سمنة فك الحيرة

سمنة فك الحيرة… طعمها وريحتها زي السمنة البلدية.. ولا بتشبه السمنة البتجيبيها من السوق.. علّمتني ليها خالة زوجي… وعملتها لي عشان لو عايزه أكب في وش الملاح ولا المديدة.. او اي شي خفيف زي كده.. عملتها امس فشلت فشلاً ذريعاً، بوريكم ليه بعدين.. عملتها الليلة الصباح اتظبطت.. عايزاها للشعيرية البيضاء الطلبته وصفتها، عاملاها في فطور واداه لجارتي معاها نسيبتها..

اول خطوة بنجيب زبدة لورباك.. زبدة غير مملحة.. ما عارفه الماركات التانية بتظبط كيف ولا طعمها بكون كيف.. لكن دي العملوها لي المره الاولى ومسكته فيها… عملته هنا ٤٠٠ جرام، انت على كيفك حسب الكمية المحتاجاها..

قطّعي الزبدة عشان ما تتأخر ليك في انها تسيح.. وختي حلّة تكون تقيلة في نار متوسطة.. قبل ما تختي الزبدة في الحلة، خلي الحلّة تسخّن شويه ما كتير..

ختي القطع كلها في الحلّة وحرّكي الحلة عشان الزبدة تسيح. الحلّة حاره طوالي الزبدة حتسيح ليك..

بعد تسيح كده لنصّها، ارخي النار عشان ما تتحرق ليك

أوعك تمشي تخليها.. صحي نارك هادية، لكن في لحظة ممكن تحرق.. وده الحصل لي امس .. جيت لقيتها سودااااا .. افضلي كل شويه حرّكي الحلة لحدي ما تذوب الزبدة كلها… بعد تذوب كبي ليها ملعقتين كبار زبادي ومعاه كم حبة هبهان

بعد تسيح وتجقجق في النار، بتعمل رغوة.. الرغوة دي بقايا الحليب الفي الزبدة.. احنا ما عايزينها… ممكن بي ملعقة تقشطيها وترميها.. وممكن تخليها بعدين تتصفّى.. الفترة دي بننتظر لانه الزبدة فيها مويه طبعا واحنا عايزين الموية تتبخّر..

حاليا، السائل بكون لونه اصفر وريحته بتكون ريحة زبده.. خليه في النار واصبري عليه.. لحدي ما لونه يبقى شفاف.. ممكن يكون شفاف لكن لسه ريحته ريحة زبده ما تستعجلي عليها