صدور الدجاج بجبنة البارميزان.. الاكلة بتتقدم في المطاعم عادة وبكون من فوق للدجاج صوص حمرا زي حقت المكرونة وشوية جبنة موزيريلا ومعاها سباجيتي.. بوريكم الشكل ده بعدين لمن اعملها.. لكن ممكن عادي تتقدّم زي الدجاج بانيه زي ما احنا بنعمله ومافي فرق زاتو! … نجي للطريقة.. ومهم أنبّه انه لو ما عندك جبنة بارميزان، ممكن تستغني عنها

بعداك ندخّل صدر الدجاج في كيس شفاف عشان ندقّه.. الكيس ميزته انه ما بوسّخ ليك الحته.. ولا الشاكوش البتستخدميه.. لو ما عندك شاكوش استخدمي يد الفندك او شاكوش ابو الشباب .. ما فارقه لأنك شغاله بالكيس

الهدف من الدق اننا عايزين الصدر يكون بسماكة واحده.. ما تنفعلي شديد في الضرب ما بحتاج .. الصدر لما يكون كله بسماكة واحده، بستوي كويس وبسرعة وبالتساوي

بعداك رصّي الصدور في صينية او صحن كبير.. واعملي ليها ملح وفلفل أسود من الجهتين.. عشان ما تطلع ليك مسيخة وبعداك ما تعرفي تعملي ليها شنو

بعداك ختّي ملعقة واااااحده بتاعت دقيق في مصفى.. ورشّيه في الصدور.. بعد تتأكدي انه كله اتغطي بطبقة رقيقة من الدقيق، اقلبيه وكرري نفس الشي.. الهدف من الدقيق انه يمتص الرطوبة في الصدور عشان لمن تغمّسيها في البيض، ما يتزلق من الصدور.. كل ما نكون عايزين نستعمل بقسمات وبيض، لازم نبدأ بالدقيق اول.. طريقة المصفى دي بتخليك ما تضّعي الدقيق ساي..

بعداك اكسري بيضتين او اكتر حسب الكمية بتاعتك.. تقريبا لكل تلاته صدور بيضة.. اعصري فيها حبة ليمون وملعقة كبيرة موية واضربيهم تمام.. الليمون بدّي طعم لزيز في التحمير بعدين.. المويه هدفها انه البياض والصفار يندمجوا تمام عشان ما يكونوا منفصلين.. موش مرات مهما تضربي البيض بكون في بياض براه كده

جهّزي البقسماط.. وابشري معاه جبنة بارميزان.. ما عندك، ما ضروري.. لو عندك بطلع اظرف.. البقسماط تقريبا نص كباية لكل صدرين دجاج، واعملي مع نص الكباية ده ملعقة بتاعت جبنة.. ما تعملي ملح ولا اي بهارات لو حتعملي بارميزان..

اول حاجه ختي الدجاج في خليط البقسماط والجبنة.. وشيلي بي يدك ادفني الصدر..

طبطبي بي يدك تمام عشان البقسماط يمسك في الصدر..

بعداك ارفعيه لفوق عشان البقسماط الزايد ينزل.. احنا ما عايزين الزايد.. حيوسخ لينا الزيت ساي، والزايد اخير نستفيد منه في القطع التانية.. اقلبي القطعة عشان تعملي بقسماط في الجهة التانية.. وكرري نفس الشي.. خلي الدجاج بتاعك ينشف شوية عشان يطلع ليك مقرمش.. اديه زي تلت ساعة كده قبل ما تحمّريه

ما محتاج زيت غزير.. حبّة بس قدر ما يغطي الطوة.. وخليه يسخن كويس

بعداك ختي الدجاجة فيه وما تزحمي الطوه عشان الزيت ما يبرد والدجاج يشرب زيت.. بحسب حجم الطوة.. بالكتير اتنين

أوعك تخليه كتير في النار.. هدف الزيت كله انه ياخد لون.. احنا ما عايزين نسوّيه بالزيت.. حيتم سواه في الفرن… بعد ياخد اللون العايزاه.. رصّيه في الصحن ودخليه فرن حار بس عشرة دقايق.. لو خليتيه يستوي في الزيت.. حيبقى ليك زي الليف، ناشف..

ممكن تقطعيه اصغر وتحمّريه.. بس انا ما عجبني.. استوى طبعا لانه صغار وما احتاج يدخل الفرن.. واولادي انتهوا منه طوالي