كيكة الشوكولاته

صباحكم شوكولاته.. الكيكة دي قاعده اعملها لما يكونوا جايني ناس سبيشال.. لانه شكلها راقي وبعملها كتير لاولادي لأنهم بحبوا كيك الشوكولاته.. ميزتها عن اي وصفة تانية لقيتها (ما عدا كيكة المق حَقَّت صفّوية) أنها طريه جدا وما بتنشف اصلها.. طبعا الوصفة تطبيقي، أخدتها من موقع شيف أمريكي قاعده اتابع حاجاته دايما..

طبعا الكيكة عادة بتطلع اجمل من كده بكتير … امس اتمقلبته مع البخاخ البستخدمه البخلي الأكل ما يلصق، لقيته انتهى.. قام جزء من الكيكة ما اتفكّ.. رغم اني عملته ليها زبده… لكن برضه بنزّل طريقتها..

شيف جون قال الكيكة دي شدّت ما ساهله ونتائجها مضمونة، لو زول عملها وما نجحت ليه حقّو يخلي المطبخ خالص … اول حاجه المكونات الجافة في كوره غريقة.. وكله بالأكواب المعيارية يا حلوات.. كوبين دقيق كوب وتلاته ارباع كوب سكر وملعقة صغيرة ونص ملعقة بيكربونات الصودا.. طبعا الكاكاو لانه تقيل دايما بنعمل ليه كربونات الصودا ما باكينج باودر.. بي مضرب البيض حرّكي المكونات كويس عشان تندمج مع بعضها

بعداك في حلّة في النار، كبّي ٢٢٦جرام زبده .. طبعا لورباك عندهم ٢٠٠ جرام وعندهم خمسين جرام، ختي ٢٠٠ وبعداك اقسمي الخمسين بالنص كده بتظبطي المقدار، ولو عندك ميزان الاكل تكوني ريّحتي روحك.. الرقم طلع غريب عشان التحويل من مقادير الأمريكان المقلبنه دي … اها مع الزبده كبي كباية موية وتلت كباية كاكاو.. كاكاو من غير سكر .. كاكاو مر ما شوكولاته انتبهوا يا حلوات.. ارفعيهم على نار هادية وسوطي لحدي ما الزبدة تسيح وتندمج المكونات سوا

بعداك خليها تدفأ شويه.. وكبي نص الكمية في الدقيق وحرّكي بمضرب البيض.. لحدي ما يبقى صعب الحركة، بعداك كبي باقي المقدار وحرّكي لحدي ما تندمج كل المكونات سوا..

بعداك جيبي بيضتين.. اكسري واحده وحرّكي لحدي ما تندمج، وتاني اكسري التانية وحرّكي لحدي ما تندمج.. وكبي معاهم معلقة كبيرة فانيليا.. الكيكة كده حلوه وممكن تدخل الفرن، لكن حنضيف مكون أخير مهم جدا

كبي نص كباية زبادي.. ده السر في طراوة الكيكة دي.. الزبادي بالجد بخليها طريه جدا… الوصفة الأصلية بتستخدم sour cream لكن كتير ما بكون عندي في البيت، بقوم اعمل الزبادي وبتطلع لزيز شديد.. حرّكي الزبادي لحدي ما تتجانس المكونات سوا.. المسافة دي فرنك شغاااااال وحار عليكم الله

يلا جهّزي القالب الحتعملي فيه الكيكة… انا غايته عادة بعمل بخاخ مانع للالتصاق، بس زي ما قلته اتمقلبته.. عملته زبده بي طريقة واحده ظريفة هنا في القروب بس للأسف ما متذكره اسمها.. بتمسح الزبده الباقية في غلاف الزبده.. بس الظاهر انا غلطته ما مسحته كويس.. هو بتي في اللحظة دي لخمتني بحاجه غايته

كبي الخليط في القالب.. وبتطلع لزيزه لو القالب النوع العنده فتحه في النص.. سيد الوصفة بقول انها عامله زي دونات شوكولاته عملاق.. بس برضه ما شرط أساسي ممكن قالب عادي

دخليها الفرن على درجة حرارة ١٨٠، بتاخد تقريبا ٤٠ دقيقة.. واعملوا حسابكم، كيكة الشوكولاته ما بظهر فيها انها استوت زي الكيك العادي.. وممكن عادي تخليها اكتر من الوقت المطلوب وتبقى ليك ناشفه.. بعد تمر نص ساعه اغرسي ليك سكّينة، لو مرقت نضيفه معناها خلاص انتهت.. لو فيها عجين اقفلي الفرن وخليها تواصل سوا

بعد تمرق من الفرن.. خليها ربع ساعة تبرد قبل ما تحاولي تقلبيها.. لو استعجلتي قلبتيها وهي حاره ممكن تتقطع ليك.. ودي قاعده عامه في كل الكيك.. بعد تقلبيها خليها تبرد تماماً وأبدي جهّزي الصوص بتاعها… ١١٣ جرام شوكولاته نصف محلاه.. يعني ما مسكّرة وما مسيخة.. الشوكولاته الزي دي بتتباع بلوكات احسبي الوزن بتاع البلوكه الصغيرة وقُدّري.. ما تقولي ما عندي ميزان، اتصرّفي.. بي سكين قطعي الشوكولاته بتتقطع ليك ساهل بي اي سكين.. سخّني ليك نص كوب كريمه وكبيها في الشوكولاته..وخليهم سوا شويه كده عشان الشوكولاته تذوب