع الكيك
الوصفة الأصلية كبايتين دقيق
كبي الخليط في صينية تدخل الفرن.. صينيتي دي كبيرة، تقريبا قطرها ٣٠ سم.. الفرن درجة حرارته ١٨٠، اخدت فيه بالضبط ٣٠ دقيقة.. لو قالبك اصغر حتاخد وقت اكتر
بعد تطلع وتبرد شويه بتكون جاهزه… الوصفة الأصلية عاملين ليها من فوق صوص شوكولاته، زي طبقة كده.. بس برضه ما حبيناه… شكلها كده حلو ومغري..
مافي اي زول جاب سيرة الجزر، ولا بتحسوا بطعمه… الاولاد أكلوها وحبوها..
مطبخ مريم الحسين 