المقلوبة

المقلوبة… اكله بعملوها في الاْردن وفلسطين وسوريا.. ما عارفه لقطته الوصفة من وين.. لكن غالبا من جيراننا في الفترة الكنت فيها في الاْردن… المهم اني بحبها جدا وما بحب شغلها لانه كتير … بس النتيجة تستاهل.. حاوريكم المقلوبة، مريم ستايل

الفكرة عبارة عن كمية من الخضار بتتحمّر ومعاها دجاج وبتتعمل طبقات مع الرز وتستوي معاه في مويته.. اول خضار حنعمله هو البطاطس… غسليه وقطّعيه شرايح عريضة وكبيرة… لاحظوا البطاطس دي عريضة كيف

نجهز الأسود.. برضه نقطعه دوائر تكون عريضة.. وخليه بي جلده ما تقشريه.. اعملي ليه ملح وخليه تقريبا نص ساعة.. حيطلع مويه

غسليه في مويه تمام.. ونشّفيه كويس بي منديل او قطعة نظيفة… الحركة دي اول شي بتخليه ما يمتص الزيت.. تاني شي، لو مر بتشيل المراره تماماً.. حقي ده كان مر.. لمن عملته ليه كده راحت المراره

كبي شويه زيت في حلّة غريقة.. وحمّري البطاطس اول.. بس ياخد لون .. ما تهتمي يستوي لجوه.. بس من برّه

واصلي في زيتك داك زاتو.. وحمّري الأسود بنفس الطريقة.. عايزين قشرة ولون بس.. ما ضروري يستوي من جوه… لاحظوا الزيت شويه كيف

بعداك قطعي فلفل اخضر لقيت لي فلفلة صفراء، قطّعتها.. قلبي شويه ما كتير في الزيت.. شويه بس ثواني

قلبي بصلتك ومعاها تلاته فصوص توم بس مسافة ريحتهم تطلع.. ما تخليهم يحمّروا..

كبّي قطع الدجاج… بي جلدها.. بنتفاهم بعدين في الجلد.. عادة بتتعمل الاكلة دي بي دجاجة كاملة.. انا عملت قطع متنوعة…

قلّبي الدجاج والبصل والتوم تمام في الزيت داك… وبعداك اغمريه بي مويه وأرمي فيه البهارات دي.. ورق الغار ما ضروري لكن معروف انه اهل الاكله دي بستخدموه كتير في أكلهم..

كبي ملعقتين كبار قرفة ناعمة مطحونة… ايوه الكمية بتظهر انها كتيره… لكن نكهة المقلوبة الاساسية جاية منها.. ولون الرز زاته بجي من القرفة دي… ما تخافي منها

خلي الدجاج يتسلق تمام.. بس ما يتهرد.. يعني بس يطلَّع نكهته في المويه… كبي ملح وفلفل.. كتّري الملح لانه احنا لحدي حسي ما كبينا ملح.. عايزين كمية تملّح لينا البطاطس والاسود والرز وكل شي… ختي ليك طوة في النار، طلَّعي دجاجك داك وختيه في الطوه باتجاه الجلد.. لاحظي للصورة

الطوة فاااااضية مافيها زيت.. احنا عايزين نحمّر الدجاج بالدهن الفيه، ما عايزين نضيف زيت زياده، كفاية الكبيناه قبيل! الاكل الصحي الخفيف لزيز وما بتعب البطن… الدجاج في الطوة دي بتحمّر كويس وبياخد لون تمام..

شوفوا الزيت الطلع من الدجاج ده كيف!

في المسافة دي طبعا تكوني غسلتي رزك ونقعتيه في مويه دافيه مده نص ساعة وصفّيتيه.. انا مستخدمه كبايتين رز اسمر، وكباية رز ابيض.. والاتنين بسمتي.. اصلا هي بتتعمل بالرز الابيض البسمتي، بس كان منتهي عندي.. مافي فرق في الطريقة.. والأسمر أصح وأطعم

كده خلاص جهّزتي حاجاتك كلها… قبل ساعة من الغدا تقدري تبدي تجمّعيها… ممكن في المسافة دي تغلسي العدة وتاخدي دش لو عايزه

نجي للتجميع.. في حلة ضيقة وغريقة، كبي ملعقتين من الرز لو خايفة تلصق ليك

بعداك رصّي قطع الدجاج ديك.. بس رصّيها بالقلبة.. يعني الجلد يكون لتحت باتجاه الحلّة

بعداك رصّي البطاطس وجدّعي معاه الفلفل … حاولي ختيه بالجنبات

بعداك رصّي الأسود…

اخر شي كبي الرز.. واديه ضغطه خفيفة بي يدّك

متذكرين الشوربة ديك السلقنا فيها الدجاج.. كبّيها في الرز.. بحيث تزيد بي ٢ سم بس من فوقه

ولّعي النار تكون متوسطة… اول ما تشعري المويه دخلت، ارخي النار شدييييييييد وغطي الحلة وخليها نص ساعة

بعد النص ساعة، اطفي النار وخلي حلّتك مغطية تاني نص ساعة… اول شي الرز حيكمّل سوا.. تاني شي المقلوبة حتروق عشان تقدري تقلبيها

يلا جيتي للقلب.. بي كمشه اضغطي الرز لتحت عشان يتماسك سوا.. ما تهرسيه.. بس على خفيف.. خليك رقيقة

صحنك العايزه تقلبيها فيه اول شي يكون افطح، لكن كبير عشان ما تتدفّق ليك بالجنبات.. ختيه من فوق الحلّة… وأقري آية الكرسي.. وقولي يا الله، وهووووبا اقلبيه