بروستد الدجاج.. ممكن يتعمل بالبقسماط وممكن بالدقيق ساي.. بس اهم شي انه يطلع مقرمش من برّه وطري وطاعم من جوّه ويكون مستوي كويس
اول شي نجهز الدجاج.. ولازم يكون بجلده.. مافي طريقة.. لو عملتيه من غير جلد، بطلع ناشف.. ممكن نستخدم قطع مختلفة او بس أفخاد.. الصدر لو حاولنا نستخدمه، لازم نكون حريصين جدا.. لانه بنشف بسهولة
الجناح ممكن نستعمله، بس انا بحب افصله.. بستخدم الجزء الفيه لحم.. والجزء الباقي بعمل بيه شوربة او مرقة
نجيب كيس نكب فيه دقيق وملح والبهارات البتحبيها.. انا عملته بابريكا وتوم بودره وبصل بودره.. ونتأكد انهم اندمجوا كلهم مع الدقيق.. الدقيق ما تكتري.. انا عملته كباية واحدة دقيق، كفت لي ٢ كيلو من قطع الدجاج
بعداك أبدي دخلي القطع جوه الكيس واقفليه بي يدك التانية.. وحركيه تمام
حرّكيه كويس خالص لحدي ما القطع تتغطى بالدقيق تماماً.. وطلعيها في صينية او صحن كبير
انا كنت عايزه اعمله بالبقسماط، لكن بصراحة كسّلته وقلت احمّره بالدقيق ساي.. لو عايزين بالبقسماط.. افقعي بيض، تقريبا تلاته بيضات وزيديهم ربع كباية موية واضربيهم تمام.. وغمسي في البيض بعداك البقسماط..
يلا نجي للتحمير.. التحمير لو بالزيت.. خلي زيتك حار.. الهدف من التحمير انه يدّي الدجاج لون حلو.. ويدينا القرمشة من برّه.. لكن لانه الجلد في الغالب بستوي شديد وبحرق، بنقوم نطلعه ونلقاه ما استوى من جوه..
عندك حل من اتنين.. اما انك تحمريه بالزيت لمن لونه يبقى حلو، وتطلعيه في صينية وتدخليه الفرن يكمل سوا.. او انك تحمّريه بالبريستو
التحمير بالبريستو، كنت مفكره اعمله، لكن البريستو حقتي كبيرة شديد وحتشيل زيت كتير.. وانا ما بستخدم زيت مرتين.. لكن بشرح ليكم الطريقة
كبي زيت كتييييير عشان قطع الدجاج تتغمر… وخلي الزيت يسخن.. ختي القطع فيه.. واقفلي البريستو تمام.. وارخي نارها.. خليها بالضبط ٩ دقايق.. بعد تفتحيها حيكون لونه حلو ومستوي تمام من جوه
بالنسبة للدجاج حقي، عملته في التيفال القلاية بدون زيت (اكتيفراي).. رصيته فيها بالدقيق بتاعه..
خلصته بدري شديد قبل العصر.. رصيته في صينية عشان يدخل الفرن بس يسخن للفطور
طلع لزيز ومقرمش.. ومن جوه طري خالص..
لاحظوا أديته رشه خفيفة بتاعت ملح بعد انتهى وهو حار..
انا استخدمته دي
مطبخ مريم الحسين 
مريم تسلم الايادي و شكرا ليك كتيير….طيب يقعد كم في الاكتفراي و بتختي فيه زيت ممكن تفاصيل اكتر عن طريقة عمله في الاكتفراي
إعجابإعجاب
اهلًا بيك يا رندا وشكرا على التعليق.. ابدا ما بتحتاج اي زيت في الاكتيفراي.. لانه كرعين الدجاج فيها دهن جواها.. كافي جدا انه يحمرها.. بالنسبة للمدة ما بتذكر بس راقبيها لحدي ما تاخد لون من فوق.. وبعداك اقلبيها.. لمن تتحمر من الجهتين معناها جاهزه.. طبعا بتتخت في الرف الفوق بتاع الاكتيفراي
إعجابإعجاب