البيتزا.. مع سلطة السيزر

العجينة لطباخ عالمي مشهور اسمه وولف قانق باك.. هو نمساوي عشان كده الاسم غريب.. المهم بيتزته عجيبة.. مقرمشة من تحت.. محمصة تمام، ما بتطلع ليك لينه.. ومكوناتها بسيطة وبتاخد بالضبط عشرة دقايق في الفرن.. قدمتها مع سلطة سيزر مع صوص جميل..

خلونا نتفق على حاجة.. الوصفة دي عن العجينة.. البي فوق للعجينة ده على مزاجكم طبعا.. بس بوريكم انا عملته شنو.. وانتو بعداك تقدروا تبدعوا.. الشي التاني، البيتزا انواع كتيره.. لو عايزاها منفوخة في وصفات تانية، لو عايزاها ارق من كده في وصفات تانية..

نبدا بالعجينة.. اول شي كبي تلاته كبابي دقيق، يا ريت ما يكون ابيض خالص.. يعني لو عندك اسمر لخبطيه بيه.. لانها بتطلع الذ.. بثّي في الدقيق ملعقة كبيرة بتاعت زيت زيتون..

ضيفي للدقيق والزيت، كوب مويه دافي وملعقة كبيرة خميرة وملعقة صغيرة ملح وملعقة صغيرة عسل.. الاحسن انك تذوبي العسل في المويه قبل ما تضيفيهم عشان ما يتعبك.. ممكن بدل العسل تعملي سكر.. لكن بصراحة العسل بعمل العجينة مقرمشة كده.. عجبني اكتر من السكر

بعداك أبدي اعجني الحاجات كويييييس مع بعض… افضلي اعجني لمن تفك من يدك.. ما تكسلي وتغسليها .. ولو عندك عجانه، احسن ريّحي روحك وأعجني فيها

كده العجينة جاهزه.. مكوناتها بسيطة جدا.. اها بعد ده بس عايزنها تخمر.. غطيها بقماش عشان الخميرة تتنفس.. بتاخد ليها تقريبا نص ساعة او أربعين دقيقة حسب حرارة الجو.. بعد تخمر ختيها في المسطبة تكون نظيفة.. انا ما احتجته اعمل دقيق تحتها، لكن لو خفتيها تلصق ليك، اعملي…. وقبل ما تواصلي، امشي افتحي الفرن على اعلى درجة حرارة عندك… خليه حاااااار

بعداك أبدي اضغطي باصابعك بحركة دائرة عشان تتشكل ليك.. وإنتي بتشكيلها قرص، اعملي زي الحفرة كده قريب للحافه.. ده بديها الشكل المميز بتاع البيتزا، وفي نفس الوقت بحفظ الصوص ما تتدفق

استمري في الضغط وممكن تمطّيها شويه شويه … لحدي ما تصلي للحجم والسمك العايزاه… جيبي صينية الفرن وشتتي فيها ملعقة كبيرة سميد.. ووزعيه بقدر حجم البيتزا تقريبا

بعداك انقلي العجينة للصينية.. فوق السميد.. السميد بديها الإحساس بتاع الحُبيبات البتاكلوه في المطاعم داك..

كبي حوالي ملعقة كبيرة زيت زيتون، بعداك بي فرشة، او ممكن بي منديل، وزعيه على العجينة كلها توزيع كويس.. بخلي الصوص تمسك في العجينة.. وبخلي الأطراف تتحمص حلو

كده خلاص جاهزه.. الفوق ده على كيفك زي ما قلنا… انا مسحته فيها ملعقتين كبار بتاعت صوص مكرونه جاهز..

وعملته فيها تلاته انواع من الجبنة.. موزريلا وباميزان وشيدر.. وما كترّته

بعداك نجي للتسويه… دخلي البيتزا تححححححت في اقرب شي للنار في الفرن.. واظبطي المنبه على خمسة دقايق بالضبط…

بعداك ارفعيها في نص الفرن، برضه بالضبط خمسة دقايق… وطلعيها قطّعيها ..

اول شي من تحت بتطلع محمّصة ومقرمشه ولزيزه.. ده غير الحبيبات بتاعت السميد بتديك طعم خيال.. كانك مشترياها

قدمتها ليهم مع سلطة سيزر.. طماطم وخس وخيار وبصل ابيض مقطعين كبير.. ومعاهم الصوص دي.. انا بحب اعملها لمن يكون المايونيز بتاعي عايز يكمل، بقش بيها الباقي الفي البرطمانية، السغيل داك الما بطلع… بكب المكونات كلها وبخجها عشان تندمج
ملعقة كبيرة مايونيز
ملعقة صغيرة مسطرد
ملعقة كبيرة زيت زيتون
نص ملعقة صغيرة ملح
ملعقة صغيرة خل
ملعقة صغيرة ليمون
ربع كباية مويه
ربع كباية جبنة باميزان مبشوره ناعم

وبعد أكب الصوص في السلطة، ببشر فيها بارميزان.. وشوفي لو ما اولادك اتشاكلوا فيها

7 responses to “البيتزا.. مع سلطة السيزر”

مساء الخير أخت مريم جربت البيتزا بطريقتك وطلعت رهيييييييبه انا جربت وصفات كتيرة قبل كده بس دي كانت أول نتيجة مرضية بالنسبة لي بالجد تسلمي كتير ومنتظرين حاجات جديدة لانو طولتي إن شاء الله المانع خير ….

إعجابإعجاب

marryy9 2016-01-26 عند 9:19 م · · رد →

تسلمي يا ام عمر… اتخيلي انا برضه ما عجبتني البيتزا الا بالوصفة دي… هنيئا ليكم… انا فعلا طولت ما نقلت وصفات هنا.. لكن نزلت زي اربعة وصفات في مجموعة الفيسبوك.. انت ما عضو معانا هناك؟ اسمها مطبخنا السوداني ألذ

إعجابإعجاب

آخر الوصفات التابعتها كانت الطعميه بالفرن بس كنت عايزة أسألك من كمية البيض في الوصفة لو عايزة اعمل بيضة واحدة اغير شنو لانو حاسة 3 بيضات كتير ما بحب البيض أتمنى أكون وضحت ليك سؤالي….

إعجابإعجاب

marryy9 2016-01-26 عند 10:05 م · · رد →

والله يا عمر اعتقد التلاته بيضات يا دوب تكفي عشان الطعمية تندمج مع بعضها .. لانها بالفرن بتكون ناشفه شويه.. محتاجة سوائل تلمّها.. ممكن تجري تضيفي حليب مثلا نص كوب… لكن ما بضمنها ليك تنجح..

إعجابإعجاب