أجنحة الدجاج بصوص الباربكيو… زي حقت المطاعم… ولزيزه وساهلة
الاكلة دي لزيزه جدا وساهله ورخيصة.. يعني عندنا الصحن بتاع الأجنحة فيه تقريبا ١٦ جناح بي ٤ ريال!! ومن سهولتها لمن حتستخسروا القروش الكنتو بتدفعوها لمطاعم البيتزا .. ويدّوكم اربعة قطع بس!
أول خطوة إننا نجهز الأجنحة..الجناح الواحد ممكن ينقسم لتلاته اجزاء.. الجزء الاول بشبه الفخدة بتاعت الدجاج لكن صغيروني، الجزء التاني عبارة عن عضمتين ملصقات جنب بعض، والجزء التالت قطعة طايره صغيرونه كده.. بين كل قطعة والتانية في مفصل، بالسكين بتتقطع..
للاكلة دي حنستخدم القطعة الاولى والتانية.. القطعة التالتة الصغيرة ما حنستخدمها، لكن ما ترموها، اعملوا منها شوربة او مرقة دجاج، والقطع بعد تطلع نكهتها ممكن تصفّوها وترموها.. الصورة بتوريكم القطع الحنستعملها في الوصفة.
بعداك، جيبي كيس، كبّي فيه كباية دقيق وملح وفلفل توم بودره وبابريكا .. وحبة قرفة لو حابة.. مسألة طعم بس.. خليهم في الكيس وحرّكيهم تمام اتأكدي انهم اندمجوا تماماً
بعداك كبي قطعك بتاعت الدجاج جوه الكيس.. ميزة طريقة الكيس دي انه مافي وسخ ولا زحمة.. يدّك زاتها ما بتتوسخ.. تقدري تختي قطع كتيره جوه الكيس حسب حجم الكيس وحسب كمية الدقيق الكبيتها… اتأكدي انه القطع اتغطت بتتبيلة الدقيق والبهارات تماماً.. بعداك انفضي كل قطعة براها من الدقيق ورصيها كلها في صينية تدخل الفرن.. خلي الصينية تكون مدهونه بشوية زيت عشان ما يتلصق ليك
الصينية بتاعت الفرن ممكن تشيل ليك الكمية كلها.. طبعا لازم تكوني مولعة فرنك حار قبل ما تبدي الشغل
دخلي الصينية الفرن.. وخليها على النار العالية زي تقريبا نص ساعة.. ولعّي فرنك من تحت بس ما بحتاج تولعي الفوق.. بعد نص ساعة، شكلها حتكون كده… ما تخافي، طلعيها واقلبي القطع
دخلي الصينية تاني في الفرن واديها نص ساعة.. حيطلع ليك شكلها كده، كأنك محمّراها في الزيت… التفسير بسيط جدا، الأجنحة فيها دهن جواها، لما تتعرض لحرارة الدهن ده بسخن وبطبخ التتبيلة كانك حمّرتيها
ممكن عادي تاكلوها كده، لزيزة وهشّة وطاعمة وما ناقصها اي شي كأنك عملتي دجاج محمر بي طريقتك العادية
وممكن لو عايزاها زي حقت مطاعم البيتزا، تعملي ليها صوص الباربكيو.. تشتريها جاهزة من اي سوبرماركت.. وتكبي منها شويه في كوره وتقلبي فيها الأجنحة وهي حارة عشان تمتصاها.. بس ما تغرّقيها
طبعا الصوص دي فيها شويه حلاوة كده، لو ما متعودين على طعمها يمكن ما تعجبكم..
ممكن بدلها تجربي صوص تانية مخصوصة لأجنحة الدجاج… بس اعملوا حسابكم في منها نوع فيه شطة.. ونوع عادي… وفي كل الاحوال ما تغرقوا الاجنحة بالصوص..
مطبخ مريم الحسين 
السلام عليكم..لوسمحتي في جداد كان اكلتو في بيتزا هت مقرمش كدا وفي نفس الوقت فيهو صوص ابيض ..اظن صوص توم لو عندك فكرة كيف ممكن اعملو واكون مشكورة ليييك
إعجابإعجاب
اهلا يا هالة … بخصوص الصوص الابيض، دي غالبا رانش صوص.. انا بعمل شي قريب منها.. عباره عن كوب زبادي ومعاه ملعقة كبيرة مايونيز وملعقة صغيرة خل وملعقة صغيرة سكر ونص ملعقة صغيرة ملح وربعة ملعقة صغيرة فلفل اسود، عصرة ليمونه ومعاها ملعقة صغيرة توم بودره وملعقة صغيرة بصل بودره.. ان شاء الله تعجبك
إعجابإعجاب