تدميس الفول في البيت.. دي طريقتي بعد عذاب شديد مع شد الفول في البيت.. مرات يطلع قوي مرات اسود وكل مره يطلع كله قشرة.. بعداك اخيراً ظبطته.. الطريقة بشرحها خطوة خطوة بالصور
انا مستخدمة الدمّاسة.. لكن عادي ممكن تستخدموا البريستو.. بس انا عاجباني حركة يطلع الفول حار طوالي للصحن.. الدمّاسة دي رسلتها لي عمّة اولادي من تبوك.. اساسا هي مصرية، وبجي معاها عين كهرباء صغيرونه ونارها هادية.. لكن دي ما لقينا معاها العين..
اول خطوة غسلي الفول تمام بالموية وبلّيه من ستة لتمانية ساعات.. وكل ما تحسي الموية نقصت، زيديها…
الدمّاسة بتشيل نص كيلو فول، في منها احجام اكبر.. الفول وهو مبلول حبّته بتكبر وبتنفش لانه بشرب من الموية .. وببقى شكله كده
لمن تجي تشدّيه، صفّيه من مويه البل وكبيه في الدمّاسة.. اووووووعك تستخدمي موية البل نفسها في الشد.. ختي موية جديدة.. خلي الفول تقريبا لحدي تلت الدمّاسة.. وبعداك امليها لحدي تلاته ارباعها بالموية
انا لقيت روحي بلّيت كتير.. قمت الباقي ختيته في كيس ودخلته الفريزر.. عادي جدا بعداك بطلعه وبشده من غير بل
بعداك نبدأ نضيف الإضافات للفول… كل حاجه حنختها عندها هدف… اول حاجة حنضيف تلاته ملاعق عدس.. الهدف منها انها تتقل موية الفول.. عشان ما تكون مويه ساي .. ده غير اللون السمح
بعداك حنضيف بصله مقشرة ومغسلة… الهدف منها بس انها تدي الفول نكهة.. وممكن تختي توم او طماطمة.. دي كلها حاجات للنكهة
بعداك نضيف قشرة ليمونه.. دي بتديه لون.. وما بتخليه يسوّد.. ولا طعمه يبقى مُر
بعداك كبي نص ملعقة صغيرة كربونات… الفول بتاع السعودية ده قشرته سرّها باتع.. لكن الحركة دي بتحلّك منها
بعداك كبي ليه حبّة زيت.. الزيت الهدف منه انه يمنع الهوا يضرب الفول ويسوِّد لونه.. وبرضه بقلل ليك كتير من الدفّيق برّه الدمّاسة
خليها لمدة ساعتين.. اووووووعك تفتحيها قبل كده.. مهما كانت كمية الفول، اول ساعتين ما تفتحيه.. حقي ده لانه شويه، لمن فتحته بعد ساعتين كان خلاص استوى تمام.. ويذوب ذوبان.. لو ما كان استوى ومويته نقصت، بعد ساعتين أغلي موية وكبيها فيه… وارجعي شوفيه وزيدي موية عند الحاجة..
مريوم طبقته طريقة الفول المدمس بحلة البريستو بس طلعت المويه كثيره لكن شكلو وطعمو يجنن يعطيك العافيه يارب
إعجابإعجاب