بسكويت اليانسون

يانسون عادي… الامس كمّلناه لانه اصلا نص مقدار، واولادي أكلوه بدل الغدا! .. والمنين، جوني ضيوف عُزاز وكانوا مستعجلين، قمته شيّلتهم الفضل… قمت قلت فرصة اعمل اليانسون العادي.. وفرصة برضه نتكلم عن عوامل نجاح الكيك، لانه بسكويت اليانسون اصلا كيكة.. بس دقيقو كتير.. وبندخله الفرن اكتر من مرّه.. لكن الفكرة واحده..

 Yansoon_final
اول فكرة في اليانسون ده، هي موضوع اللون… في سحّانه نسحن نص ملعقة صغيرة زعفران.. اللهو دي الشعر شعر كده ولونه احمر.. لو ما عندك ممكن بدلها كركم.. اسحني معاه ملعقة كبيرة يانسون وتلاته هبهانات.. ما ضروري اليانسون تسحنيه.. لكن لو سحنتيه طعمه ببقى اقوى
 Yansoon_1

في الخلاط، كبي تلاته بيضات، كباية سكر كباية زيت وكباية حليب .. ومعاها البهارات بتاعتك دي زاتها..
 Yansoon_2بعد يتخلطوا تمام… كبي الخليط براحة في كوره… احنا لمن خلطنا في الخلاط دخلنا هوا جوا المكونات… عشان كده ما تسوطي الخليط.. كبيه براحه… لونه بكون زي عصير المنجا، بلاش نقرّفكم
 Yansoon_3

في كوره منفصلة، نكب تلاته كبابي ونص دقيق.. وملعقتين صغار باكينج بودر وملعقة صغيرة نشادر..وملعقة صغيرة ملح وبي مضرب البيض نسوطهم تمام.. مضرب البيض بدخّل هوا جوّه الدقيق وبفرتق ذراته… اي وقت يقول ليك انخلي دقيق، ممكن تستعيضي عنها بمضرب البيض ده.. عايزين نسوط الحاجات سوا عشان تتوزع في الدقيق بالتساوي
 Yansoon_4

شوية شويه نبدا نكب الدقيق في المواد السائلة.. الكيك والبسكويت بشكل عام، بعد تضيفي الدقيق بقول ليك ما تسوطيه كتير… لو سوطي كتير، بطلع ليك بي جوّه ملبّك.. اول ما الدقيق يندمج مع الحاجات ويختفي، وقّفي سواطة.. في البداية حتقدري تسوطي بمضرب البيض.. بعد شويه، غيّري لملعقة
 Yansoon_5تطلع ليك عجينة تقيلة… لكن لينة.. اتقل من عجينة الكيك.. وما بتقدري تشكّليها.. بس فيها مواد رافعة كتير.. نراجعهم سوا:
الهوا من الخلاط
البيض المخفوق
الباكينج بودر
النشادر
الهوا الفي الدقيق..
ديل كلهم سوا لمن تدخليها النار مع الحرارة، يطلع ليك بسكويت منفوش ومليان فراغات بي جوة
 Yansoon_6

كبي عجينتك في صينية.. المقدار ده عمل لي صينية ونص.. بلّي يدك بالموية وافرديها بالتساوي بقدر الإمكان.. بي شوكة اعملي الخطوط دي.. شكل وفي نفس الوقت بتساعدك على التوزيع المتساوي
 Yansoon_7

فرنك تكوني مولّعاه على درجة حرارة ١٨٠… ودخلي الصينية… حتقوم ليك زي الكيكة.. وحتشعري بيها زي الكيكة بس ناشفة حببببة.. قطعيها اصابع.. دي عملتها اصابع كبيرة لانه ابونا قال عايزه كبار يشيل واحده ياكلها وخلاص!
 Yansoon_8

ما بتحتاجي تولعي الفرن من فوق.. الصينية انا رجعتها تاني.. اتحمّص من تحت وفوق.. جيت بعداك رصيته كله واقف بالجنبه عشان ياخد لون من كل الجهات
 Yansoon_9

دي صورة قريبة ليه قبل يدخل الفرن.. لاحظوا الفراغات دي..
 Yansoon_10

خليه ينشف تحت المروحة او المكيف اقل شي ساعتين.. وبعداك ختيه في باغة يكون على شكل طوابق.. بين كل طابق وطابق مناديل ورق.. عشان ريحته ما تتغير.. كل الكعك والبسكويت انا بحفظه كده.. عشان ما يتغير طعمه
 Yansoon_11

2 responses to “بسكويت اليانسون

  1. تسلم ايديك و معاها باقيك يا مريم
    اتمنى لو تشاركي وصفة المنين + القرقوش لما تلقي وقت
    شكرا جزيلا

    إعجاب

    • الوصفتين موجودات في المدونه… والمنين تحديدا بنصحك بيه.. الوصفة بتاعتي ظاااابطه، وساهله 🌷

      إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s