بطاطس شرايح (ودجيز) wedges.. شغل الكسل بدا.. والله عملتها عشان ما اقشّر البطاطس
غسّلي البطاطس غسيل تمام..خلي القشر في البطاطس.. القشر فيه فيتامينات كتيرة ومعادن مهمة.. وبطلع لزيز شديد في الوصفة دي.. امسكي البطاطسه اقطعيها بالطول
شيلي النص تاني اقطعيه النص، برضه بالطول
تاني شيلي الربع اقسميه النص، برضه بالطول… يعني البطاطساية بتعمل ليك ثمانية شرايح.. لو بطاطستك عريضة قسّميها اكتر.. ممكن تطلع ليك ١٦ شريحة من البطاطسه الواحده.. لو بطاطستك طويلة اقسمي الشرايح النص.. بس احلى لو البطاطس صغار
بعداك في كوره صغيرة، ختي ملعقتين كبار زيت زيتون.. معاهم ملح وفلفل وبابريكا وتوم بودره وبصل بودره اعصري عليه نص ليمونه.. قلبي الحاجات مع بعض كويس
كبي الصوص دي في البطاطس.. وختيهم في صينية ودخليهم الفرن.. انا عملتها بالاكتيفراي.. لكن قبل اجيبها كنت بعملها في الفرن
بس في الفرن اتاكدي انه الصوص مغطيه البطاطس كلها كويس جدا.. وفي البداية خليها مغطية بفويل او اي غطاء …. اخر شي افتحي ليها الشواية عشان تبقى مقرمشة
القشرة بتطلع مقرمشة.. واللب ليّن لانه عريض.. والصوص طعمها لزيز شديد
مطبخ مريم الحسين 