المنين

المنين.. وصفتي البعملها دايما.. عملته قبل شويه، وشفته كم مره أسئلة عنه.. احب اهدي لحن الختام للعزيزة ميمي الخليفة مع التحية

minan_final
ممكن تعمليه بالعجّانة او بيدك ساي.. حأشرح الطريقتين مافي فرق كبير.. في حاجة غريقة او في الكورة حقت العجانة، كبي كباية موية.. مووووووية ايوه موية ما حليب.. كباية زيت وكباية سكر معاها ملعقة كبيرة بتاعت نشادر وملعقتين صغار باكينج بودر وملعقة صغيرة ملح وملعقة كبيرة سمسم محمّص وملعقة كبيرة حبّة سوداء.. ممكن تعملي ملعقة صغيرة قرفة مسحونة.. او جنزبيل.. او فانيليا.. نكهة بس..
minan_1
لو بالعجّانة، ركبي اليد بتاعت العجن.. لو بيدك، سوطي الحاجات دي سوا لحدي ما السكر يذوب ليك.. عشان عجينتك ما تبقى جزء مسكر وجزء لا..
minan_2
بعداك نجي للدقيق.. انا مستخدم الدقيق الكويتي ده.. مرات بعمله بالدقيق الأسمر.. بطلع لزيز جدا.. ممكن تلخبطيهم سوا.. اسمر وابيض…
minan_3
في البداية كبي اربعة كبابي دقيق.. وسوطيها بالملعقة الكنت بتسوطي بيها.. او شغلي العجانة لو انت شغاله بالعجّانة… لحدي ما يندمج الدقيق كله في الحاجات السائلة… لاحظوا العجينة لسه لينه
minan_4
في المرحلة دي لو شغالة بالملعقة ما حتقدري تسوطي.. طلعيها واشتغلي باليد.. لو بالعجّانة، واصلي عجن.. بعداك أبدي كبي نص كباية نص كباية.. انا ما حأكتب عدد محدد لكبابي الدقيق.. عشان الوصفة تنفع ليك مع اي نوع دقيق… استمري ضيفي الدقيق.. لمن تبقى ليك عجينة ساهلة التشكيل..
minan_5
كده عجينتك جاهزه.. خليها ترتاح شويه… وبعداك أبدي افرديها بالنشابه او الكباية او اي طريقة فرد.. بس ما تفرديها رقيقة شديد.. ولا سميكة شديد.. ختي في بالك انه النشادر والباكبنج بودر حيزيدوا حجم البسكويته اقل شي مرتين.. قطعيها
minan_6
التقطيعة العايزاها تقدري تعمليها.. ممكن بالسكين او بي قطاعة البيتزا.. او بالقطاعة بتاعت الفستون دي.. بس اشتري واحده تكون غريقة الحُفر بتاعتها.. لانه انا اتمقلبت في واحده، لمن ادخل البسكويت الفرن بتنفش والفستونه تروح
minan_7
نجي للفرن… انا طبعا شغالة بفرن الغاز.. فرن الكهرباء أسرع.. ندخل الصينية الفرن ونكون مولعين من تحت بس.. درجة الحرارة ما تزيد على ١٨٠، الباكينج بودر بحتاج لحرارة متوسطة عشان يشتغل.. الكيك والبسكويت دائماً اعمليهم على ١٨٠.. اعلى من كده يا هبطت ليك يا حرقت.. نخليها لمن تتحمص من تحت تماااام
minan_8
بياخد في الفرن بالضبط نص ساعة.. بعداك نفتح الفرن من فوق.. عشان يتحمَّص وياخد لون من فوق… بالكتير ٥ دقايق بكون اتحمص.. نطلعه بره يبرد وينشف… عشان يكون مقرمش.. زوجي عنده اختبارين للمنين، اختبار القرمشة واختبار البلّ… والوصفة دي، بتباصي في كل مرّه .. الصورة دي قديمة.. لكن نفس النتيجة كل مره..
minan_final
وممكن يتعمل بدقيق البر…. بطلع طعمه لزيز جدا
minan_9
وصحي لزيز
minan_10

2 responses to “المنين

  1. نفسي تعملي ليك قناة يو تيوب نفعتيني في حاجات كتير بقيت نا شاء الله تبارك الله ما يشتغل الا بطرقك جزاك الله خير الجزاء شرحك مفصل وجميل وممتع جدا وياريت نبقى اصدقاء وكل سنة وانتو طيبين

    إعجاب

    • شكرا يا ياسمين.. انا سعيدة والله انه وصفاتي بتتعمل في بيتكم العامر.. واتشرف بيك صديقة والله.. انا لاقياك وين 🌷.. فكرة قناة اليوتيوب حأفكر فيها والله 😊

      إعجاب

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s