خلية النحل

وصفة لزيزة وسريعة ونتيجتها مرضية جداً

اول حاجة نجي للعجينة..
في كوره، كبّي كبايتين الا ربع مويه دافية، ما حاره.. عشان الخميره ما تموت.. وذوبي فيهم ستة ملاعق حليب بودره وملعقتين كبار بتاعت خميرة.. اي عجينة بتاعت فطاير فيها حليب بودره او زبادي، تعرفيها حتطلع ليك هشة زي القطن… حركيهم سوا عشان الخميرة تذوب.. ما بحتاج تنتظري، واصلي طوالي..
* ممكن تستخدمي حليب سائل، بس ما بتطلع ليك بنفس الهشاشة دي، لو مصرّه على الحليب العادي اعملي كباية مويه وتلاته ارباع كباية حليب

للحاجات دي، أضيفي نص كوب زيت.. وتلاته ملاعق كبيره سكر وملعقة كبيرة باكينج باودر وملعقة صغيرة ملح… اعملوا حسابكم، الملح بقتل الخميرة عشان كده في البداية بنذوّب الخميرة اول حتى بعداك نكب الملح..

أضيفي خمسة اكواب دقيق.. لكن كباية كباية، وأعجني.. عشان انواع الدقيق بتختلف ممكن تحتاجي اقل وممكن تحتاجي اكتر

عايزين عجينة تكون متماسكة.. لكن ما ناشفة.. اعجني العجينة تمام لحدي ما تفك من يدك وتبقى يدك نضييييفة.. كمية الدقيق ما حتزيد عن خمسة ونص كوب وما حتقل عن اربعة ونص كوب.. حسب النوع زي ما قلت… برضه العجينة لمن تتعجن ليك كويس حتطلع ناعمة وملساء وفيها لمعة كده

خليها تخمر، اقل شي نص ساعة.. حجمها يكبر وتتنفخ ليك.. ولمن تجي تشتغلي عليها لو دخّلتي إصبعك فيها بفضل حفرة مكانه

كده العجينة جاهزه للتشكيل، انا غايته بحب اشكّلها بالطريقة دي.. اول شي قبل ما احشيها، بعملها كوره فاضية… طريقة لم العجينة على شكل كوره.. عشان سطح العجينة يكون أملس ما يكون محفّر..

بعداك بقوم احشيها… اضغطي في نص الكوره عشان تتفرد معاك، وختي الحشوة في النص، واقفلي عليها… ولمن ترصيها في الصينية ختي الجزء الكان مفتوح ده بتحت..

رصّي الكرات بتاعتك في صينية تكون ممسوحة عشان ما تمسك ليك… خلي مسافة بين الكرات.. لانها حتكبر.. انا ما بحبها مزحومة، بحب بس الكرات تهبش بعضها … بنحتاج نخليها تاني اقل شي تلت ساعة تخمر.. وخليها كاشفه عشان تعمل ليك قشرة حلوه بي فوق.. في المسافة دي ولّعي الفرن بتاعك عشان يسخّن.. درجة الحرارة ١٨٠

امسحي الكرات كوييييييس بالخلطة دي (ربع كوب مويه وملعقة كبيرة حليب بودره ونص ملعقة صغيرة نسكافيه).. امسحي كوييييس.. ممكن تمسحي بي بيضه، بس بصراحة دايما بتفضّل وما بعرف اعمل بيها شنو.. لو مصرّه على البيضة، كبي فيها ملعقة مويه وتضربيها كويس خالص… ممكن تمسحي بحليب سائل او بمويه ونسكافيه او بي روب او زبادي… كله بديك اللون الدهبي الحلو ده… رشيها بي سمسم او حبة سودا للزينة بس… وخليها في الفرن.. حسب حجم الفرن وحسب نوعه.. بس انت راقبيها تتحمّر وتنجض ليك..

في فرن الغاز بتحتاجي تفتحيها شويه من فوق اخر شي.. بعد تمرق وهي حاره سقّيها بي شيرة او عسل .. ممكن تحلّي العسل بي مويه دافيه، بس انا بحبها كده بعسل النحل الأصلي خيوط من فوق..