طريقة الباسطة زي ما عملتها امس، والتعديلات الحأعدلها في المره الجاية.. النتيجة جميلة شديد..
اول حاجة احب اشكر كل الشاركوا بأفكارهم وأراهم ونصايحهم.. لولاهم ما طلعت لزيزه كده..
اول حاجة بنجيب الجلاش (القلاش).. المرة دي قررت اجرّب ماركة تانية.. لقيت ماركة محليّة اسمها الكرامة
القلاش بحتاج طريقة معينة للتسييح.. اول حاجة نزليه من الفريزر وختيه في التلاجة لمدة ٨ ساعات.. بعداك تطلعيه قبل الاستخدام بساعتين.. كده بكون متماسك وما بتفتفت
جهّزي الحشوة.. جيبي فول سوداني محمّص، لو ما محمّص حمصية عشان المويه الفيه تطلع وطعمه يتركز.. لو ما فيه ملح، اعملي فيه شوية ملح .. واطحنيه صغااااااااار.. اعملي معاه شيرة وخليه جاهز جنبك.. واعملي حسابك الكمية تكفّي لطبقتين بتاعت حشو
نجهّز برضه السمنة.. انا عملته سمنتي بتاعت البيت، كان فاضلة منها شويه.. وصفتها بتلقوها هنا
لخبطته معاها سمنة قاعده اجيبها طوالي، اسمها “اصلي كهي” والله جاده انا، هدي صورتها.. وجد ريحتها حلوه شديد وعملته معاها تلاته ملاعق زيت.. بتحتاجي تقريبا كوب سمنة مع الزيت
استخدمي فرشة عشان تمسحي القلاش، لو ما عندك اتحملي عوارة السمنة في يدّك.. ممكن بي قفا ملعقة .. لكن ما بتوزّع ليك كويس
اول حاجه امسحي السمنة في الصينية بتاعتك.. امسحي الجوانب برضه… بعداك ختي اول ورقة قلاّش
القلاش بتاعي حجمه اكبر من حجم الصينية.. ما مشكلة ممكن تتني الأطراف لجوه الصينية.. بس المره الجاية حأجيب صينية تكون قدره.. اظن حتكون احسن واظبط.. قبل ما تنزل الأطراف الزايده لي جوه، امسحي الورقة من النص، لمن تنزلي الزايد حتثبت ليك وتقدري تمسحيها تمام وما حتتحرك ليك
استمري لحدي ما تنتهي من المجموعة الاولى… اعملي فيها طبقة حشوة.. واتأكدي انها مغطية المساحة كلها.. خلي الطبقة تكون رقيقة ما تكون سميكة..
بعداك أبدي ختي القلاش من المجموعة التانية وامسحي كل ورقة بالسمنة.. لحدي ما تتمي المجموعة التانية وتعملي طبقة الحشوة.. وآخر شي تعملي القلاش من المجموعة التالتة.. لحدي ما تنتهي الكمية.. بقوة اضغطي على الباسطة تمام بيدّك.. وقطّعيها بحرص.. ثبتي بي يدك وانت بتقطعي
انا ضربته كباية حليب مع بيضة ونقاط فانيليا عشان تشيل زفارة البيضة.. وسقّيت بيها الباسطة.. لكن المره الجايه حاعمل حليب بس.. البيضة شعرته بيها غيّرت شكل الباسطة من فوق وبقيت زي الكيكة كده.. اعتقد الحليب كافي براه.. بخليها مبلول من جوه
سقّيها تمام، والتقطيع حيخلي الحليب ينزل جوه.. غطّي الباسطة ودخّليها التلاجة اقل شي ساعة
ولّعي فرنك على درجة حرارة ١٨٠، ودخلي الباسطة بدون ما تغطيها.. بتاخد تقريبا تلت ساعة-٢٥ دقيقة لانها بارده.. الفرن طبعا بتولعيه من تحت بس.. لمن تستوي، ولعيه من فوق عشان تاخد لون
اول ما تتحمص ليك تمام.. طلعيها وكبي عليها الشيرة وغطيها.. حتكون من فوق برضه ناشفه.. حنشتغل عليها عشان تبقى طرية.. انا استخدمت الفركتوز.. لكن ممكن تستخدمي الشيرة العادية
حتحتاجي تقطّعيها تاني لانه القطيع داك بكون اختفى
بعد ربع ساعة كده، تاني كبي من الشيرة فوق ليها.. حتلقي الشيرة ديك راحت.. بعد تبرد، أغلي ليك حبة مويه وكبيها من فوقها وغطيها.. المويه هدفها تخلي الشيرة سائلة شويه.. وتخلي ليك الطبقة الفوق لينة..
مطبخ مريم الحسين 