صدور الدجاج مع جبنة البارميزان

صدور الدجاج بجبنة البارميزان.. الاكلة بتتقدم في المطاعم عادة وبكون من فوق للدجاج صوص حمرا زي حقت المكرونة وشوية جبنة موزيريلا ومعاها سباجيتي.. بوريكم الشكل ده بعدين لمن اعملها.. لكن ممكن عادي تتقدّم زي الدجاج بانيه زي ما احنا بنعمله ومافي فرق زاتو! … نجي للطريقة.. ومهم أنبّه انه لو ما عندك جبنة بارميزان، ممكن تستغني عنها

Chicken_parm_final

اول خطوه طبعا بنستخدم صدور الدجاج.. نقطع الشنب البجي معاها داك لانه مزعج.. ممكن تقطَعيه صغار وتعمليه مع الشوربة بتاعتك
Chicken_parm_1
بعداك ندخّل صدر الدجاج في كيس شفاف عشان ندقّه.. الكيس ميزته انه ما بوسّخ ليك الحته.. ولا الشاكوش البتستخدميه.. لو ما عندك شاكوش استخدمي يد الفندك او شاكوش ابو الشباب .. ما فارقه لأنك شغاله بالكيس
Chicken_parm_2
الهدف من الدق اننا عايزين الصدر يكون بسماكة واحده.. ما تنفعلي شديد في الضرب ما بحتاج .. الصدر لما يكون كله بسماكة واحده، بستوي كويس وبسرعة وبالتساوي
Chicken_parm_3
بعداك رصّي الصدور في صينية او صحن كبير.. واعملي ليها ملح وفلفل أسود من الجهتين.. عشان ما تطلع ليك مسيخة وبعداك ما تعرفي تعملي ليها شنو
Chicken_parm_4
بعداك ختّي ملعقة واااااحده بتاعت دقيق في مصفى.. ورشّيه في الصدور.. بعد تتأكدي انه كله اتغطي بطبقة رقيقة من الدقيق، اقلبيه وكرري نفس الشي.. الهدف من الدقيق انه يمتص الرطوبة في الصدور عشان لمن تغمّسيها في البيض، ما يتزلق من الصدور.. كل ما نكون عايزين نستعمل بقسمات وبيض، لازم نبدأ بالدقيق اول.. طريقة المصفى دي بتخليك ما تضّعي الدقيق ساي..
Chicken_parm_5
بعداك اكسري بيضتين او اكتر حسب الكمية بتاعتك.. تقريبا لكل تلاته صدور بيضة.. اعصري فيها حبة ليمون وملعقة كبيرة موية واضربيهم تمام.. الليمون بدّي طعم لزيز في التحمير بعدين.. المويه هدفها انه البياض والصفار يندمجوا تمام عشان ما يكونوا منفصلين.. موش مرات مهما تضربي البيض بكون في بياض براه كده
Chicken_parm_6
جهّزي البقسماط.. وابشري معاه جبنة بارميزان.. ما عندك، ما ضروري.. لو عندك بطلع اظرف.. البقسماط تقريبا نص كباية لكل صدرين دجاج، واعملي مع نص الكباية ده ملعقة بتاعت جبنة.. ما تعملي ملح ولا اي بهارات لو حتعملي بارميزان..
Chicken_parm_7
غمّسي الدجاج في البيض واتأكدي انه اتغمس كويس من كل الجهات.. اي حتة ناشفة مافيها بيض، ما حتمسك ليك بقسماط بعدين
Chicken_parm_8
اول حاجه ختي الدجاج في خليط البقسماط والجبنة.. وشيلي بي يدك ادفني الصدر..
Chicken_parm_9
طبطبي بي يدك تمام عشان البقسماط يمسك في الصدر..
Chicken_parm_10
بعداك ارفعيه لفوق عشان البقسماط الزايد ينزل.. احنا ما عايزين الزايد.. حيوسخ لينا الزيت ساي، والزايد اخير نستفيد منه في القطع التانية.. اقلبي القطعة عشان تعملي بقسماط في الجهة التانية.. وكرري نفس الشي.. خلي الدجاج بتاعك ينشف شوية عشان يطلع ليك مقرمش.. اديه زي تلت ساعة كده قبل ما تحمّريه
Chicken_parm_11
ما محتاج زيت غزير.. حبّة بس قدر ما يغطي الطوة.. وخليه يسخن كويس
Chicken_parm_12
بعداك ختي الدجاجة فيه وما تزحمي الطوه عشان الزيت ما يبرد والدجاج يشرب زيت.. بحسب حجم الطوة.. بالكتير اتنين
Chicken_parm_13
أوعك تخليه كتير في النار.. هدف الزيت كله انه ياخد لون.. احنا ما عايزين نسوّيه بالزيت.. حيتم سواه في الفرن… بعد ياخد اللون العايزاه.. رصّيه في الصحن ودخليه فرن حار بس عشرة دقايق.. لو خليتيه يستوي في الزيت.. حيبقى ليك زي الليف، ناشف..
Chicken_parm_final
ممكن تقطعيه اصغر وتحمّريه.. بس انا ما عجبني.. استوى طبعا لانه صغار وما احتاج يدخل الفرن.. واولادي انتهوا منه طوالي

Chicken_parm_14

للناس البحبو التجهيز من بدري، ممكن تصلي لحدي التحمير وتدخليه الفريزر بعداك يدخل الفرن طوالي.. او ممكن تدخليه الفريزر قبل التحمير.. انا بفضّل افرزنه قبل التحمير..
لازم خطوة الزيت يا آيات.. لانه الصدور مافيها دهن.. انت عشان تسوي حاجه في الفرن لازم يكون فيها دهن.. ممكن بدل الصدور تعمل أفخاذ .. في الأفخاذ المخلية من العضم.. بتتعمل ليك تمام
ده شكل الدجاج النهائي.. كان طري ولزيز شديد.. وتعليق ابو محمود انه بتقطع بالملعقة ما داير سكين زاتو.. وطبعا زي ما قلت، ممكن تدخلوا الدجاج الفرن يتم سواه من غير الجبنه.. انا عامله هنا جبنه موزريلا فريش عشان كده شكلها كور.. ورشيت شيدر عشان اللون بس..
Chicken_parm_15

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s