الكبسة

الكبسة… نشرحها خطوة خطوة.. وان شاء تعجبكم.. غايته تعليق الشعب هنا مشجّع

الفكرة في الكبسة كلها، البهارات… ولا بتطلع ليك رز بي دجاج ساي! اول حاجة قطعي بصلتين متوسطات.. وقطعيهم مربعات صغار عشان ما يكونوا ظاهرات ليك بعدين

انا عاملة تقريبا نص دجاجة.. انتو دبّلوا الكمية لو عايزين اكتر… عملته ليهم كبايتين رز بسمتي … حتسألوني ممكن المصري، حأقول ممكن، لكن الطعم بكون مختلف.. الكبسة بتتعمل بالرز البسمتي الحبته طويلة… غسلي الرز وبلّيه في مويه دافية وخليه..

يلا بعداك في حلّة في النار كبي كمية زيت مناسبة كمية البصل.. لمن الزيت يسخن، كبي البصل ومعاه نص ملعقة كبيرة هبهان حب صاحي، وزيها قرنفل (مسمار) حب صاحي، وعود قرفة.. لو عندك أعواد القرفة المبرومة دي.. دي هي النكهتها قوية… ودي القرفة الجدجد… عود واحد كافي.. لو عندك المكسّره ساي وما مبرومة، نكهتها اقل.. زيدي العدد اعمليهم تلاته

البصل والبهارات الصاحية حتتقلب سوا في الزيت.. عايزين البصل يذبل وعايزين البهارات تطلُّع نكهتها في الزيت… قلبي كويس وما تستعجلي.. أديهم فرصة تمام حتى تنتقلي للخطوة البعدها

بعد البصل يذبل (ما تخليه يصفّر)، كبي ملعقتين كبار صلصة وقلبيها شوية مع البصل.. ما كتير دقيقة كفاية

بعداك تكوني مقطعة ليك طماطمتين متوسطات.. قطعيهم صغار وكبيهم مع البصل وقلّبيهم كويس.. وبعداك ضيفي ليهم ملعقة صغيرة ملح وفلفل اسود ونص ملعقة صغيرة شمار (حق الفول) ونص ملعقة صغيرة كزبرة ناشفة ونص ملعقة صغيرة هبهان مسحون (ايوه تاني) ونص ملعقة صغيرة جنزبيل مسحون.. وقلّبيهم تمام مع الطماطم وخليها لمن تطلع مويتها

هل البهارات دي مهمة.. ايوه… الكبسة بهاراااات.. عشان كده بنعمل الصاحية والمسحونه.. بعد تحسي الطماطم اندمجت وذبلت كبي كبايتين كبار موية في حلّتك

بعداك ارمي حبتين لومي.. اللومي ده الليمون المنشّف، نكهته مختلفة شديد وبتدي طعم مميّز للكبسة.. لو ما عندك، ما مشكلة خالص.. لكن لو عندك بظبط ليك طعمها شديد.. اللومي ختيناه بعد المويه لانه عشان ينزّل نكهته محتاج سائل

نزلي قطعك بتاعت الدجاج، بي جلدها.. لو عايزاه تكون صحّية شيلي الجلد.. الدجاج حيستوي في المزيج الرهيب ده من النكهات.. كبي ليك تاني نص ملعقة ملح

غطّي الحلة وارخي النار وخلي الدجاج يستوي تمام.. داير ليه اقل شي ٢٥ دقيقة… اتأكدي انه الدجاج يستوي تماماً

بعداك طلَّعي الدجاج بتاعك ورصيه في صحن او صينية بتدخل الفرن… ولعّي الفرن من فوق

لاحظوا الدجاج مستوى تمام، عايزين بس نديه لون في الفرن.. ما بياخد زمن كتير..

بعداك نواصل في الحلّة.. الرز بتاعك داك صفيّه من مويته.. احنا بنبلّه في مويه دافيه عشان ما ياخد زمن كتير في النار.. وبرضه نتخلص شويه من النشا الفيه.. برضو حشّي ليك فلفلة خضراء حنكبها مع الرز.. حشّيها صغار

بعد كبيتي الرز والفلفل، ضيفي موية مغلية بمقدار يغمر الرز ويغطيه.. ضوقي الموية.. لو حسيتي الملح مرخي، زيدي ملح.. مافي شي غيّاظ قدر الكبسة المسيخة!

صوتي الرز تلاته سوطات بس.. عشان الملح يذوب والنكهات تتوزع.. ويلا نجي لتسوية الرز.. تاني ما معانا سواطة… خلي النار متوسطة.. وخلي الحلّة مفتوحة.. وانتظري لحدي ما الموية تتبخّر وتظهر ليك فقاقيع بين حبّات الرز… في اللحظة دي ارخي نارك شدييييييد وغطي الحلة… لاحظي كمية الموية بقت كيف

في المسافة دي، نجهّز الدقوس.. او الصوص الحارة البتجي مع الكبسة عادة.. ساهلة جدا.. في خلاط صغيرة اخلطي طماطمة كبيرة، ربع فلفلة خضراء.. تومة.. ملح.. شطة حمراء (لو عايزين).. ملعقة صغيرة خل.. ملعقة كبيرة كزبرة خضرا او بقدونس.. حبة موية عشان تحرّك الحاجات