الشتاء بدا، واظرف حاجة الصواني والاكل الحار… عندي اربعة وصفات جاهزات، اول واحده بتاعت الليلة صينية سمك بالعرديب… بعداك عندي صينية بامية بالفرن.. دجاج مسالا (اكله هندية) ودجاج بالدكوه، بتشبه المسالا، بس بالدكوه.. عجيبة جد.. خلونا نبدا بالسمك والله يهون انزل الباقيات
اول حاجة نجهز العرديب، أغلي ليك حوالي كباية موية حاااره، وانقعي فيها كُمشة بتاعت عرديب.. ممكن الحركة دي تعمليها من بدري، لكن لو عملتيها بالمويه الحاره مسافة تجهّزي حاجاتك بكون العرديب جاهز
ميزة العرديب انه بدّي الصينية مزازة كده وطعم حامض.. بتخلي اكلة السمك ممتعة.. وبالمناسبة الاكلة دي اشتهرت شديد.. وشايفه حتى منال العالم عاملاها… اها الاكلة دي بتدور السمك بي عضمه.. بتنفع في الفيليه، لكن الفيليه ممكن يتفتفت ويبقى متفّل لانه ما بستحمل الحرارة كتير.. بوريكم تعدّلوا شنو في الوصفة لو مصرين على الفيليه … حشي ليك بصلتين متوسطات شرايح وطماطمتين متوسطات مكعبات
في حلّة على النار، قلبي البصل تمام لمن يبقى في أطراف منه محمّر.. التحميره الخفيفة دي بتدي الصينية نكهة رهيبة.. عشان يتحمر سريع، رشي فيه حبّة ملح .. شويه بس ما تكتري
ضيفي الطماطم وقلّبيها شويه بس تشعري بيها ذبلت كده
بعداك اعملي ملعقة كبيرة صلصة.. وملعقة صغيرة كزبرة وزيّها شمار الفول.. وتومتين مهروسات تمام.. وقلّبيهم سوا
لو انتو ناس شطة.. أضيفي قرنين تلاته شطة.. وممكن تقطعي واحده منهم عشان تكون حاره.. او ختيهم ساي للنكهة.. لو ما عايزين الحرارة، قطعي ليك فلفلة خضراء واضيفيها للحلة
ضيفي حبة موية تقريبا كباية.. وخليهم يتسبكوا سوا.. النار مرخية يعني تقريبا عشرة دقايق كده..
بعداك صفّي عرديبك داك عشان ياخدوا من نكهته ويتسبكوا تمام.. يلا لو عندك سمك بعضم، ما تخلي الخلطة تتسبك شديد.. يعني شنو تتسبك، يعني المويه الفيها كلها تتبخر ويظهر الزيت الختيناه في البداية… اها لو حتعمليه بعضمه، ما بتحتاج تخليها تتسبك.. لو حتعمليه فيليه، خليها تتسببببك
رصّي سمكك في صينية تدخل الفرن، وكبي من فوق ليه الخلطة، وغطيه بي فويل… فرنك ولّعيه مع بداية تشويحك للبصل، عشان يكون حار.. دخلي الصينية الفرن.. كده كل شي مستوي، ما عدا السمك … عايزينه يستوي في الخلطة دي
لو فيليه، ما تخليه كتير في الفرن، يعني لو بالغ بياخد تلت ساعة… لو سمك بي عضمه، بياخد ٣٠-٤٠ دقيقة… ممكن تقديمه مع الرز، لكن بالعيش الز بكتيييييير..
احلى حاجة كلامك السوداني
إعجابإعجاب
تحلى أيامك يا فيفيان
إعجابإعجاب
تسلم ايديك ياارب. وكمان لو ختيتي معاهو بلحتين تلاتة بوازن طعم العرديب وببقي رهيب.
إعجابإعجاب
شكرا يا ام لين، حأجرب فكرتك دي، شكلها رهيبة
إعجابإعجاب
ما شاء الله….أنا يضيف زبيب بدل البلح…..رائع….تسلم ايدك
إعجابإعجاب