المفاريك ١٠١… نبدأ ليكم بالبامية عشان اسهل واحده.. وبعداك لمن الم في خدره ولا سلج سمحات نتعلم المفروك الاخضر.. رغم اني زاتي ما حصل عملته قبل كده..
المفروك بشكل عام روحه الشوربة… لازم تكون طاعمة جدا.. واكتر شي بطعّم الشوربه انه لحمتك يكون فيها عضم.. واللحمة زاتها تكون كتيره.. اولادي بحبو لحمة المفروك.. اول خطوة تختي حلّتك في النار وتختي فيها اللحمة ساي من غير اي شي.. ومعاها رشة كزبرة.. انا بعمل كده عشان اخلص من الزفارة وما احتاج اطلّع الزبد بتاع اللحمة من الشوربه بعدين.. قلّبي لحدي ما اللحمة ما يكون فيها مويه وكلها يبقى لونها رمادي..
الخطوة البعدها اغمري لحمتك بي موية.. وقطعي فيها بصلتين متوسطات وأربعة فصوص توم.. ما تكتري البهارات لأنك بعدين حتعملي شبت.. حلو نختصر النكهات ونبرز نكهات معينة.. حركة اننا نخت نفس البهارات لكل الملاحات دي ممكن تخلي اكلنا كله طعم واحد… بعد ما الموية غمرت اللحمة واديتيها سوطه، اكبسيها بالبريستو او غطيها تلاته ارباع تغطيه بحلة عادية.. وخلي اللحمة تستوي كويس جدا
نجي نشرح موضوع البامية نفسه.. في فهم عام انه البامية الكبار هي بس البتنفع للملاح المفروك.. لكن الحقيقة اي بامية باي حجم بتنفع في المفروك.. لكن ما اي بامية بتنفع لطبيخ البامية.. طبيخ البامية بحتاج بامية لينه.. امسكي الباميايه بي اصابع واديها ضغطه.. لو لينه دي تنفع بامية طبيخ، لو قويه، مهما كان حجمها كبيره او صغيره، دي مفروك.. البامية المفروكة بنشيل راسها تماماً ما بنقمّعها زي البامية الطبيخ
بعداك غسّليها وختيها في مصفى عشان تخلص من مويتها.. ما تقلقي تقولي اللايوق حيروح.. لانه اللايوق بجي من البذور الجوه في البامية.. قطّعيها قطع صغار عشان ما تحتاج لوقت كتير في النار
بعد لحمتك تنجض.. جيبي حلّة تانية.. وشيلي ليك حوالي كباية ونص من الشوربة من غير اللحمة.. وكبيها في الحلة الفاضية.. ما تقلقي من كمية الشوربة مقابل كمية البامية.. دي بنظبّطها بعدين… بس مهم انه حسي كمية الشوربة تغمر البامية عشان هي الحتخلي البامية تستوي…
خلي الشوربة والبامية يفوروا سوا.. كبي ليها ملح ونص ملعقة صغيرة كربونات.. الهدف من الكربونات إننا تهرد البامية عشان تستوي وتكون لينه.. لما تكبي الكربونات حتلاحظي رغوه ظهرت.. ما مشكلة سوطي شويه وبتروح.. ده تفاعل الكربونات مع البامية.. ممكن تستخدمي عطرون/جردقة.. بعملوا نفس العمل.. بعد تحسي باميتك بقت لينه، أديها خلطه بسيطة بالخلاط اليدوي او العادي.. في الصورة دي البامية اتخلطت اكتر مما انا عادة بخلطها.. لاني تلقيت مساعده من صديق غالاط
بعداك رجعيها النار تاني وجيبي شبت (شمار اخضر) حشّيه.. مافي مقدار محدد.. حسب كيف بتحبوا الشبت.. في ناس ما بحبوه خالص.. ولو ما موجود عندك، اعملي شمار ناشف بتاع الفول.. بديها نكهة جميلة
ما تكبي الشبت بدري.. عايزينه اخضر.. البامية زاتها ما تخليها تقعد في النار كتير.. ببقى لونها مايل على بُني.. وما بتكون حلوه.. كبي ملعقة سمنه او زيت واهرسي ليك توم وختيهم سوا في طوه
اظبطي الملح والفلفل ورجعي اللحمة للبامية.. وشوفي قوامها مناسب ولا تقيل.. لو تقيل، زيدي من الشوربة العندك لحدي ما تصلي القوام المناسب.. لمن يبقى لون التوم على صفار كده.. كبيه في البامية .. ومعاها ديك يا الكسره ولا القراصة..
مطبخ مريم الحسين 
تسلم ايدك
إعجابإعجاب
جزاك الله خيرا
لكن عندي سؤال
البامية بتتقطع لي وما بتطلع لايوقة
يكون السبب شنو
ومشكورة
إعجابإعجاب
اهلًا بيك يا هدى، قاعده تعملي كربونات او جردقه؟ حاجة تساعد البامية تنضج سريع.. أظن انها ما بتبقى لايوقة لمن تستوي كويس.. والجواها يطلع في المويه.. اللايوق في البذور والقرن بتاع البامية.. ممكن تضيفي ويكة من عندك تتلايقيها… برضه كمية الشوربة لو كتيرة بتأثر، خلي الكمية شوية وزيدي لحدي ما تصلي القوام العايزاه
إعجابإعجاب
احلى حاجة فى وصفاتك،كلامك السوداني .احن مكان…….بلدى السودان
إعجابإعجاب
حلوه روحك دي والله.. تسلمي حبيبة
إعجابإعجاب
مساء الخير ببعجبني حسك في الطبخ
بسأل ممكن تتعمل الخضره باللحمة المفرومه ؟ ؟
وياريت توريني كيف؟ ؟
تسلم ايدك
انا ا ل مره عملت ملاح الباميه بطريقتك وطلعت مضبوووطه واقتنعت بطريقتك في الشرح سهله وعمليه
إعجابإعجاب
شكرا يا هزار على التعليق… وهنيئا ليكم البامية، تسلم ايدك… بالنسبة للخضرة المفروكة باللحمة المفرومة.. أيوه ممكنه وانا بحبها جداً كده.. طبعا الخضرة الطبيخ ما اعتقد تطلع حلوه باللحمة المفرومة… ان شاء الله قريب انزل ليكم طريقة الخضرة المفروكة باللحمة المفرومة… 🙂
إعجابإعجاب
حبيتك شديد وصفك ممتاز …حاعمل البامية المفروكة للمرة الاولى بوصفتك دي. يديك العافية ويخلي ليك الصديق الغالاط 🙂
إعجابإعجاب
شكرا يا نسرين ومرحب بيك… سعيدة جدا بيك وبي تعليقاتك 🌷
إعجابإعجاب
يمكن الاستغناء عن البيكربونات؟ بتبهدلني في معدتي لو خشت اي اكل هي والجردقة وانا اساسا في غربة ونفسي هفتني هسي اعملها
إعجابإعجاب
الف سلامة عليك يا هند.. ما تشوفي شر ان شاء الله.. ايوه ممكن بس ما حتطلع ليك خضراء حتكون لونها اغبش شوية.. لانها حتقعد في النار كتير.. بس ما يأثر على الطعم… شفتي الفيديو في القناة؟ هدا الرابط.. ورمضان كريم 😊
إعجابإعجاب