القرقوش.. او بسكويت الشريق (الشريك).. كله بمشي.. دخلته في نفسي الأسبوع الفات بت خالتي جولي، عملته حلوووو للولاده.. وقبل يومين جابت بنوته حلللللوه وسمّتها مريم.. ما شاء الله تبارك الله وربنا يحفظها..
اول شي الخميرة… سخّني نص كوب حليب بس ما تخليه يغلي، وكبي معاها ملعقة كبيرة عدس او حُمّص او سمسم.. كله بمشي.. بس السمسم عنده ميزه بقولها بعد شويه
غطّي البرطمانية كويس جدا وغطيها بي قطعة قماش وختيها في حته دافيه… لو في السودان او في دول الخليج، ختيها بره في الحر.. لو في بلد بارد، افتحي الفرن واقفليه وختيها في حرارته.. بتاخد ليها من يوم ليومين حسب الحر.. وقت طويل صحي، لكن نكهتها تستاهل الانتظار
الخميرة لمن تكون جاهزه اول ما تفتحي الغطاء حتجيك ريحة قوية شديد وحتتفصل لطبقتين.. طبقة فيها جمادة لبن وطبقة بتاعت مويه ساي.. وحبات العدس حتكون فوق وتحت موزعات… المعضلة الاساسية حتكون اننا عايزين المويه والجماده وما عايزين العدس.. لو استخدمتي السمسم ما بتكون في مشكلة، ما بتحتاجي ترمي السمسم
تقومي عشان تعملي الحركة دي وتفصليهم، أديهم سوطه كويسه بالملعقة.. براحه وبعداك كبيهم في كوره صغيرة.. حتلقي الموية والجمادة نزلوا الكوره، والعدس فضل في البرطمانية
أضيفي كباية دقيق للخميرة دي وحرّكيهم سوا.. وغطي الكوره.. الخطوة دي عايزين نختبر قدرة الخميرة انها تنفش العجين.. ممكن تاخد من نص ساعة لساعة، حسب حرارة الجو
بتبدا تعمل ليك فقاقيع زي دي كده… لو ما عملت ليك اصلها ما مشكلة.. أضيفي ليها ملعقة كبيرة خميرة عادية.. اصلا احنا دايرين النكهة من خميرة اللبن.. وكده بتكون النكهة موجوده وقوية
نجي للعجنة.. في العجانة او بي يدك ساي.. كبي اربعة كبابي دقيق.. معاهم ملعقة كبيرة كمون اسود وملعقة صغيرة ملح وملعقة صغيرة كركم لو عايزاه اصفر… وربع كباية سكر.. القرقوش ما بكون حلو، بكون فيه مساخة شويه كده.. لكن ممكن تزيدي كمية السكر لو حاباه حلو
ضيفي ليهم نص كباية بتاعت زيت وحرّكيهم لحدي ما يختفي الزيت… لو عايزه القرقوش يكون في حببببة هشاشه، اعملي ملعقة صغيرة باكينج باودر.. لكن الأصلي بكون قوي
ضيفي عجينة الخميرة وأعجني تمام مع بعض لمن يبقوا عجينة
العجينة بتكون ملساء وطرية مايله لانها تلصق ليك.. ما تشيلي هم انت ماشه كويس
ادهني صينيتك بي زيت او سمنة.. السمنة بتدي نكهة حلوه.. ختي شويه زيت او سمنه في صحن او كوره، وأبدي شكّلي العجينة اصابع
استمري لحدي ما تكملي الكمية كلها، وبين كل مره ومره غمّسي يدك في السمنة او الزيت عشان تساعدك في التشكيل
تاني خلي الصينية تخمر.. لو الواطة نهار.. طلعيها الشمس احسن .. بتعمل قشرة بي فوق وبتخمر أسرع.. انا عملتها الدنيا كانت ليل.. لكن لاحظوا الفرق في الحجم
بعداك دخليها الفرن على درجة حرارة ١٨٠ من تحت بس.. زي ما عادة بنعمل للكيك والبسكويت … بعد تقوم ولعّي ليها الفرن من فوق.. انا شغاله بفرن غاز
بعد ينتهي، انا بحب أقسمه النص تاني بالطول.. لانه حجمه كبير وبياخد زمن عشان ينشف
كده حجمه اظرف والكمية بتكتر ليك شديد.. وبنشف ليك من جوه
كده بطلع ليك القرقوش وبنكهة الخميرة المميزة.. البيت كله ببقى ريحتو قرقوش… وده النوع التختيه في كباية الشاي، يشفط ليك نصّها.. وواحده تشبّعك تمااااام
مطبخ مريم الحسين 
السلام عليكم و رحمة الله و بركاته ،،
المبدعة مس مريم ، جزاك الله خيرا ….
معليش بس الوصفة شوية كده ما وقعت لي ، السوائل المستخدمة هي بس نص كوب الحليب الفي الخميرة و نص كوب الزيت ؟؟ و هل الكمية دي بتكفي لعجن الخمس كبابي دقيق ؟
إعجابإعجاب
مرحب بيك يا مدينة، وشرفتيني في الموقع.. انا شكلي نسيت اكتب انه محتاجين موية للعجن.. بداية ضيفي كوب موية.. لو احتجتي زيادة ممكن تزيدي.. ممكن تحتاجي تاني نص كوباية كده..
إعجابإعجاب
أول حاجة شكرا على سرعة الاستجابة 😙😙
و الموقع يكفيهو شرفا إنو بإسمك ..
بالمناسبة فاقدنك في على الفيسبوك 😟
إعجابLiked by 1 person
الله يكرمك حبيبة، انا كمان فاقدانكم شديييييد، بس الانشغال والله، بحاول ارجع خلال الفترة الجاية.. تحياتي ومحبتي للجميع 🌷
إعجابإعجاب
ماشاء الله روووعة وخاصة أنها خمير ه طبيعيه لكن هل استطيع ان أستعمل هذه الخميرة للخبز والمعجنات
إعجابإعجاب
تسلم يدك روووعه
إعجابإعجاب
تسلمي يا شموسة… نظريا ممكن تستخدميها، لكن عمليا ما اعتقد لانه ريحتها قوية شديد لدرجة انها حتغير طعم المخبوزات.. يعني طعم القرقوش المميز جاي منها
إعجابإعجاب
السلام عليكم اخت مرير الحسين وصفاته رائعة وظابطة بس حابة اعرف الكباية البتقوليها في الوصفة كباية المقاس ولا كباية الشب العادية
إعجابإعجاب
اهلًا يا نجلاء والف مرحب، ايوه الكباية هي الكباية المعيارية
إعجابإعجاب
كتر خيرك وربنا يبارك ليك …كفيتي ووفيتي الباقي علينا
إعجابإعجاب
حبيبتك يا مريم الحسين جزيتي خيرا
إعجابإعجاب
مريم …لمن اجي اقطعو المرة التانية هل بستناهو يبرد تماما ولا وهو سخن
إعجابإعجاب
خليه يبرد شويه يا ساره عشان يدك.. ومافي عجلة عليه..
إعجابإعجاب
ما شاء الله كنت ادور على اكلات تقليدية سودانية و عثرت على موقعك وحبيت استفسر هل في اكلات اخرى يستعمل فيها العجين المر غير القراصة والكسرة زي هذه الشابورة ما شاء الله وكمان سؤال هل بعد التقطيع ادخلها تاني للفرن تنشف ولا ماله داعي
إعجابإعجاب
شكرا على وجودك يا ام يزن، وتشرفنا بيك.. بخصوص العجين المُر، ايوه في عندنا مشروب اسمه النشا وهو مشروب حلو يشرب دافي او بارد وكمان العصيدة وبتؤكل زي الكسرة مع بعض الملاحات… اما الشابورة، ما تحتاج فرن تاني، بتنشف بالهواء بس… لكن اتاكدي انها تطلع ناضجة من الفرن
إعجابإعجاب
ما شاء الله…. ممكن اعرف طريقة هذا المشروب كرما لا امرا
إعجابإعجاب
ان شاء الله، رح اعملها وانزلها كوصفة في اقرب فرصة…
إعجابإعجاب
السلام عليكم ورحمة الله مدام مريم
جمييلة الوصفة والله تسلم يدك والاجمل تعبيرك و لغتك الحلوة
من دربي دة قايمة اعجن واللت 😊
إعجابإعجاب
مشكورة علي هذا العمل الجميل
ونشركم لي. مطبخ السوداني بطريقة جميلة
و نستغرب من القنوات السودانية جايبه لينا اجانب في قنوات يعملو لينا اكلات سودانية
إعجابإعجاب
الف شكر ليك اخ العاقب.. والمدونة منورة بوجودكم وتفاعلكم
إعجابإعجاب
وين انتي مختفيه يا دكتوره أن شاءالله المانع خير
إعجابإعجاب
يسأل عنك الخير يا الهام 🌷… اشكرا ياذوق… انا بخير وعافية.. انشغلت شويه، بجهّز لقناة يوتيوب ان شاء الله تكون ظريفة ومختلفة… حأعلن عنها عبر البلوق في الايام الجاية ان شاء الله
إعجابLiked by 1 person