احنا هنا في الدمام عندنا سمك التلاجة العالمية.. يجيبوه ليك محمّر وجاهز.. زوجي ما بحبه.. لكن مرات بقوم يجيبه.. بناكل منه تمام، وبفضل منه جزء.. الجزء ده عادة لا بكفّي ناكله صحن سمك، لا ممكن نجدعه طبعا… بقيت اخليه كم يوم في التلاجة … وأقوم اقلبه ليه صيادية بالرز… وجنبها سلطة طحينة كاربة… بياكلوها ويحبوها اكتر من السمك المحمر الأصلي..

بعد تندمج الحاجات سوا نكب المويه… الصيادية حلوه بالبسمتي.. ممكن تتعمل بالمصري.. بس بالبسمتي الذ… البسمتي بحتاج عادة لكل كوب رز كوب وربع مويه… لكن للصيادية زيدي ليك تاني ربع كباية على مويتك الأصلية لانه السمك حيمتص من المويه شويه.. عشان ما تطلع ليك ناشفه.. لاحظوا انا لسه ما ختيت السمك

قطعي ليك طماطماية وفلفلة خضرا وممكن تزيدي الكمية.. ديل انا بعملهم زينه اكتر من طعم… برضهم شرايح

بعد الموية بتاعت الرز تسخن، كبي سمكك في الرز داك وارفنيه جواه.. وكبي الطماطم والفلفلية المقطعات.. وارخي النار وغطي حلّتك.. خلي الرز يستوي والسمك يمتص النكهات دي .. وما تسوطي.. حلوه قطع السمك تحافظ على شكلها ما تتفتفت

في الاخر كان عندك شمار اخضر (شبت)، قطّعيه وكبيه بعد تستوي الحاجات.. عشان لونه ما يتغير يفضل اخضر .. بدّي منظر حلو شديد

قدّميها مع سلطة الطحينة.. ممكن اوريكم خطواتها حسي… لكن بالجد اكله لزيزه وسريعة جدا… ومنظرها يملأ العين.. يعني لو معاك ضيوف بترفع الراس

سلطة الطحينة.. كبي تلاته ملاعق طحينة.. عليهم نص ليمونه.. وسوطيهم

الليمون بخلي الطحينة تبقى زي العجين كده.. ما تخافي

واصلي تقليب وكبي معاها شوية موية دافية… عايزين القوام يبقى ناعم.. بعد ما تضيفي المويه ببقى

كبي ليها ملعقة شمار الفول… لأنها حتتاكل مع السمك… وحبة ملح.. انا عادة لمن اعملها مع الصيادية ما بعمل فيها زبادي.. لانه احنا بناكلها مع الرز بالملعقة.. لو عايزينها لشي تاني او عايزينها حموضتها اقل، ضيفوا نص كوب زبادي ..