القرقوش

القرقوش.. او بسكويت الشريق (الشريك).. كله بمشي.. دخلته في نفسي الأسبوع الفات بت خالتي جولي، عملته حلوووو للولاده.. وقبل يومين جابت بنوته حلللللوه وسمّتها مريم.. ما شاء الله تبارك الله وربنا يحفظها..

gargosh_final

اول شي الخميرة… سخّني نص كوب حليب بس ما تخليه يغلي، وكبي معاها ملعقة كبيرة عدس او حُمّص او سمسم.. كله بمشي.. بس السمسم عنده ميزه بقولها بعد شويه

 gargosh_1
غطّي البرطمانية كويس جدا وغطيها بي قطعة قماش وختيها في حته دافيه… لو في السودان او في دول الخليج، ختيها بره في الحر.. لو في بلد بارد، افتحي الفرن واقفليه وختيها في حرارته.. بتاخد ليها من يوم ليومين حسب الحر.. وقت طويل صحي، لكن نكهتها تستاهل الانتظار
gargosh_2
الخميرة لمن تكون جاهزه اول ما تفتحي الغطاء حتجيك ريحة قوية شديد وحتتفصل لطبقتين.. طبقة فيها جمادة لبن وطبقة بتاعت مويه ساي.. وحبات العدس حتكون فوق وتحت موزعات… المعضلة الاساسية حتكون اننا عايزين المويه والجماده وما عايزين العدس.. لو استخدمتي السمسم ما بتكون في مشكلة، ما بتحتاجي ترمي السمسم
gargosh_3
تقومي عشان تعملي الحركة دي وتفصليهم، أديهم سوطه كويسه بالملعقة.. براحه وبعداك كبيهم في كوره صغيرة.. حتلقي الموية والجمادة نزلوا الكوره، والعدس فضل في البرطمانية
gargosh_4
أضيفي كباية دقيق للخميرة دي وحرّكيهم سوا.. وغطي الكوره.. الخطوة دي عايزين نختبر قدرة الخميرة انها تنفش العجين.. ممكن تاخد من نص ساعة لساعة، حسب حرارة الجو
gargosh_5
بتبدا تعمل ليك فقاقيع زي دي كده… لو ما عملت ليك اصلها ما مشكلة.. أضيفي ليها ملعقة كبيرة خميرة عادية.. اصلا احنا دايرين النكهة من خميرة اللبن.. وكده بتكون النكهة موجوده وقوية
gargosh_6
نجي للعجنة.. في العجانة او بي يدك ساي.. كبي اربعة كبابي دقيق.. معاهم ملعقة كبيرة كمون اسود وملعقة صغيرة ملح وملعقة صغيرة كركم لو عايزاه اصفر… وربع كباية سكر.. القرقوش ما بكون حلو، بكون فيه مساخة شويه كده.. لكن ممكن تزيدي كمية السكر لو حاباه حلو
gargosh_7
ضيفي ليهم نص كباية بتاعت زيت وحرّكيهم لحدي ما يختفي الزيت… لو عايزه القرقوش يكون في حببببة هشاشه، اعملي ملعقة صغيرة باكينج باودر.. لكن الأصلي بكون قوي
gargosh_8
ضيفي عجينة الخميرة وأعجني تمام مع بعض لمن يبقوا عجينة
gargosh_9
العجينة بتكون ملساء وطرية مايله لانها تلصق ليك.. ما تشيلي هم انت ماشه كويس
gargosh_10
ادهني صينيتك بي زيت او سمنة.. السمنة بتدي نكهة حلوه.. ختي شويه زيت او سمنه في صحن او كوره، وأبدي شكّلي العجينة اصابع
gargosh_11
استمري لحدي ما تكملي الكمية كلها، وبين كل مره ومره غمّسي يدك في السمنة او الزيت عشان تساعدك في التشكيل
gargosh_12
تاني خلي الصينية تخمر.. لو الواطة نهار.. طلعيها الشمس احسن .. بتعمل قشرة بي فوق وبتخمر أسرع.. انا عملتها الدنيا كانت ليل.. لكن لاحظوا الفرق في الحجم
 gargosh_13
بعداك دخليها الفرن على درجة حرارة ١٨٠ من تحت بس.. زي ما عادة بنعمل للكيك والبسكويت … بعد تقوم ولعّي ليها الفرن من فوق.. انا شغاله بفرن غاز
gargosh_14
بعد ينتهي، انا بحب أقسمه النص تاني بالطول.. لانه حجمه كبير وبياخد زمن عشان ينشف
gargosh_15
كده حجمه اظرف والكمية بتكتر ليك شديد.. وبنشف ليك من جوه
gargosh_16
كده بطلع ليك القرقوش وبنكهة الخميرة المميزة.. البيت كله ببقى ريحتو قرقوش… وده النوع التختيه في كباية الشاي، يشفط ليك نصّها.. وواحده تشبّعك تمااااام
gargosh_final

22 responses to “القرقوش

  1. السلام عليكم و رحمة الله و بركاته ،،
    المبدعة مس مريم ، جزاك الله خيرا ….
    معليش بس الوصفة شوية كده ما وقعت لي ، السوائل المستخدمة هي بس نص كوب الحليب الفي الخميرة و نص كوب الزيت ؟؟ و هل الكمية دي بتكفي لعجن الخمس كبابي دقيق ؟

    إعجاب

    • مرحب بيك يا مدينة، وشرفتيني في الموقع.. انا شكلي نسيت اكتب انه محتاجين موية للعجن.. بداية ضيفي كوب موية.. لو احتجتي زيادة ممكن تزيدي.. ممكن تحتاجي تاني نص كوباية كده..

      إعجاب

  2. أول حاجة شكرا على سرعة الاستجابة 😙😙
    و الموقع يكفيهو شرفا إنو بإسمك ..
    بالمناسبة فاقدنك في على الفيسبوك 😟

    Liked by 1 person

  3. الله يكرمك حبيبة، انا كمان فاقدانكم شديييييد، بس الانشغال والله، بحاول ارجع خلال الفترة الجاية.. تحياتي ومحبتي للجميع 🌷

    إعجاب

  4. ماشاء الله روووعة وخاصة أنها خمير ه طبيعيه لكن هل استطيع ان أستعمل هذه الخميرة للخبز والمعجنات

    إعجاب

    • تسلمي يا شموسة… نظريا ممكن تستخدميها، لكن عمليا ما اعتقد لانه ريحتها قوية شديد لدرجة انها حتغير طعم المخبوزات.. يعني طعم القرقوش المميز جاي منها

      إعجاب

  5. السلام عليكم اخت مرير الحسين وصفاته رائعة وظابطة بس حابة اعرف الكباية البتقوليها في الوصفة كباية المقاس ولا كباية الشب العادية

    إعجاب

  6. مريم …لمن اجي اقطعو المرة التانية هل بستناهو يبرد تماما ولا وهو سخن

    إعجاب

  7. ما شاء الله كنت ادور على اكلات تقليدية سودانية و عثرت على موقعك وحبيت استفسر هل في اكلات اخرى يستعمل فيها العجين المر غير القراصة والكسرة زي هذه الشابورة ما شاء الله وكمان سؤال هل بعد التقطيع ادخلها تاني للفرن تنشف ولا ماله داعي

    إعجاب

    • شكرا على وجودك يا ام يزن، وتشرفنا بيك.. بخصوص العجين المُر، ايوه في عندنا مشروب اسمه النشا وهو مشروب حلو يشرب دافي او بارد وكمان العصيدة وبتؤكل زي الكسرة مع بعض الملاحات… اما الشابورة، ما تحتاج فرن تاني، بتنشف بالهواء بس… لكن اتاكدي انها تطلع ناضجة من الفرن

      إعجاب

  8. السلام عليكم ورحمة الله مدام مريم
    جمييلة الوصفة والله تسلم يدك والاجمل تعبيرك و لغتك الحلوة
    من دربي دة قايمة اعجن واللت 😊

    إعجاب

  9. مشكورة علي هذا العمل الجميل
    ونشركم لي. مطبخ السوداني بطريقة جميلة
    و نستغرب من القنوات السودانية جايبه لينا اجانب في قنوات يعملو لينا اكلات سودانية

    إعجاب

    • يسأل عنك الخير يا الهام 🌷… اشكرا ياذوق… انا بخير وعافية.. انشغلت شويه، بجهّز لقناة يوتيوب ان شاء الله تكون ظريفة ومختلفة… حأعلن عنها عبر البلوق في الايام الجاية ان شاء الله

      إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s