طريقة المحشي.. الليلة عملتو ولينا منه زمن! قريب الستة شهور! الصورة النهائية صورتها وهو بجقجق في النار عشان كده مغبّشة… لكن طلع ظريف شديد… أول حاجه انا بحب المحشي الصغار لأسباب كتيره، أهمها انه لو زول بدا واحده ما بتكون صعبة عليه يتمّها.. يوم المحشي ده ما بعمل اي شي غيره، بعمله كتير وبخت الباقي في الفريزر.. متى ما يهف لينا نعمله.. بعمل من الحاجات البطلعها من الخضار، سلطة حأشرحها بعد شويه
اول خطوة نجيب الخضار العايزين نحشيها.. انا عامله اسود وكوسه وفلفل اخضر.. نغسّلهم كويس ونشيل اطرافهم (طرف واحد من كل حبّة) عشان نبدأ نقوّرهم.. ده الراديو.. طبعا القعدة حتطوّل، قلت يكون عندي ونس
نجي للقوّير.. دي الأدوات البستخدمها للقوّير… الاداة الخضراء دي اكتشاف والله ورتني ليه عمّة اولادي.. بتقوّر الكوسه بتمرق اللب ببساطة وسهولة شديدة.. وبتشتغل في الكوسة الصغار بصورة ممتازة.. الاداة البيضاء بقوّر بيها الأسود… والسكين لتقطيع الأطراف..
اللب بجمّعه كله في حلة (لاحظوا تحت يدّي)، لُب الأسود ولب الكوسة.. بديهم ملح وبغمرهم بالموية وبختهم يتسلقوا.. عشان نعمل السلطة.. دي بنشرحها بعدين
الفلفل طبعا ما محتاج تقوير.. مجرد نشيل راسه، ونفضيه براحه من البذور والأجزاء البيضاء بكون جاهز.. بعداك نجهز مويه وملح كتير.. ونخت فيها الخضار المقوّر.. الهدف من موية الملح اننا نشيل اي مرارة من الخضار لو في، بالذات الأسود مرات بكون فيه مراره.. زمان امّاتنا بضوقوا الخضار عشان لو مر ما يعملوه.. في المسافة دي نخت تلاته كبابي رز مصري (عارفه الكمية كبيرة، بعدين بنتفاهم) في كوره ونغسله تمام كم مرّه لحدي ما المويه تبقى صافية… وفي النهاية نبّله في مويه نصيفه (موية شراب)…
نجي للحشوه.. مع الرز الكتير ده، نرفع الحله في النار ونكب فيها حبة زيت ونكب حوالي نص كيلو لحمة مفرومة.. نخلي اللحمة مع الزيت في النار لحدي ما تطلُّع مويتها وتنشف وشويه تمسّك كده.. والزيت الكبيناه قبيل داك يظهر، ونقول نكب بصلة كبيرة مقطعة صغار.. ونقلب لحدي ما البصل يذبل… نكب بهاراتنا.. انا كبيت كزبرة وملح وفلفل وقرفه مسحونه وبابريكا ما عندي هبهان كان كبيت شويه مسحون، وبعداك اديتها ربع كوب مويه عشان النكهات الفي الحلة تطلع واللحمة تستوي وتفكفك…
اللحمة ديك نسيت اقول اني بعمل ليها تومات كمان… وبعداك نخليها تتسبك تمام وتشرب مويتها، ما ضروري تشرب مويتها كلها، لانه المويه الفاضله دي ممكن تنكّه الرز لما نكبها فيه..
الرز داك نصفي مويته، ونغلي مويه بحيث تغمره ونكب الرز في حلة ومعاه المويه ونملحه.. بس مسافة الموية تفور نقفلها… الهدف اننا عايزين نسلق الرز نص سلقه (ممكن تلاته ارباع سلقه) بس ما يكون مسلوق تماماً، عشان لما تجي تحشي ما يتعجّن ليك…نخلي الرز في مويته شويه كده، وبعداك نصفيه منها ونخته في حاجه كبيره.. وبعداك نتم الشغل في الحشوة… نكب اللحمة المفرومة، ونبشر جزره كامله كبيره.. ونكب حوالي نص كوب زيت (الكمية بتاعتي كتيره) وممكن سمنه.. ونعصر فيها ليمونه كامله كبيره.. وضوقوها.. طعمها كده ظريييييف .. ولولا انه الرز ما نجيض كان الشعب قرضها .. اتأكدوا انه المكونات كلها اختلطت سوا بصورة كويسه… وكبّوا كزبرة خضراء او بقدونس بكونوا محشوشين تمام.. تقريبا نص كباية كده.. في ناس بحبوا يعملوا شمار اخضر، بس اولادي ما بحبوه في المحشي
لو الملح ناقص، زيدوا.. اكعب شي المحشي الحشوته مسيخة.. وشيلوا خضاركم ديك من موية الملح وادوها غسله سريعة وانفضوا المويه من جواها واحشوها.. اهم شي الحشوة تملا الخضار… اضغطي كويس بي إصبعك عشان ما يكون في فراغات.. لو غلطتي والرز بتاعك استوى زياده عن اللزوم، ما تخافي… احشي براحه، وخلي فتحت الخضار موجهه لفوق اضربيها ضربتين كده بالطربيزه.. بتلقي الحشوة دخلت جوه من دون ضغط
الخضار اتحشت تمام.. نكب حبة زيت في الحلة ونقلّب فيها الخضار بس عشان الجلده تبدأ سوى.. عشان بعدين ما تعزّبك في النضج وبتدي برضه نكهة حلوه… الخطوة دي ممكن نتجاوزها لو عايزين نكون حريصين في موضوع الصحة وكده.. اعملوا حسابكم الكوسه حساسه، ممكن تتهرد، ما تخلوها فترة طويلة وما تحركوها بي قوه.. ملحوظة تانية، لو ناسك ما بحبوا الفلفل الأخضر، حمريه اخر شي وبراه.. نكهته قوية وبتطغى على نكهة الخضار التانية… انا بعد حشيت الكمية كلها، فضل لي حشوة كتيييييره، طوالي ختيتها في باغة وختيتها في الفريزر… المره الجايه بنزلها وبحشي طوالي.. الحشوة بتقعد كتير جدا في الفريزر وما بتجيها اي عوجه… بعدين نظريتي احسن يفضل لي حشوه كتيره من انه تفضل لي شويه وأتحير فيها او تنقص لي وأتحير فيها…
شلته لي تلاته اسودات ستة كوسات وعملتهم لي غدا الليلة، باقي المحشي المحمر وبي حشوته، دخلته في باغه وفي الفريزر.. برضه المره الجايه خلال نص ساعة اطلّع اجعص صحن محشي… يلا الخطوة الاخيرة في التسويه، نكب زيت في حلة ومعاه ملعقتين كبار صلصة، نقلبهم تمام لحدي ما الصلصة لونها يبقى غامق، ونكب فيها كباية موية وتوم مهروس وملح وفلفل ونرص فيها المحشي.. الهدف اننا نسبّك المحشي وننجض الخضار كويس والرز الجوه داك يتم سواه… نغطي الحلة شوية عشان البخار ينجّض لينا الرز.. وبعد شويه نكشف الحلة عشان المويه تنشف وتفضل لينا الصوص اللزيزة مع المحشي ديك
السلطة بعد سلقنا الحاجات وصفينا منهم المويه، نقدح لينا ملعقة صلصة في النار ونكب فيها اللب المسلوق.. ونقلّب تمام لهدفين.. اول شي اللب يمتص الصلصة، والمويه الفي اللب تتبخر عشان ما تكون لينا السلطة لينه
نكب ملعقة كبيرة دكوة وتوم ونقفل النار… انا خلطتها بي الفودبروسسيور وبعداك كبيت ليها ملح وفلفل وليمون وشمار ناشف.. لو عايزين تتفادوا قصة الزيت دي، ممكن تعملوها بيضا… نكب ليها ملعقتين طحينة (حتخلصنا من المويه الزايده)، ونعمل ليها ليمون وزبادي وشمار ناشف وملح وفلفل وتوم.. برضها بتطلع روعه…
مطبخ مريم الحسين 
رهيب
إعجابإعجاب
تسلمي بل لوزا
إعجابإعجاب
بصراحه افضل وصف للمحشي موجود في النت بوصف دقيق جدا
تسلم ايدك
إعجابإعجاب
كلك ذوق يا رانيا.. شكرا جزيلا
إعجابإعجاب
السلام عليكم .. مشكورة كتير علي الوصفات الرائعه. بالنسبة للمحشي كم كمية الزيت المفترض نسبك فيها المحشي مع الصلصه .. والف شكر
إعجابإعجاب
مرحب بيك يا نجم الدين.. وشكرا على تعليقك… الزيت تكون كميته بسيطة، بالكتير ٣ ملاعق.. كمية بس تكفي تقلب فيها التوم والصلصة وسريع تضيف ليها مويه
إعجابإعجاب