القراصة للمبتدئات.. الطريقة دي والحجم بتاع القراصة ده بتاع اهلنا في الشمالية.. ما بحبوا القراصة الصغار..
نتفق من البداية.. دي الخطوات البتبعها.. غالبا حيكون في كتار عندهم طرقهم.. مرحب بيهم وبي معلوماتهم الحتفيدنا كلنا.. ده ما بعني انه طريقتي صح ولا طريقتهم غلط.. بعني انه كل الطرق تؤدي الى القراصة.. .. اهم شي بالنسبة لي نادر زوجي بستمتع بأكلها كل ما اعملها ليه.. رغم اني ما باكلها.. دي اهداء لكل واحده لسه بتطاقش في المطبخ..
نبدأ اول شي بالدقيق.. دقيق القراصة البستخدمه ناس البلد دي بسمّوه دبي.. بنجيبه من المطحنه.. هو دقيق قمح ما مقشور.. لونه بيج لكن في نفس الوقت مطحون ناعم جدا عشان كده ما بغلّب.. لاحظوا لي لونه مقارنه بي الدقيق متعدد الاستعمالات
طيب لو ما عندك دبي! جيبي دقيق القمح الأسمر (البر)، ولخبطيه مع دقيق متعدد الاستعمالات (ابيض) بنسبة واحد بر مقابل تلاته ابيض .. كده حتحصلي على الطعامه الجايه من البر واللزوجة بتاعت الأبيض..
انا بكب كمية الدقيق العايزه اعملها.. وباستخدام مضرب الشبك قبل ما اعمل اي شي.. بديه تحريكه، عشان يدخله الهوا ولو في كراضم بتاعت دقيق، تتفرتق
بعداك بضيف بي طرف الملعقة الصغيرة، باكينج باودر.. الهدف من الحركة دي انه القراصة تطلع ليك هشّه
بعداك نجي لمعضلة التخمير.. في ناس بقولوا اعملوا خميره ناس بقولوا ما تعملوا…وانا بصراحة ما عجبت جماعتي الا لمن عملته خميره.. لكن بحذر.. وبوريكم الفكرة كيف بعد شويه.. بس حبيت اثبت اني بستخدم خميرة.. الخميرة العندي الايام دي غايظاني.. النوع الحبوبه كبار.. النوع ده لازم قبل تضيفيه للعجين تذوبيه في حبة مويه دافيه (يدك تستحملها) مع حبة سكر.. للكوبين دقيق، عملته ملعقة صغيرة خميرة
لو عندك نوع الخميرة الحبوبها صغار، كبيها طوالي في الدقيق.. ما بتحتاجي خطوة التذويب في المويه دي
بعد تذويبها في المويه، حيكون شكلها زي العصير البيج..
خليها زي عشرة دقايق كده.. لو خميرتك سمحة حتعمل رغوة كده.. ولو هبشتي الكباية حتلقيها حرارتها زادت شويه كده.. لو خميرتك كعبه، ما حيحصل شي.. كعبة، معناها صلاحيتها انتهت او نوعها كعب.. وحتتعبك لقدام.. ممكن تصبري تاني عشرة دقايق، احتمال مع البرد تحتاج زمن اكتر
بعداك كبي الخميرة بي مويتها في الدقيق وكبي معاها ملح.. صحي الملح ببطء التخمير.. لكن احنا ما عايزنها تبقى خميرة.. الملح خليك كريمة فيه.. عشان طعمها بطلع ما حلو لو كانت مسيخة..
نجي لكمية الموية.. واصلي بي مضرب الشبك.. بخليك تعرفي تقدّري كمية الموية.. وبشيل ليك اي كراضم وبدخّل ليك هوا في العجين.. كبي مويه ما تكون بارده لو الجو بارد.. يعني تكون دافيه.. مصمصي كبايتك الكان فيها الخميره.. وكبي.. وحرّكي بالمضرب.. في البداية بتكون الحركة تقيله.. لكن وانت بتكبي الموية بتصلي مرحلة بتحرك ليك العجين بسهوله.. ما تكتري المويه شديد.. بس اول ما تحسي الحركة بقت ساهله، وقّفي المويه.. وواصلي قلّبي.. لحدي ما تصلي للقوام بتاع الفيديو ده..
خلي العجين يقعد فترة في حتة دافيه .. لو الواطه حاره ما بتحتاج وقت كتير.. يلا دي الحته القرار فيها بعتمد على ملاحك شنو.. لو ملاحك مفروك (بامية، سلج، خضرة..) بقولوا خلي القراصة تتخمر لمن تبدي تشمي ريحة الخميره.. بس ما تخليها تخمر شديد لمن تتضاعف، كده لو جيتي رميتيها بتطلع ليك مفتفته.. لو ملاحك دمعة، ويكة، تقلية…او اي ملاح تاني، ما تخليها تتخمر.. انا عادة براقبها، اول ما تظهر تلاته اربعة فقاعات في العجين، برميها.. لاحظوا في الصورة.. عدد بسيط من الفقاعات
نجي للرمي.. جرّبته حاجات كتيره.. لحدي ما هدتني عمّة اولادي الصاج ده.. ريّحني راحه شديده.. وده نفس الصاج البعوس فيه الكسره.. وبعمل فيه المُطَبّق.. ومرات بنجّض فيه البيتزا لمن اكون محتاره!
ختي صاجك على نار متوسطة.. وختي جنبي العجين .. وكوره فيها مويه تمصمصي فيها يدّك .. وفوطه تنشّفي بيها يدك عشان ما تنقطي المويه تملي مطبخك.. الكمية العملتها بتاعت العجين دي بتعمل ليها تلاته قراصات XXL .. ده الحجم البحبوه ناس الشمالية.. كبي العجين.. وحرّكي بي يدّك لحدي ما تغطي الصاج كلّه تقريبا
نارك هادية، لكن مفروض الصاج يكون سخّن تسمعي تششش لما تكبي العجين.. بعد تفردي عجينتك عايني بعيونك بس..حتلاحظي انه شويه شويه بدا العجين ينشف من فوق.. لكن لانه حجم القراصة كبير وتخينه، ما تنتظري العجين كله ينشف تماماً.. ارفعي طرف القراصة شوفيها من تحت..لاحظوا في الصورة.. الحفر الظهرت من فوق دي معناها قراصتك دخلها هوا.. ودي حاجه كويسه
عايزنها تكون اتحمّرت من تحت قبل نقلبها..عشان لما نقبلها يكون شكلها كده.. شدّي عضلاتك وامسكي القراصة كويسه، وهووووبااااا، اقلبيها
كده قراصتك جاهزه.. ختيها في صحن مناسب.. الصحن ده لقيته في إيكيا التقول معمول للقراصة.. كان اتكسر حازعل عليه زعل شديد … قراصتنا دي عملتها ليهم بي ملاح ويكة محمّرة.. الشعب عندي عجبته شديد ..
مطبخ مريم الحسين 
شكرا علي فك طلاسم عمل القراصة والشرح الواضح
إعجابإعجاب
العفو يا ابو احمد، شكله اليوم جمعة ونويتو على القراصة
إعجابإعجاب
عجبني اسلوبك في الطرح وانا مغترب جديد عزابي مسكين خليت السودان اكتشفت اني رايح مرة واحدة.
عاوز اسألك بس ممكن استخدم الدقيق البر بس بدون ما اخلطو مع الابيض عشان انا عامل رجيم وعااوز استغني عن الدقيق الابيض دا مرة واحدة.
افيدينا يا استاذة وارحمينا الله يرحمك 😥😥😥
إعجابإعجاب
الأخ محمد، والله انا سعيدة جدا ان الموقع لاقى اعجباك، وان شاء الله تجرب وصفات تانية وتعجبك.. بالنسبة للقراصة بالبر، جربتها ما عجبتني، بتتفتفت عشان كده بتحتاح تضيف ليها شوية دقيق ابيض، أتمنى أكون جاوبتك
إعجابإعجاب
تسلم يداك سودانية اصيلة
إعجابإعجاب
طريقتك جميلة ممكن أعملها بالدقيق الأبيض بس ؟
إعجابإعجاب
ايوه يا وتين، ممكن بالدقيق الابيض.. اسمك جميل 🌷
إعجابإعجاب