الناعم بالطريقة البحبها… كل زول عنده ناعمه البحبّه، انا الناعم بحبه يكون مفرفر، جني وجن الناعم البقيف ليك في الحلق.. وبحبه يكون مقمّر.. الوصفة دي أخدتها من جارتي، خبزت لي في ولادة بتّي وعجبني شديد… هي ادتني الوصفة بكباية الشُب، لكن انا قستها وعملتها بالكبابي المعيارية.. بكتب ليكم مقاديري
قبل أُوصِّف احب اقول اني جرّبته كعك صدقيتي هاجر قوتة.. وطلع عجيب جدا ما شاء الله عليها.. وبالجد اي واحده متخوّفة من الناعم، تعمل حق هاجر لانه مضمون.. مافي اي فرصة ان يفشل..
اول حاجه نبدأ بالمقادير الجافة.. عادة لمن نخبز او نعمل كيك بنعمل المقادير الجافة سوا عشان نتاكد انها اتوزعت كويس قبل ما يجيها السائل… اعملي خمسة اكواب دقيق متعدد الاستعمالات، دقيق ابيض عادي ومعاهم تلاته اكواب دقيق بُر اسمر.. الدقيق الأسمر بخلي الخبيز طاعم شديد.. يعني المجموع ٨ اكواب دقيق
نضيف ليهم ملعقتين ونص كبار باكينج باودر.. وكوب جوز هند … وخمسة ملاعق كبيرة سمسم محمّص.. انا حمّصته في طوة صغيرة قبل أضيفه
البهااااااار… ملعقتين ونص كبار كافور.. وملعقتين ونص كبار هبهان مسحون وملعقتين ونص كبار قرفة مسحونة.. ديل قبل السمنة
اتاكدي انه الحاجات اندمجت كويس.. وضيفي ليهم كبايتين سمنة.. وكباية وربع زيت.. وحرّكي العجين عشان يندمج كله مع بعض كويس .. السمنة انا كنت خالاها بره، عشان كده سايحة.. واحسن تكون سايحة الشغل بيها اسهل
بعداك في وعاء صغير، كبي نص كباية زبادي، ملعقة كبيرة ونص من الملح، وملعقتين كبار ونص سكّر.. سوطيهم تمام وأبدي ضيفيهم شويه شويه للعجينة وأعجني.. لحدي ما تنتهي كمية الزبادي
العجينة كده جاهزه، لكن لازم نخليها ترتاح اقل شي نص ساعة.. الدقيق يشرب السمنة .. قبل ما ترتاح العجينة بتظهر ليك لينة كده
ما تقلقي.. بعد ترتاح حتلقيها بقت ناشفة.. والحقيقة حتكون محتاجة لموية كمان
كمية الموية بتعتمد على نوع الدقيق.. انا احتجته كباية موية.. كبي الموية شوية شوية لمن تبقى عندك عجينة متماسكة تقدري تشكّليها.. بتتفرد ليك باليد ساي.. واستخدمي القطاعة العايزاها.. احنا تقليديين شوية.. لكن كل زول والبحبه
ما برتفع كتير الناعم ده، عشان كده اقطعيه عالي.. رصّيه قريب بعض ما تخافي.. معناها حتنتهي سريع من الخبيز
انا فرشته الصينية بورق خبر عشان ما اتعب في غسيل الصينية .. كسل شديد.. ختي الصينية في الرف التاني من فرنك وولعيه من تحت على درجة حرارة ١٨٠.. دايما الخبيز والكيك بنعمله في الدرجة دي.. لو خبيزك ما عايزاه لونه يتغير اعمليه في ١٦٠، زي الغريبة والبتيفور مثلا
بياخد بالضبط نص ساعة.. طلعيه لمن يكون اتقمّر كويس من تحت.. انا بنجض الخبيز كله وبرجّعه تاني احمّره من فوق
بعد يستوي من تحت، رصيه في الصينية تاني وولعيه من فوق.. خلي النار مرخية وابعديه منها ما يكون قريب عشان ما يحرق ليك
بعد يستوي ويعجبك لونه.. طلعيه في صينية عشان يبرد تماماً..
بعداك جيبي الجردل او الباغة العايزه تحفطيه فيها، وختي فيها منديل من تحت..
رصّي طبقة من الخبيز.. تكون جنب بعض.. وختي ليك منديل تاني من فوق
استمري ختي طبقة تانية بتاعت خبيز وختي من فوق ليها منديل لحدي ما تنتهي.. الهدف من المنديل انه يمتص الرطوبة عشان خبيزك ما يعتت وطعمه يتغير
لمن يجي العيد، سكّريه بي سكّر بودره.. وقدّميه لضيوفك… من تجربتي السابقة مع الوصفة دي، الخبيز ما بشرب السكر ولون السكر ما بتغير… وممكن تسكّريه من زمن وتخليه في شيالتك ما بتجيه حاجه
ملحوظة هامة: الكوب المعياري بتاع السوائل بختلف عن الكوب المعياري بتاع الحاجات الجافة.. شكله زي في الصورة كده
مطبخ مريم الحسين 