بانكيك مالح… حلو جدا ولزيز.. وبنفع خالص للمدرسة… ده غير انه وجبة متكاملة.. فيها الحليب والبيض والخضار واللحمة والجبنة…
طبعا ده بانكيك، ما كريب… الكريب ما بتعمل معاه باكينج باودر وبكون رفييييع زي الكسره… لذا وجب التنبيه..
لكل بيضتين بنعمل نص كباية حليب.. ونضربهم تمام عشان ندخّل فيهم الهوا… والبيض يفك شويه… ونعمل معاهم ذرة ملح.. ممكن نزيد وممكن ننقص حسب المكونات الحنعملها معاها
بعداك نضيف ليهم كباية دقيق .. ونضيفها شويه شويه عشان ما يكلكع ليك… ولسه شغالين بي مضرب الشبك… بعد يندمج الدقيق كله، كبي ملعقة صغيرة باكينج بودر.. الباكينج بودر الهدف منه انه ينفخها شويه وتكون هشّة.. عشان كده برضه مهم جدا ما تكتّري سواطة… كده انت جاهزه بالأساس بتاع البانكيك.. بس خففناه شويه عشان الحاجات الحنضيفها معاه
قطّعي ليك خضروات قطع صغيرة… انا عملته طماطم وفلفل اخضر وفلفل برتقالي.. ممكن تعملي بصل او بودره توم او فطر او زيتون.. حسب بتحبوا شنو.. اي شي عايزاه
بعد نكب الخضار في عجينتنا، ما تسوطي بمضرب الشبك.. انا أضفته هنا مارتديلا مربعات وجبنة موزيريلا.. وسوطه سريعة كده بس يندمجوا مع بعض
نجي للتسويه.. في طوه تكون ما بتلصق.. او طوه فيها حبّة زيت… كبي مقدار ملعقتين كبار من الخلطة… وبعد تشعري بيها اتماسكت من تحت، اقلبيها…
لو عندك مزاج، زيي اليوم داك، اعمليها بأشكال الخبيز… بس حتحتاجي تمسحيهم بي زيت او non stick spray عشان يطلعوا ليك بدون ملاوة
ده شكل النجمة بعد استووا في الفطور بتاع بتّي.. وكنت عاملاهم قبلها بيوم، الصباح بس سخّنتها بالمايكروف.. وفضلت بنفس الطراوه
مطبخ مريم الحسين 