كفته الدجاج… فكرتها ظريفة وطعمها حلو وساهله جدا.. لقطته الوصفة من امّي الله يديها العافية كانت زمان بتعملها لينا.. دي اول مره اعملها لاولادي
اول حاجه بنجيب صدور دجاج ونسلقها… اي جزء تاني من الدجاجة ما بنفع لانه بكون فيه نسبة دهون، ما زي الصدور.. نسلق الصدور في مويه فيها ملح وهبهان وقرفه وحبة كزبرة عشان الزفارة.. الموية احتفظي بيها واستخدميها في ملاح او شوربه.. واحتفظي بالصدور عشان الكفته.. انا كان عندي باقي صدور مقطعة سلقتها
بعداك افرمي الصدور دي باي طريقة تحبيها، المهم تفرميها ناعم تكون زي العجينة كده… انا فرمتها بي بتاعت براون الزي دي
خلي الدجاج على جنب، وأبدي اعملي حاجه زي البشاميل كده، لكن تقيييييله زي العجينة.. تجيبي حلّتك وتكبي فيها حبة زيت، قولي ملعقة كبيرة.. وكبي معاها تلاته ملاعق دقيق.. لو دايره كمية اكتر دبّلي النسبة دي… سوطي الدقيق في الزيت على نار هادية لحدي ما ينضج ..
زحي الحلة من النار وكبي حببببة حليب وحرّكي سريع.. لو لسه تقيل تاني كبي شويه.. لحدي ما تصلي لعجينة زي دي كده
خليها تدفأ شويه وكبيها مع الدجاج داك.. وزيدي ليهم ملح وبهارات وعجنيهم سوا بي يدك.. انا كبيت ملح وفلفل وتوم بودره وبابريكا..
ما تكبي العجين كله… كبي الكمية بحيث ما تطغى على كمية الدجاج.. عشان طعم الدجاج ما يروح منك.. ولو فضل ليك باقي، زيي كده.. ختيه في حاجه ودخليه التلاجة.. يومكم التهف ليكم مكرونة بي البشميل ختيه في النار وزيديه حليب حار وحركي سريع.. بشميلك جاهز
ضوقي كفتتك.. كله نجيض في نجيض.. اتاكدي من الطعم وبعداك افقعي ليك فيها بيضة.. لو حسيتيها لينه شديد، زيدي من عجينتك بتاعت البشميل
بعداك شكّليها.. ماما كانت بتحب تعملها قصار ومدغلبه عشان تميّزها من كفتة اللحمة.. وبطلع شكلها فعلا مميز.. رصيها في صينية ودخليها التلاجة نص ساعة تتماسك
لما وصلت المرحلة دي اتلخبطه.. نسيت ماما كانت بتحمرها كيف وما كان الوقت مناسب اتصل بيها اسألها.. فقررت اجرب التلاته طرق الفي بالي
الطريقة الاولى.. حمّرتها ساي مباشرة من الصينية للزيت… ما عملته ليها اي إضافات.. طلع لونها حلو شديد.. لاحظوا احنا بس عايزين البيضة ديك تنجض والكفته تاخد لون لانها نجيضة تماماً..
الطريقة التانية، جبته لي بيضه كبيت فيها حبة مويه وملح وضربتها تمام وغمّسته فيها الكفته…
ومن هنا كان في خيارين.. الخيار الاول، غطيتها بي بقسمات عادي.. ألهو العيش الناشف ومدقوق…
غطيتها تمام بيه وحمرتها في الزيت… طلع شكلها ما بختلف كتير عن الطريقة الاولى..
الطريقة التالتة، غمّستها في بقسماط ياباني اسمه بانكو.. قاعده استخدمه كتير.. وهو زي عيش ناشف لكن ما مسحون شديد.. بقوم يعمل قرمشة شديدة بعد التحمير..
شكلها طلع جميل جدا ومقرمش جدا من بره.. واتحمرت تحمير ظريف شديد… وطعمها روعه
الطريقة الاولى المن غير ولا شي برضها طلعت ظريفة.. لكن ترتيبي من الأفضل للاقل.. حأقول اول شي البي بانكو.. تاني شي تحمير ساي تالت شي بالبقسماط..قدمتها مع كتشاب وصوص مايونيز مع مسطرد وعسل، وآخر شي لبنه.. وجنبهم صحن كبير شيبس.. وسلطة… واتغدينا بمزاج انا واولادي
مطبخ مريم الحسين 