كيكة صفية قريبتي… هي الكيكة مشهورة، لكن انا شلتها من صفية عشان كده مسمّياها باسمها… لزيزه وحلوه وتتاكل حاره مع كورة ايسكريم، او بارده كتحلية بعد غداء او مع الشاي.. خفيييييفة زي البتاكلي في حلاوة قطن… وممتعة جد وساهلة..

 

لمن يتخلطوا حيعملوا صوص بتاع شوكولاته تقيييييييل ولزيز.. وعادي ممكن تاكليه مافيه اي مشاكل.. تقومي تنقصي من الفي الخلاط ده في المق بتاعك زاتو.. يعني تاخدي من الصوص ده قدر مق بس.. وتدخليه الفريزر.. ده حنكبه في الكيكة بعد تنجض

 

نرجع للخلاط تاني، بي ملعقة، نزلي الصوص من جنبات الخلاط عشان تواصلي.. لانه الصوص تقيل حيكون قاعد بالجنبات كده.. اعملي معاه تلاته بيضات وملعقة صغيرة فانيليا او نقطة خل المهم شي لزفارة البيض.. واخلطي تمام

 

بعد يتخلطوا حيبقى سائل اخف شوية، كبيه في كوره وضيفي عليه ملعقة كبيرة باكينج باودر وتسعة ملاعق كبيرة دقيق وحركيهم بي مضرب البيض بس مسافة الدقيق يختفي… أوعك تسوطي كتير، الكيكة بتعجّن ليك لو كتّرتي السواطة بعد الدقيق ينضاف

 

جهّزي صحن يدخل الفرن.. انا مستخدمه صحن عريض هنا لكن لو عايزاها تتنفش ليك لفوق، اعمليها في صحن أضيق.. او ممكن تعمليها كبكيك.. دخليها الفرن، فرنك اساسا يكون شغال في ١٨٠ مِن قبل ما تبدي.. دخلي الكيكة بتاخد تقريبا ٣٥ دقيقة.. المهم ما تفتحي الفرن قبل ما تتم ٢٠ دقيقة.. بعداك تقدري تختبريها بي طرف السكين.. كان مرقت نظيفة معناها الكيكة استوت تمام.. طلعيها

 

وهي حاره، طوالي طلَّعي الصوص الفي الفريزر داك.. وكبيه من فوق ليها.. وافرديها بملعقة او سكينة.. وزعيه على شكل طبقة مِن فوق.. لو عامله كبكيك.. انتظريه يبرد، وبعداك ممكن تكبي الصوص في صحن افطح وتغمسي الكبكيك فيه ..

 

قطعيها مربعات او اي شكل عايزاه.. ولو عايزه تقدميها طوالي بتطلع حلووووه..، انا مرات بقدمها حاره مع ايسكريم فانيليا.. او بارده كتحلية او مع شاي المغرب