ملاح الروب الأبيض، الطريقة الماهلة

بكره عامله ملاح روب ابيض في الفطور.. قلت فرصة انزل طريقته الماهله.. قبل كده نزلته طريقته السريعة.. حأبدا من حسي عشان العايزه تعمله معاي تبدأ معاي.. طبعا الاسطوات الكبار ما محتاجين، الوصف ده للعروسات والعزّابة

اول حاجه جيبوا تلاته كبايات زبادي.. واعملوا معاهم ملعقتين كبار لبنه.. اللبنه بتديه قوام ونعومة كده.. وبتقلل كمية الدقيق الحنضيفها بعدين

كبَّوا فيهم ملعقة ونص صغيرة ملح، عشان الملاح ده بدور الملح.. بنخت الملح بدري عشان يطلَّع الموية من البصل والتوم بعدين لمن نضيفهم.. واحنا عايزين نكهة البصل والتوم تكون ظااااهره في الزبادي… سوطي الزبادي شديد مع الملح عشان الملح يذوب، والزبادي يبقى ناعم ومتجانس.. بدون اي أسباب، بس بحب شكله كده

جيبي نص بصله متوسطة، كان بصلك نكهته قوية زي العندي الايام دي.. وجرّحيها، لكن خليها متماسكة ما تتفك ليك.. لأننا حنطلعها في مرحلة من المراحل ما عايزنها تعزّبنا

جيبي تلاته فصوص توم، قشّريها وجرّحيها مع المحافظة على تماسكها..

ارمي البصلة والتومات في الزبادي ومعاهم فلفل اسود، لو عندك فلفل ابيض احلى.. ولو عندك قرن شطة ما اتمقلبتي زيي، أرميه فيهم ..

سوطي الحاجات دي سوا، سوطه حنينه كده بس تغتس كلها جوه الزبادي

شيلي جردلك دخليه التلاجة.. الليلة دخّلتكم تلاجتي.. خليه أطول فترة ممكنة.. حسي عندنا الساعة ٢ صباحا، حأخليه كده لحدي الساعة ٦:٠٠ مساء بتوقيتنا، احنا بنفطر ٦:٣٥..

الكمية دي ما شويه.. مناسبة جدا.. انا الملاح ده ما بحبه يفضّل خالص.. ما حلو لمن يقعد ويتسخّن تاني.. ببقى تقيل كده.. بحب اعمله قدر الاكله ويكمل.. دبّلوا الكمية دي حسب العدد العندكم..

يلا يا حلوات، طلعوا الزبادي من التلاجة.. خلوه يدفا شويه.. عشان الحاجة دي مهمة للخطوة الجاية .. لاحظوا الفلفل الأسود اندمج كيف في الزبادي.. وريحة البصل والتوم تفحفح..

كبي الزبادي كله في حله بي بصلته وتومته.. وخلي شويييييه، كبي معاها ملعقة واحده بتاعت دقيق.. سوطيها مع الشويه الفضلت دي، وكبيهم مع الزبادي… وسوطي.. ده كله ما ولعنا النار..

ارفعي الحلة على النار تكون متوسطة.. وسوطي كل شويه… عايزين في المرحلة دي الدقيق يستوي.. والبصلة تتسلق بالزبادي

ما تستعجلي عليه… ارخي نارك وحرّكي كل شويه… الدقيق لو ما كنت اضفتيه بدري، كان الزبادي اتفصل وبقى فيه مويه… عشان مويه البصل الفيه… لكن الدقيق بخليه يتماسك ويبقى قوامه جميل.. استمري لمن تشعري البصلة بقت لينه كده… وكبي ليك حببببببة بتاعت ويكة…لو ما عايزه الويكه، زوّدي كمية الدقيق خليها ملعقتين.. وحرّكي خلي الويكة تندمج وتستوي…