دجاج بالدكوه… الاكلة دي بتشبه جدا اكلة المسالا الوعدته بيها صفية قريبتي… بس دي بصراحة اغرب ومكوناتها متوفره في البيت السوداني… وعلى الرغم من غرابتها الا انها لزيزه ومناسبة للبرد…

 

بعداك جهّزي الدجاج، ممكن صدور ممكن قطع كاملة، انا مستخدمه أفخاذ مخلية.. لو حتستخدمي صدور طريقتك حتختلف شويه، بوضحها لقدام… المهم انك في المرحلة دي تقطعي الدجاج بتاعك وتكبي نص كمية البهارات فيه… حركيهم تمام عشان يتوزع فيها بالتساوي

 

الاحسن انه نخلي البهارات كم ساعة في البهارات، لكن ما ضروري شديد.. قطعي ليك بصلة متوسطة وقطعي كوسه لو بتحبوها، ممكن تكون نفس حجم الدجاج… وقطعي ليك فلفلة خضراء متوسطة

 

كبي شوية زيت في حلّة، وأبدي قلبي فيها الدجاج… بس ياخد لون من بره.. لو عندك صدور، ما تخليها كتير عشان ما تنشف ليك… الأفخاذ المخلية ميزتها انها بتستحمل ما بتنشف… ما تزحمي الحلة بالدجاج، اعمليه على دفعات

 

طلَّعي الدجاج كله من الزيت وكبي بصلك المقطع فيه… قلبيه لمن يذبل… عشان ينتهي ليك سريع، اديه رشة ملح.. بعد يذبل كبي معاه تلاته فصوص توم مهروسه… قلبي كويس ما تخلي التوم يصفر

 

كبي باقي البهار بتاعك في البصل… الدجاج ده كميته كبيرة… يعني لو كميتك شويه قللي خلطة البهارات… قلبي البهارات في الزيت والبصل والتوم تمام بعداك اطفيهم بي مويه او شوربة دجاج او لو بتستعملي الماجي ممكن مويه مع ماجي… لكن انا ما بفضلها… لو حتستعملي طماطم بدل الصلصة، كبيها قبل تطفي البصلة…

 

اديها مسافة تغلي، بعداك كبي ليها ملعقة كبيرة صلصة.. ومعاها نص ملعقة صغيرة سكر..

 

خليها تغلي شوية بعداك أضيفي ليها ملعقة كبيرة دكوة وملعقة صغيرة كتشاب… ايوه الكتشاب الواحد ده… انا مستخدمه دكوه البلد دي، ناعمه وبتذوب.. لو حتستخدمي دكوة السودان، ذوبيها اول شي في حبة موية، بعداك كبيها

 

رجعي الدجاج للحلة… لو مستخدمة صدور، انتظري شوية ما تختيه حسي… وكبي معاه الكوسه والفلفل الاخضر

 

بعداك ارخي نارك، وخليه يتسبّك، اقل شي نص ساعة.. مسافة الكوسه تنجض.. والأكلة تتسبك بتكوني ختيتي رزك ينجض

 

بعد تستوي، ممكن تشعري بيها خفيفة.. بعد تبرد حبببببة، بتبقى تقيلة وكريمي كده وحلوة شديد

 

قدّميها مع رز وليمون

 

انا كنت عامله معاها سلطة جزر…