سمك محمّر بالبيره او زي ما بتسموها في السودان، شامبيون… مع صوص التارتار… وعدته ام محمد انزل ليها طريقة سمك محمّر تكون حلوه، بس ما شاء الله قروبنا ده ملياااااان امّات محمد، ما عرفته ياتو واحده عشان أعمل ليها تاق…

اول حاجة الوصفة دي بتتعمل بسمك فيليه، كل ما كان شوكه كبير كل ما كان احسن.. غسليه بشويه مويه

انشلي السمك ونشفيه كويس خالص.. ضروري تنشفيه عشان التتبيلة تمسك فيه

 

بعداك جهّزي التتبيلة.. زي ما قلت بتحتاجي تستخدمي بيره خالية مِن الكحول… بنكهة الشعير.. ما تجيبي نكهة تانية عشان ما تأثر على نكهة السمك.. احنا عندنا هنا اسمها باربيكان.. وفي واحده تانيه اسمها موسي.. كله بمشي بس المهم تكون شعير

 

اعملي كباية ونص دقيق.. ومعاها ملح وفلفل وملعقة كبيرة بتاعت شمار الفول.. وسوطيهم سوا تمام.. لو عايزه اي بهار تاني ممكن مافي مشكلة، دي مسألة مزاج..

 

بعداك كبي البيره.. ما تسوطي كتير عشان الغازات الفي البيره ما تطلع كلها.. برضه كويس انه البيره تكون بارده

كبي زيتك في طوه تكون تقيلة وخليها على نار عالية.. استخدمي زيت يستحمل التحمير.. يعني ما بطلّع دخّان بسهولة

كده انت جاهزه.. رتّبي حاجاتك عشان تحمّري بدون لخبطة.. ختي اول شي السمك، بعداك ختي صحن فاضي بوريكم ليه بعد شويه، بعده التتبيلة بعده صحن فيه نص كباية دقيق.. (لاحظوا للصورة)

بعداك الطوه وفيها الزيت في النار، وبهناك ليها ختي صينية عليها مناديل عشان تمتص الزيت من السمك المحمر.. ومعاها مغرفتك بتاعت الشبك .. (لاحظوا الصورة)

نجي نبدا مِن البداية.. شيلي تلاته قطع سمك.. ختيهم في الصحن الفاضي القلناه قبيل داك.. وتبليهم بملح وفلفل.. عشان السمك جوه ما يكون مسيخ..

غمّسي السمكة بعداك في الدقيق ساي من غير بيره، لاحظوا احنا خلينا كباية دقيق ناشف ساي.. تغميسه خفيفه بس طبقة بسيطة بتاعت دقيق، بعدها غمّسيه في الدقيق العملناه بالبهارات والبابريكان

ارفعي السمكة خلي التتبيلة تنزل منها.. عشان ما يكون فيها زياده.. الزياده ما بتفيدك بشي.. بتوسخ ليك الزيت بس

وبعداك اقلّبها في الطوه.. ما تزحمي الطوه عشان الزيت ما يبرد..

 

ممكن بعد تلاته دقايق كده ترخي النار.. عشان يستوي ليك بي جوه.. بعد ما ياخد لون اقلبيه .. وختيه في الصينية بتاعت المناديل ديك..

انقلي سمكك داك لصينية بتاعت فرن وولعي الفرن .. عشان مسافة ما تنتهي من باقي السمك يكون الباقي في الفرن.. ما تخلي الفرن يكون حار، احنا ما عايزين السمك ينشف بجوه.. عايزينه يكون حار بس

بطلع سمك مقرمش من بره ومنفوش.. ومن جوه طري ولزيز..

ملاحظات عامة

– لو عايزه تعملي بيضة مع التتبيلة ممكن.. بتزيده نفشان ولونه بكون على اصفر من كده

– اثناء ما بتحمّر السمك جهّزي دفعة تانية عشان ما تقيفي ساي

– كمية التتبيلة دي بتكفي تقريبا تلاته كيلو سمك.. لو فضلت ليك منها، ممكن تعملي معاها بصلة وطماطمه وفلفلايه وتحمريها زي العجة.. تطلع تحفة

صلصة التارتار .. اعملي نص كباية مايونيز.. وانا أفضِّل يكون مايونيز لايت عشان بكون قوامه اخف وفيه حموضة كده…معاه ملعقة صغيرة مسطرد الفيه حبوب او العادي ما مشكلة

حشّي ليك بصلة بيضاء صغيرة ومعاها قطع بتاعت مخلل خيار..

كبيها في المايونيز ومعاها ملعقة كبيرة بتاعت شبت.. وربع كباية بتاعت موية مخلل..

 

لو ما عندك موية مخلل اعملي ملعقة صغيرة خل في ربع كباية مويه.. واعملي ملح وفلفل وحرّكيهم سوا