المنين.. وصفتي البعملها دايما.. عملته قبل شويه، وشفته كم مره أسئلة عنه.. احب اهدي لحن الختام للعزيزة ميمي الخليفة مع التحية
ممكن تعمليه بالعجّانة او بيدك ساي.. حأشرح الطريقتين مافي فرق كبير.. في حاجة غريقة او في الكورة حقت العجانة، كبي كباية موية.. مووووووية ايوه موية ما حليب.. كباية زيت وكباية سكر معاها ملعقة كبيرة بتاعت نشادر وملعقتين صغار باكينج بودر وملعقة صغيرة ملح وملعقة كبيرة سمسم محمّص وملعقة كبيرة حبّة سوداء.. ممكن تعملي ملعقة صغيرة قرفة مسحونة.. او جنزبيل.. او فانيليا.. نكهة بس..
لو بالعجّانة، ركبي اليد بتاعت العجن.. لو بيدك، سوطي الحاجات دي سوا لحدي ما السكر يذوب ليك.. عشان عجينتك ما تبقى جزء مسكر وجزء لا..
بعداك نجي للدقيق.. انا مستخدم الدقيق الكويتي ده.. مرات بعمله بالدقيق الأسمر.. بطلع لزيز جدا.. ممكن تلخبطيهم سوا.. اسمر وابيض…
في البداية كبي اربعة كبابي دقيق.. وسوطيها بالملعقة الكنت بتسوطي بيها.. او شغلي العجانة لو انت شغاله بالعجّانة… لحدي ما يندمج الدقيق كله في الحاجات السائلة… لاحظوا العجينة لسه لينه
في المرحلة دي لو شغالة بالملعقة ما حتقدري تسوطي.. طلعيها واشتغلي باليد.. لو بالعجّانة، واصلي عجن.. بعداك أبدي كبي نص كباية نص كباية.. انا ما حأكتب عدد محدد لكبابي الدقيق.. عشان الوصفة تنفع ليك مع اي نوع دقيق… استمري ضيفي الدقيق.. لمن تبقى ليك عجينة ساهلة التشكيل..
كده عجينتك جاهزه.. خليها ترتاح شويه… وبعداك أبدي افرديها بالنشابه او الكباية او اي طريقة فرد.. بس ما تفرديها رقيقة شديد.. ولا سميكة شديد.. ختي في بالك انه النشادر والباكبنج بودر حيزيدوا حجم البسكويته اقل شي مرتين.. قطعيها
التقطيعة العايزاها تقدري تعمليها.. ممكن بالسكين او بي قطاعة البيتزا.. او بالقطاعة بتاعت الفستون دي.. بس اشتري واحده تكون غريقة الحُفر بتاعتها.. لانه انا اتمقلبت في واحده، لمن ادخل البسكويت الفرن بتنفش والفستونه تروح
نجي للفرن… انا طبعا شغالة بفرن الغاز.. فرن الكهرباء أسرع.. ندخل الصينية الفرن ونكون مولعين من تحت بس.. درجة الحرارة ما تزيد على ١٨٠، الباكينج بودر بحتاج لحرارة متوسطة عشان يشتغل.. الكيك والبسكويت دائماً اعمليهم على ١٨٠.. اعلى من كده يا هبطت ليك يا حرقت.. نخليها لمن تتحمص من تحت تماااام
بياخد في الفرن بالضبط نص ساعة.. بعداك نفتح الفرن من فوق.. عشان يتحمَّص وياخد لون من فوق… بالكتير ٥ دقايق بكون اتحمص.. نطلعه بره يبرد وينشف… عشان يكون مقرمش.. زوجي عنده اختبارين للمنين، اختبار القرمشة واختبار البلّ… والوصفة دي، بتباصي في كل مرّه .. الصورة دي قديمة.. لكن نفس النتيجة كل مره..
وممكن يتعمل بدقيق البر…. بطلع طعمه لزيز جدا
وصحي لزيز
مطبخ مريم الحسين 
نفسي تعملي ليك قناة يو تيوب نفعتيني في حاجات كتير بقيت نا شاء الله تبارك الله ما يشتغل الا بطرقك جزاك الله خير الجزاء شرحك مفصل وجميل وممتع جدا وياريت نبقى اصدقاء وكل سنة وانتو طيبين
إعجابإعجاب
شكرا يا ياسمين.. انا سعيدة والله انه وصفاتي بتتعمل في بيتكم العامر.. واتشرف بيك صديقة والله.. انا لاقياك وين 🌷.. فكرة قناة اليوتيوب حأفكر فيها والله 😊
إعجابإعجاب