يانسون عادي… الامس كمّلناه لانه اصلا نص مقدار، واولادي أكلوه بدل الغدا! .. والمنين، جوني ضيوف عُزاز وكانوا مستعجلين، قمته شيّلتهم الفضل… قمت قلت فرصة اعمل اليانسون العادي.. وفرصة برضه نتكلم عن عوامل نجاح الكيك، لانه بسكويت اليانسون اصلا كيكة.. بس دقيقو كتير.. وبندخله الفرن اكتر من مرّه.. لكن الفكرة واحده..
اول فكرة في اليانسون ده، هي موضوع اللون… في سحّانه نسحن نص ملعقة صغيرة زعفران.. اللهو دي الشعر شعر كده ولونه احمر.. لو ما عندك ممكن بدلها كركم.. اسحني معاه ملعقة كبيرة يانسون وتلاته هبهانات.. ما ضروري اليانسون تسحنيه.. لكن لو سحنتيه طعمه ببقى اقوى
في الخلاط، كبي تلاته بيضات، كباية سكر كباية زيت وكباية حليب .. ومعاها البهارات بتاعتك دي زاتها..
بعد يتخلطوا تمام… كبي الخليط براحة في كوره… احنا لمن خلطنا في الخلاط دخلنا هوا جوا المكونات… عشان كده ما تسوطي الخليط.. كبيه براحه… لونه بكون زي عصير المنجا، بلاش نقرّفكم
في كوره منفصلة، نكب تلاته كبابي ونص دقيق.. وملعقتين صغار باكينج بودر وملعقة صغيرة نشادر..وملعقة صغيرة ملح وبي مضرب البيض نسوطهم تمام.. مضرب البيض بدخّل هوا جوّه الدقيق وبفرتق ذراته… اي وقت يقول ليك انخلي دقيق، ممكن تستعيضي عنها بمضرب البيض ده.. عايزين نسوط الحاجات سوا عشان تتوزع في الدقيق بالتساوي
شوية شويه نبدا نكب الدقيق في المواد السائلة.. الكيك والبسكويت بشكل عام، بعد تضيفي الدقيق بقول ليك ما تسوطيه كتير… لو سوطي كتير، بطلع ليك بي جوّه ملبّك.. اول ما الدقيق يندمج مع الحاجات ويختفي، وقّفي سواطة.. في البداية حتقدري تسوطي بمضرب البيض.. بعد شويه، غيّري لملعقة
تطلع ليك عجينة تقيلة… لكن لينة.. اتقل من عجينة الكيك.. وما بتقدري تشكّليها.. بس فيها مواد رافعة كتير.. نراجعهم سوا:الهوا من الخلاط
البيض المخفوق
الباكينج بودر
النشادر
الهوا الفي الدقيق..
ديل كلهم سوا لمن تدخليها النار مع الحرارة، يطلع ليك بسكويت منفوش ومليان فراغات بي جوة
كبي عجينتك في صينية.. المقدار ده عمل لي صينية ونص.. بلّي يدك بالموية وافرديها بالتساوي بقدر الإمكان.. بي شوكة اعملي الخطوط دي.. شكل وفي نفس الوقت بتساعدك على التوزيع المتساوي
فرنك تكوني مولّعاه على درجة حرارة ١٨٠… ودخلي الصينية… حتقوم ليك زي الكيكة.. وحتشعري بيها زي الكيكة بس ناشفة حببببة.. قطعيها اصابع.. دي عملتها اصابع كبيرة لانه ابونا قال عايزه كبار يشيل واحده ياكلها وخلاص!
ما بتحتاجي تولعي الفرن من فوق.. الصينية انا رجعتها تاني.. اتحمّص من تحت وفوق.. جيت بعداك رصيته كله واقف بالجنبه عشان ياخد لون من كل الجهات
دي صورة قريبة ليه قبل يدخل الفرن.. لاحظوا الفراغات دي..
خليه ينشف تحت المروحة او المكيف اقل شي ساعتين.. وبعداك ختيه في باغة يكون على شكل طوابق.. بين كل طابق وطابق مناديل ورق.. عشان ريحته ما تتغير.. كل الكعك والبسكويت انا بحفظه كده.. عشان ما يتغير طعمه
مطبخ مريم الحسين 
تسلم ايديك و معاها باقيك يا مريم
اتمنى لو تشاركي وصفة المنين + القرقوش لما تلقي وقت
شكرا جزيلا
إعجابإعجاب
الوصفتين موجودات في المدونه… والمنين تحديدا بنصحك بيه.. الوصفة بتاعتي ظاااابطه، وساهله 🌷
إعجابإعجاب