دمعة الدجاج (الجداد)

دمعة الدجاج (الجداد) .. كيف نسبّكها.. خطوة خطوة.. لي زمن عايزه انزلها، ده طبيخ بايت ليه كم يوم

اكبر فرق بين دمعة الدجاج ودمعة اللحمة انه الدجاج بطلّع موية كتيره.. وعشان تتسبك لينا تمام، حننتبه للحاجه دي..الفرق التاني في البهار.. والتسبيك يا حلوات يعني الطبيخ بتاعك كان كبيتيه في الصحن، ما بتسيل ليك منه مويه بالجنبه.. وكمان من فوق بطلع وش بتاع زيت.. بنتكلم عنه كله حسي

اول خطوة نقطع البصل.. انا ما قاعده اشتغل بحجم التقطيع كتير لانه بحب اخلطها بالمفراكة.. لكن لو بصل سمح ومات ليك ما ضروري تخلطيها.. كبي حبة زيت في النار ما تكتّري.. لانه الدجاج فيه دهن برضه.. قلبي البصل في الزيت تماااام وما تستعجلي عليه.. اديه نص ملعقة صغيرة ملح عشان يتحمر ليك سريع.. انا بحب اخليه يتحمر حبة كده.. نكهته بتطلع لزيزه

نظفي الدجاج بتاعك بس ما شديد.. شيلي الجلد منّه.. ما قاعده اغسله بي خل ولا ليمون ولا اي شي ده كله يبقيه مسيخ.. بالمويه ساي وخلاص..كبي الدجاج في البصل عشان الدهن الفيه يطلع مع البصله وعشان طعم البصلة يكون في الدجاج.. قلبيه شويه بس يبقى لونه ابيض.. وقطّعي ليك طماطمه تكون حمرا.. لو ما عندك ما ضروري.. قلبيهم كلهم سوا

بعد ده حنطفيه بي حبّة موية.. حبة لانه الدجاج بطلع موية زي ما قلنا.. والطماطم بتطلع مويه .. ده غير انه الدجاج بستوي سريع ما زي اللحمة.. فما عايزينه يتهرد.. اعملي ملعقة صغيرة كزبرة ناشفة وزيّها هبهان مسحون.. ديل اساسيات لدمعة الدجاج.. لازم هبهان مسحون.. وخليهم يغلوا سوا.. ما تغطي الحلة ما بحتاج

بعد شويه شوفي الدجاج لو نضج، طلّعيه من البصلة وكبي ملعقة كبيرة صلصة.. عايزين اللون يكون حلو… واخلطيها بالمفراكة اليدوية لو عايزه.. ورجّعيها النار.. ما ترجّعي الدجاج فيها لسه

لمن تشعري الدمعة بدت تتسبّك ومويتها قلّت، رجعي الدجاج فيها خليه يتسبّك معاها واهرسي تلاته فصوص توم كبار، وكبيهم فيها وارخي النار شديد في المرحلة دي وخلي الحلّة فاتحة.. بعد شويه الزيت الكبيناه للبصل قبييييل داك، حيبدا يظهر بي فوق ويعمل ليك وش.. لو شعرتي بيه كتير، قلليه