دجاج مسالا… الوصفة دي طبعا اكله هندية مشهورة ولزيزة جدا… وممتازة في البرد.. بتتآكل بالرز البسمتي او بالخبز… وطبعا لانها هندية، بتعمل ليها كمية من البهارات…
اول حاجة حنحضر خلطة أساسية للاكلة دي… في الكُبة او الفندك، البريّحك، اهرسي خمسة فصوص توم، معاه تقريبا نص كوب جنزبيل فريش مقشّر ومقطّع… ايوه ممكن نستغنى عن الفريش ونعمل بودره، لكن بفرق في الطعم…
كبي ليهم ملعقة صغيرة ملح وملعقة كبيرة زيت زيتون عشان يبقوا ليك زي المعجون كده … عايزينهم مهووسين شديد.. الكمية دي بتقعد كويس في التلاجة لو فضّلت ليك.. يعني ممكن تعمليها كتيرة وتخليها في التلاجة
يلا بعداك تجيبي الدجاج، الاكلة دي بتتعمل من الصدور او من الأفخاذ المخلية.. يعني ما قاعدين يعملوها مع قطع دجاج فيها عضم… لكن ممكن تجربو تعملوها لو حابين.. انا هنا عاملاها بالصدور.. مسحتهم كويس بالمعجون ده.. واحسن لو قعدوا ساعة في التلاجة، لكن ممكن تشتغلي طوالي لو مستعجلة
بعداك في طوّة او شوّاية تكون نارها متوسطة، قلّبي الدجاج.. ما عايزينه يستوي، عايزين بس المسام تتقفّل عشان العصارة الجوه الدجاج ما تمرق.. لو مرقت ببقى ناشف… ختي الصدر في النار لمدة دقيقتين، وبعداك اقلبيه الجهة التانية إيديه دقيقتين.. وبس.. خلي الدجاج يرتاح شوية بعداك قطعيه مكعبات على قدر اللقمة.. بس اهم شي ما تستعجلي تقطعيه وهو حار، بنشف ليك
بعداك في حلّة، كبي شوية زيت.. ممكن تستخدمي نفس الزيت القلبتي فيه الدجاج.. كبي فيه تلاته هبهانات، وعود قرفة، خمسة قرنفلات.. قلبيهم في الزيت شوية بس لمن تشمّي ريحتهم طلعت… وطلعيهم من الزيت وارميهم
تكوني مقطّعة ليك بصلتين متوسطات لمكعبات صغيرة.. كبيهم في الزيت وقلّبيهم لمن يذبلوا.. كبي معاهم ملعقة صغيرة من معجون التوم والزنجبيل .. وملعقة صغيرة كزبرة ناشفة وملعقة صغيرة كركم… وحبة ملح وفلفل..
ما تخلي البصل يتحمر.. تكوني مقطعة طماطماية كبيرة او اتنين متوسطات.. ومعاهم ملعقة كبيرة صلصة… قلبيهم شوية بعداك أضيفي ليهم مويه.. وبعد يغلوا سوا، ارخي النار عشان الطماطم تستوي وحموضتها تروح
انا بحب اخلطها بالخلاط اليدوي.. بتطلع ناعمة ولزيزه. واولادي عندهم ضد مع الطماطم.. في المرحلة دي بخلطها.. وبعداك بكب قطع الدجاج، وبقطع فلفلة خضراء بضيفها.. الفلفل الاخضر في الاخر عشان يكون مقرمش وانت بتاكلي… اديها برضه معلّقة كبيرة شطة حمرا.. وكان فيكم حيل باكتر، زيدوا
أديهم غلوة صغيرة سوا، لاحظي الدجاج داك لسه ما استوى تماماً.. لكن ما بياخد زمن طويل .. بالكتير عشرة دقايق في الصوص وهو بغلي.. كبي كباية بتاعت كريمة الطبخ.. او لو ما عندك، اضربي شوية زبادي بالشوكة خليه يكون ناعم وكبيه.. او روب .. او حليب جوز الهند..اعملي حسابك بعداك ما يقعد كتير في النار، يا دوب بس الكريمة تسخن…
في الاخر زيّنيها بي كزبرة خضراء مقطعة او بقدونس..
مطبخ مريم الحسين 