لو عندك الحاجات دي، ولسه ما عملتي غداك.. اعملي معاي مندي اللحم… انا لسه ما بديت… حابدا بعد نص ساعة كده.. وبتاخد بالضبط ساعة، لو حتشتغلي بالبريستو .. ولو عندك وقت اكتر، بتاخد ساعة ونص.. عشان اللحمة تستوي كويس.. الحاجات هي:
رز بسمتي.. لو عندك مصري ممكن لكن ما بطلع طاعم
لحمة ضأن مقطعة، احسن تكون فيها عضم
بصلتين متوسطات
عود قرفة
١٠ حبّات هبهان
كركم (ما ضروري)
ملح وفلفل
فحمة

قطعي البصلتين.. بس ما تهتمي كتير بالحجم ما حتفرق..

زي ما قلت، ممكن يتعمل بالبريستو وممكن في حلة ساي.. لو عايزه تعملي بالحلّة العادية، اتبعي نفس خطوات مندي الدجاج

رزك في الأثناء ده مغسّل ومبلول في موية دافية…

رصّي لحمتك في المصفى

في حلة البريستو كبي موية على قدر الرز.. اعملي كباية وربع موية عن كل كباية رز… ومع الموية ديك كبي البصل والبهارات ولو عندك لومي كمان يكون حلو لو مافي ما ضروري… كيس الهبهان ده بنتكلم عنه بعدين

ختي المصفي بي لحمته فوق الموية.. حاولي اللحمة ما تصل الموية.. المصفى مصمم بحيث يكون في مسافة بينه وبين قعر الحلّة.. لو مويتك كتيره قلليلها وبنكبها تاني بعدين لمن نجي للرز

غطّي البريستو بغطاها وخليها على نار هادية.. تقريبا ربع ساعة..

بعد تفتحي الحلّة، طلَّعي المصفى بتاع اللحمة… حتلاحظي انه العصارة كلها نزلت تحت في الموية… دي حيستوي بيها الرز بتاعك

ما تطلعي اللحمة من المصفى… خليها لأننا حنرجعها تاني الحلة.. صفي الرز من مويته… وكبيه الرز في حلّتك… كبي ملح، لاحظي احنا قبيل ما كبينا ملح في الموية.. وسوطي شويه الرز شويه بس عشان يندمج في المويه

رجعي اللحمة فوق الموية تاني.. واقفلي الحلّة.. عادة الحلل الزي دي عندها خيار بتاع نوع الأكل (لاحظي الصورة)، اختاري الرز… الخيار ده بخلي الموية تتبخر زيادة عن العادة عشان الرز يستوي ليك … حلّتي دي ليها ١٠ سنين… اعفو لينا الغبشة، يا حليلها ما مقصّرة

افتحي البريستو.. وطلّعي المصفي بي لحمته.. حتلقي الرز مستوي وشارب مويته.. انا عامله كبايتين رز، اخدوا ربع ساعة بي النار وخمسة دقايق البريستو مقفولة… الرز ده اصفااااار… الإضاءة ما أدته حقّه.

كبي اللحمة في الحلّة… وممكن تستخدمي صحن زي ده، شايفينه، الصحين الصغيرووووني داااااك.. او لو ما عندك.. اعملي صحن بالفويل… بس بصراحة انا ما بحب الفويل يهبش الاكل… كبّي فيه ملعقة كبيرة زيت.. اي زيت عندك بنفع ما بتفرق…

ختي الفحمة في الصحن الفيه الزيت… واقفليه حلّتك تمام… حيطلع دخان كثيف… خلي الرز واللحمة ياخدوا طعمه… فورا حتشمي ريحة الشواء.. كأنك شويتي اللحمة دي..

قدّميه مع سلطة خضراء اوسلطة زبادي بالخيار