فطائر بالطوه.. الوصفة لقيتها وكانت اساسا محشية بي كسترد.. لكن الفكرة عجبتني وقلت اجربها مع فطائر مالحة.. لانه الكسترد في بيتنا ما بجيب دخل، مافي زول بياكله.. .. لكن اعتقد انها ممكن تتعمل بأي عجينة فطاير…
نبدا بالعجينة.. محتاجه تتعجن كويس جدا، لو ما عندك عجانة، اعجنيها كتير جدا.. في العجانة نكب تلاته كبابي دقيق عليهم ملعقة كبيرة خميرة وزيهم سكر، وملعقة صغيرة ملح.. انخليهم بالمنخل او لو حركتيهم بمضرب الشبك خلاص.. بنعجنهم ببيضتين .. ونص كباية حليب وربع كباية مويه
بعد يتعجنوا تماااااام، ضيفي ليهم ٤٠ غرام زبده… لازم تكون لينه بدرجة حرارة الغرفة … خليها تتعجن تماااااام
بعداك خليها تخمر.. بتاخد تقريبا نص ساعة، حسب الجو عندك.. ولأنك عجنتيها شديد، بتتنفخ نفخة حلوه
قسميها لكور، وخليها تاني ترتاح ليها زي ربع ساعة كده
بتحتاج تغطيها.. عشان ما تعمل ليك قشرة بفوق
بعد ترتاح، أبدي احشيها، افرديها براحه بدون ما يطلع الهوا الفيها.. وهي لانها مرتاح ما حتتعبك في الفرد.. بسهولة بتمشي معاك
خلي شكلها اسطواني وختي الحشوة في طرفها.. هنا حشيتها بي نص جبنة لافاشكيري
اطويها واقفليها تمام..
عملت واحدات بحشوة زعتر وزيت زيتون وجبنة بيضا
بعداك ختي الطوة في النار.. تكون نار هادية ما تعليها
ورصّي الفطاير فيها الطوه وغطيهم… لازم يتغطوا عشان تستوي كلها حتى من الاطراف
ممكن تاكلوها حاره، او زي ما عملنا، بتخت في الفريزر وبتسخن بالمايكروف .. بتطلع كانك عاملاها يا دوب.. اديتها للاولاد للمدرسة الليلة
بتطلع من جوه هشه وطرية وكأنها معموله بالفرن
مطبخ مريم الحسين 
اذا سمحتي ممكن كمية الزبدة كم
إعجابإعجاب
اهلًا بيك يا رنده… الزبده ٤٠ غرام، عدلتها في الوصفة بعد سؤالك… الف شكر على التنبيه
إعجابإعجاب
تبارك الله استاذه مريم ابدعتينا بروائعك الجميله….
إعجابإعجاب