البوست فيه تلاته وصفات.. كرات لحمة وبعداك بنقلبهم مكرونه بكرات اللحمه.. بعداك ببقى مكرونه بالبشميل بكرات اللحمة.. يعني حيكون في شرح لكرات اللحمة وطريقة سلق المكرونه وطريقة عمل البشاميل.. اها الكلام حيكون كتير..

بعداك بنضيف ليهم بيضة.. البيضة بتخلي الكفتة تتماسك مع بعضها وما تتفتت.. ومعاها ملح وفلفل..

 

بعد يندمجهم كويس.. نضيف نص كوب بقسماط.. لكن ما تستعجلي.. ممكن تحتاجي اكتر او اقل.. حسب حاجات كتيره.. الهدف من البقسماط انه اللحمة تبقى ليك زي العجينة كده .. تقدري تشكّليها.. برضه الهدف انها تمتص المويه الزايده من اللحمة.. لانه المويه لو كتيره، الكفته لمن تصل النار حتتفتفت.. المويه جايه من اللحمه او من البصل… البقسماط هو الخبز المجفف المسحون

 

كده انت جاهزه.. اي اضافة حتضيفيها زياده هي مجرد نكهة ما حتأثر في الشكل .. ممكن تعملي بهارات بمزاجك.. انا عملت هبهان بودره وقرفه بودره.. اي بهار تاني مافي اي مشكلة.. غطيها ودخليها التلاجة اقل شي نص ساعه.. النكهات تندمج سوا وتتماسك

 

بعد ده انت جاهزه.. شكليها زي ما عايزه.. ممكن تعمليها كرات او اصابع.. ممكن تحمّريها في زيت غزير.. او ممكن تعمليها في الفرن.. او زيي، تقلبيها في زيت شوييييه..

 

بعد تنتهي من تقليب الكرات كلها في الزيت داك المليان بنكهة اللحمة، اعملي ليك تومتين وملعقة كبيرة صلصة.. قلبيهم بس ثواني في النار ما تخلي التوم يحمّر… مره في اخت سألتني من الهراسة الجبتها من بنده.. وانا نسيت تماماً.. ان شاء الله تشوفها

 

بعداك رجعي كرات اللحمة.. احنا قلبناها في الزيت اول عشان تعمل طبقة بي بره وتحبس السوائل جواها.. عشان تعمل زي قشرة كده بي بره.. وتكون طريه بي جوه..

 

كبي مويه تقريبا زي كباية كده.. عايزين حسي ننجض الكرات في الصوص ده… بعد الصوص تغلي، ارخي النار خليها تتسبك.. ممكن كده تقديمها مع طبق رز وسلطة.. ولا احلى.. او تواصلي معاي..

 

ممكن الحركة بتاعت الفرن ديك تعمليها وتعملي الكرات كتيييييره.. وبعد تتحمّر في الفرن وتبرد، تختيها في كيس وتدخليها الفريزر.. متى ما تهف ليك تطلعي منها تعملي.. لكن هنا طبعا انا عملتها بالصوص.. وحاعمل معاها مكرونه بعد شويه

 

نجي لسلق المكرونه.. عايزه اشرحها بمزاج عشان المبتدئات.. وعشان اوضح كم حاجة كده ظريفة.. ختي حلّتك في النار وكبي فيها مويه وخلي المويه تغلي تجقجق.. الغليان الشديد ده مهم.. لمن تصلي المرحلة دي، كبي فيها ملعقة كبيرة ملح

 

الملح بخفض درجة الغليان شويه، انتظري شويه لمن ترجع تجقجق… حتى بعداك تكبي المكرونه.. انا مستخدمة مكرونه سمراء… لكن البيضاء نفس الطريقة

 

المكرونه اول ما تنزل بتخفف الغليان شويه لانها بتبرّد المويه.. اديها سوطتين تلاته.. بس مسافة المويه ترجع تجقجق تاني.. الغليان بمنع المكرونه تتلصق مع بعض.. احنا عادة بنعمل زيت.. الزيت صحي بخليها ما تلصق، لكن برضه لمن تكبي فيها الصوص .. بقوم يتزلق منها… بعد تستوي المكرونه، حسي عدد الدقائق المكتوبة في الصندوق.. او لو طلعتي واحده وضقتيها… جهّزي ليك مصفى في الحوض ومن تحت كوباية.. عشان موية السلق بتاعت المكرونه مهمة جدا.. حنتكلم عنها بعد شويه

 

أوعك تغسلي المكرونه.. لأنك حتشيلي منها كل النشا الفيها.. وبرضه الصوص ما حتمسك ليك فيها.. كبي المكرونه بعد صفّيتيها في حلّة الكرات بتاعت اللحمة.. لو شعرتي انه المكرونه ناشفه، كبايتك بتاعت المويه ديك كبي منها.. ما تكتري.. تقريبا ربع كباية.. بالنسبة لي ما احتجته لانه ما خليت الكرات تتسبك شديد… ممكن تقدميها كده وتبشري فوق ليها اي نوع جبنة.. وجنبها سلطة.. او تواصلي معاي.. احنا اكلنا منها كده والباقي عملته بالبشاميل

 

كبي المكرونه في صينية الفرن.. وهي بارده.. وافقعي فيها بيضة.. الحركة دي اتعلمتها من ماما.. البيضة بتخلي ليك الطبقة التحت متماسكة وتطلع ليك قطع زي الكيك كده

 

نجي نعمل البشاميل.. في حلّة تقيلة عشان ما تمسك ليك.. كبي اربعة ملاعق زبده او ٥٠ غرام.. وخلي الزبدة تبدأ تسيح

ممكن تستخدمي اي دهن.. زيت او سمنه كله بنفع.. اي نوع دهن يخطر على بالك ممكن تعمليه.. بالمناسبة ٥٠ غرام من الزبده تقدري تقيسيها من ورقة الزبدة زاتها.. بتكون مرقّمة… لو مافي ممكن تقدري تقدير… ضيفي للزبده اربعة ملاعق كبيرة دقيق وخليك على نار هاديه.. حرّكي الدقيق عشان يستوي شويه مع الزبده.. لو اشتغلنا طوالي حيكون طعم البشميل زي طعم الدقيق.. ما تخلي الدقيق يحمّر

 

بتبقى ليك زي العجينة اللينه كده.. زحيها من النار وكبي عليها نص كباية حليب بارد..

 

سوطيهم سوا بالملعقة لمن يتجانسوا.. لاحظي انت لسه بعيده من النار

 

كبي فيهم تاني كباية حليب بارد.. ممكن تستخدمي حليب بودره محلول في مويه مافي اي مشكلة.. وممكن مويه ساي… وممكن مرقه او شوربه.. بس الحليب الذ… حرّكي بمضرب البيض تمام وارجعي النار واستمري في التحريك

 

بعد ترجعي النار حتلاحظي بعد شويه انها تقلت.. ومضرب الشبك بعمل اثر فيها .. لاحظي الصورة

 

ضيفي تاني كباية حليب.. وانت في النار.. او لو خايفه، زحي من النار، ضيفي الحليب وسوطي، حتى ترجعي النار تاني..

 

كده المجموع بقى كبايتين ونص حليب.. يعني اربعة ملاعق زبدة وأربعة ملاعق دقيق وكوبين ونص حليب.. لو عايزاها اتقل من كده، زيدي كمية الدقيق في البداية… لو خطر ليك بعد وصلتي المرحلة دي انك عايزاها اتقل، ما تكبي دقيق مباشرة.. بنرجع لطعم الدقيق النيئ تاني! لو مصرّه تتقليها، قلّبي دقيق في زبده في حلّة تانية واعملي ليه حببببة حليب وحركيه يتجانس حتى تضيفيه لحلتك

 

كده البشاميل جاهز تماماً… كبي تلت الكمية في المكرونه ولخبطيهم سوا

 

عايزين طعم البشاميل في المكرونه من جوه.. وبرضه بساهم في تماسك المكرونه

 

باقي البشاميل اكسري فيه بيضه تانية، وسريع بمضرب الشبك اضربيها فيه.. ما تتأخري عشان ما يستوي البيض في البشاميل.. ويبقى ليك مكرضم

 

لو ما عايزة حركة البيضة ما ضروري.. البيضة بس بتخلي البشميل يتحمر حلو .. ممكن بدل منه تعملي جبنه شيدر مبشورة او بارميزان… انا هنا عامله بارميزان..

 

خلي فرنك حار.. ودخليها تستوي من تحت.. ممكن تفتحي ليها الفوق عشان تتحمّر حلو

 

الطبقة الفوق بتكون محمره… من جوه بتكون طريّه.. وطبقة المكرونه بتكون متماسكة زي الكيكة