شوربة طماطم

شوربة الطماطم، جميلة شديد وساهله جدا.. ما عايزه جهد.. قاعده اعملها لمن اكون عازمه ضيوف لانها راقية وغريبة.. وما حصل فضّلت، الناس بتاكل منها مره واتنين وتلاته لحدي ما تكمل..

الشوربة دي لزيزه على عكس ما تتوقعوا.. اول شي ختي شوية زيت في الحلة.. ممكن زيت زيتون او اي زيت نباتي.. نكهة زيت الزيتون احلى.. قطعي ليك بصلة واحده شرايح تقلبيها في الزيت لحدي ما تذبل شويه بس وتبقى شفافه.. ما تحمّريها

قطعي ليك فصين توم وقلّبيهم في الزيت شويه بس.. ما تخليهم يحمّروا

كبّي فيها شوربة دجاج.. جيبي قطع بتاعت دجاج واسلقيها مع كزبرة ناشفة.. واستخدميها… انا عملته كده وطلعته الدجاج فرمته مع مايونيز وملح وتوم وعملته ساندوتشات مثلثة مع الخس.. .. لو ما عندك دجاج، كبي مويه وعود قرفة مافي اي مشكلة.. لو بتسخدموا ماجي، اعملي مكعبين مع المويه

خلي البصل والتوم يغلوا شويه في السائل .. ما تهتمي لشكلهم حسي لأننا حنخلطهم في كل الأحوال

كبي علبة كبيرة طماطم مقطّعة.. او علبتين صغار… او طماطم حمرا عندك في التلاجة.. انا بستخدم العلب لانها دايما بتكون حمرا.. ويستخدم عادة حقت قودي لانها مختلفة عن كل الأنواع التانية… دي علبة طماطم مقطّعة ما صلصة..

كبي ملعقة صغيرة ملح، ونص ملعقة سكر مبدئيا، وملعقة صغيرة بابريكا، لو ما عندك ارمي فيها فلفلة خضرا وبعدين بنطلعها واعملي معاها نص ملعقة صغيرة شطة حمرا.. ما عايزين تكون مشطشطة.. عايزنها حرارة خفيفة كده بس تدفّي الحلق

بعداك ارمي ملعقتين كبار رز مصري.. ما تكتري.. عايزينه يغلي معاهم، بعد يستوي ونخلط الشوربة بديها قوام حريري وجميل

بعداك خلي الخليط كله يغلي على نار متوسطة.. لو ظهر ليك رغوة اقشطيها.. بعد يغلي، ارخي النار شديد وخليها .. ما تستعجلي عليها.. كل ما قعدت في النار كل ما راحت حموضة الطماطم.. احنا ما عايزنها تكون حامضة

بعداك، اخلطيها بي خلاطك اليدوي، لو ما عندك بالخلاط العادي.. المهم اخلطيها خلطة محترمة لمن تبقى ناعمة.. الرز بخلي لونها يفتح شويه..

ممكن بعد ده تخليها وتجي تتميها قريب الفطور.. لانها ما عايزه شي كتير.. نرجعها النار واول ما تسخن شويه نكب ليها ملعقتين كريمة.. بتخليها غنية .. ما عندك، اعملي ملعقتين قشطة بس على شرط تكبيها في كوره وتضربيها بي الشوكة مع شويه من الشوربة.. حتى تكبيها في باقي الشوربة.. ما عندك قشطة، حبة حليب برضه ممكن..