هاش براون.. او تقدروا تسموها الطشّة الصحية.. او اي شي عايزينه… بس احلى مافيها انها بتنفع للمدارس.. والكل حيحبها ليك.. وممكن تعمليها جاهزه في التلاجة..

طبعا البطاطس فيه مويه… ولمن تبشريه بطلع جزء منها.. احنا المويه الفيه دي نهائي ما عايزينها.. عايزين نتخلص منها بقدر الإمكان.. عشان كده حنكب ملح.. الهدف من الملح انه يطعّم البطاطس وفي نفس الوقت يطلع المويه الفيه… للنكهة تقدري تعملي اي بهارات انت عايزاها.. انا عملته هنا توم بودره.. ممكن تبشري نص بصله معاه لو عايزه.. ممكن تبشري كوسه كمان بتطلع لزيزه.. المهم انك في المرحلة دي اشتغلي في مصفى عشان المويه تطلع

كمية المويه البتطلع، خرافية! طبعا بتختلف حسب نوع البطاطس… حقي ده طلع منه مويه كتيره خلاص… عصّري البطاطس بي يدّك.. قدر ما تقدري عشان تطلع

كده انت جاهزه… سخّني طوّتك.. واعملي فيها حبّة زيت… وممكن بأشكال القطّاعات بتاعت الخبيز.. او لو عندك زي ديل، هم حقات تشكيل البيض.. وما تخافي ما بحتاج تزييت ولا ملاوه.. اول ما تمليهم بالبطاطس،ارفعيهم لانه البطاطس متماسك بكون خلاص اخد شكلهم

انتظري ياخدوا لون من تحت واقلبيهم… تكون النار متوسطة وما تخليهم وتمشي… بعد ما ياخدوا لون من الجهتين.. ممكن تدخليهم التلاجة لو ما عايزاهم للاكل على طول.. او طوالي دخليهم الفرن يكون حار.. مدة عشرة دقايق عشان يستووا من جوّه

ممكن نفس الخطوات دي.. ولو ما عندك مزاج تقعدي تباري الأشكال… كبي الكمية في الطوه.. بحيث تطلع ليك دائرة كبيرة.. وقطعيها مثلثات زي البيتزا..