بطاطس بالكريمة

وصفة مرّاقة، مناسبة لمن يكون عندك عزومة فيها ناس كتار.. ولزيزه وراقية وساهلة.. مشكلتها الوحيدة انها محتاجة انك تستخدمي قطّاعة عشان تقطّعي البطاطس رفيع عشان ما ياخد زمن يستوي في الفرن… بطاطس بالكريمة

اول حاجة بنجيب البطاطس.. ونقشّره ونقطعه شرايح رفيعة جدا.. حاوريكم خيارات نقطّع بيها.. الهدف من التقطيع الرفيع انه البطاطس ما ياخد زمن لحدي ما يستوي..

لو عندك قطّاعة كهرباء زي دي، تكون امورك تمام.. سريعة وبتطلع ليك النتيجة مرضية.. طبعا في ماركات واشكال كتيرة.. دي مجرّد مثال .. العندي ماركة بوش، مع العجّانة..

لو ما عندك.. ممكن الماندلين.. آلة يدوية وسريعة..

لو ما عندك، المبشرة فيها مرات جزء لتقطيع الشرايح.. زي دي كده .. بالجنبة

لو ما عندك، ممكن بقشارة الخضار زاتها تعملي

بعد ما قطعتي البطاطس شرايح.. رصّيهم في صينية تدخل الفرن، على مستوى واحد..

قطعي ليك بصلة واحدة متوسطة.. ومعاها فلفلة اي لون.. ما مشكلة..قلبيهم في حبة زيت لحدي ما البصل يبقى دبلان كده..

رشّي حبة ملح فوق للبطاطس. وكبي من فوق ليه البصل والفلفل.. ووزعيهم.. لاحظوا الكمية بتاعت البصل والفلفل قليلة.. لانه الهدف انهم ينكّهوا الاكلة

جيبي الكريمة، كبّيها في حاجة واهرسي ليك تلاته فصوص كبار بتاعت توم وملح وفلفل اسود.. لو عندك وقت، خلي مزيج الكريمة ده لليوم التاني حتى تستخدميه.. لو ما عندك وقت ما مشكلة…

لو ما عندك كريمة، سيّحي تلت كباية زبدة وكبيها في تلاته ارباع كباية حليب.. دي بتعمل ليك كباية كريمة

لو ما عندك كريمة، ما متأكده تطلع ليك نفس الطعم بالقشطة.. لكن ممكن تجربوا.. بس خففيها بالحليب عشان قوامها يطلع سائل .. كبي الكريمة فوق للبطاطس.. ووزعيها كويس..

دخليها الفرن.. بتاخد ليها تقريبا نص ساعة.. حسب سُمك البطاطس.. لاحظوا البطاطس ني.. وعايزين ننجضوا في الكريمة.. اول ما لون الكريمة بي فوق يصفر، كده خلاص… اتاكدي انه البطاطس استوى.. بعد تبرد حبة بتبقى متماسكة… طعمها خرافي.. دسمة شديد .. لكن لزيزة شديد