كفتة بالرز… الكفتة دي عندها اكتر من طريقة… انا حأشرح البي الرز، لكن حأفهمكم الفكرة من وراها وبعداك تقدروا تعملوها بالبقسماط او بي عيش مبلول في حليب .. الفكرة واحده..
في الكبة، افرمي بصلتين متوسطات وخمسة فصوص توم وملعقة كبيرة كزبرة ناشفة… لاحظوا انا فارمة بصلة واحده هنا.. الكبة لو كترتي فيها البصل بتفرمه ليك وتطلّع مويته.. افرميهم على دفعات..
لو ما عندك الكبّة، ما ضروري.. حشّي البصل دقاق او ابشريه… بالنسبة للبهار.. انا ما بحب اكتّر البهار فيها.. الكزبرة طبعا عشان تشيل الزفارة… معاها بعمل هبهان مسحون وخلاص…
لحمتك ممكن تفرميها في الكبة زاتها.. فرصة برضه تشيل ليك بواقي البهار والبصل.. لو مفرومة جهازة يبقى تمام… حنعمل نص كيلو لحمة مفرومة
نجي للرز.. للأسف ما صوّرته الحته دي… لكن بشرحها كويس ان شاء الله… جيبي رز مصري، بالضبط نص كيلو.. غسّليه ونشّفيه تمااااام واسحنيه بالكبة زاتها.. او لو ما عندك.. اسلقي الرز وخليه يبرد.. او لو عندك بقسماط … الكمية بوريكم تعرفوها كيف بعدين.. حسي بس نجهّزه… الرز بودره او مسلوق او البقسماط او العيش كلهم هدفهم يحوّلوا ليك اللحمة لعجينة متماسكة
لحمتك ديك ضيفي ليها البهارات وضيفي معاها ربع كباية زيت وملح وفلفل اسود.. اعجنيهم سوا بعداك تقدري تضيفي الرز… خلينا الرز اخر شي عشان نقدر نعرف الكمية المناسبة.. انا استخدمته دقيق رز جاهز ..
بعداك اعمليها صوابع.. العجنة دي ما بتنفع كور.. لو عايزه تعمليها كور، ما تعملي رز… حاولي الاصابع تكون مدغلبة.. بوريكم بعدين ليه
في حلّة في النار، كبّي حببببة زيت.. وخليه يسخّن.. رصّي الكفتة فيه بس تاخد لون.. طلعيها سريع.. احنا عايزين الكفتة تعمل قشرة بي برّه عشان السوائل الجواها ما تطلع بعدين وتبقى ناشفه..
بعد تحمّري الكمية كلها… زيتك داك أوعك تدفقيه وما تقومي توسخي ليك حلّة تانية… كله ولا غسيل الحلل ده.. لو ما عايزه تاكلوها على طول، ختيها في كيس وفرزنيها…
اعملي ليك تلاته فصوص توم مع ملعقتين كبار صلصة… قلبيه في الزيت لكن ما تخلي التوم يحمّر..
لو عندك طماطم حمرا كبيها.. لو ما عندك زيدي الصلصة تاني ملعقة.. وكبي معاهم كبايتين مويه.. وملح وفلفل اسود ارمي فيهم عود قرفة… وكمان كان عندك فلفلة خضرا أرميها من غير تقطيع.. او شطة خضرا
كبي الكفتة في الصوص ده… وغطيها… وامشي استحمي ونعنشي من ريحة التحمير.. .. كده غداك جاهز بنسبة ٩٨٪
ارخي ليها النار خليها تتسبّك.. واعملي معاها سلطة خضراء ظريفة كده… وصحن رز مجيّهة.. وما تنسوا الشطّة.. وصحتين
ممكن أعمل بدل الرز شوفان ولا مابتتماسك
إعجابإعجاب
ما حصل جربتها بالشوفان، لكن ممكن برضه.. بس اسلقيه اول… جرّبي ووريني تجربتك.. نستفيد منك 😊
إعجابإعجاب