وصفتين بالملفوف

جبته لي ملفوفة صغيرونة وعملت بيها الوصفتين ديل، طلعوا لزيزات جدا

اول حاجه قبل ما اعمل اي شي.. شلته الورق البي بره من الملفوفه وغسلتها بي المويه، وبالفودبروسسور قطعها كلّها صغار .. وقطّعته معاها جزر وفلفل اخضر، كلهم بنفس الحجم

نجي نبدأ بالوصفة الاولى، سلطة كنتاكي.. اول الcoleslaw .. السلطة دي جميلة جدا مع الدجاج المحمّر زي ما انتو عارفين.. وساهله جدا.. اول حاجه نعمل التتبيلة… حسب كمية الملفوف، بنعمل تقريبا اربعة ملاعق مايونيز مع ملعقتين سكّر.. ولو الكمية عندك اكتّر، دبّليهم.. انا هنا عملته بديل صحّي، المايونيز قللته كميته وعملته معاه زبادي ومسطرد.. وطلعته لزيزه جدا ..

نقلِّب الصوص تمام ونضيف ليها الملفوف والجزر المقطّعين صغار.. السلطة دي كل ما قعدت في التلاجة بتطلع الذ.. بس عشان المايونيز حساس ما كويس تقعد اكتر من تلاته ايام

الوصفة التانية… ما عندي ليها اسم.. هي وصفة آسيوية.. الناس بعرفوها ومشهورة.. انا بتذكر زمان احنا صغار معانا فليبينية اسمها لوليتا يا حليلها.. كانت بتعملها لينا لما يكون جايينا أصحابنا او في العيدميلادات.. الطريقة اول شي نقلِّب شوية بصلة في حلة فيها زيت سمسم ملخبط مع زيت عادي.. زيت السمسم بالجد بعمل فرق لزيز جدا في الطعم

بعد البصلة تتبل، نقطع صدور دجاج صغار، ونكبهم في البصلة ونقلّبهم شويه بس لحدي ما يبقى لونهم ابيض

بعداك نضيف ليهم صويا صوص.. دي الصوص بتاعت النكهة الآسيوية في كل الأكلات.. الصوص دي مالحة، وممكن عادي ما تعملي للاكلة ملح.. ضيفي تقريبا ملعقتين كبار.. وممكن لقدام تزيدي..

في المسافة دي حضّري النودلز بتاعتك. انا استخدمت النودلز بتاعت الرز.. لكن عادي ممكن تستخدمي إندومي.. ترمي البهارات البتجي معاها وتعملي النودلز براها.. في الحالتين بنغلي موية ونخت النودلز فيها بس عشرة دقايق.. ونصفّيها.. ولو عملتي الحركة دي قبل تولعي النار حتكسبي الزمن وتنتهي سريع..

ده شكل النودلز في كيسها.. لونها ابيض وعيدان رفيعة جدا..

بتنجض سريع جدا ما عايزه غير الموية المغلية.. ولا تختيها في النار.. بس تتنقع

نرجع للحلة.. كبي الملفوف والجزر والفلفل الاخضر كلهم في الحلة… ما تقلقي من الكمية.. الملفوف بطلّع مويته وبختفي بعد شوية تقليب..

لما تحسي بالملفوف بقى لين.. كبي النودلز.. وحرّكيها.. لو عندك اللسان البقلّبوا بيها الاكل، اسهل ليك كتير من ملعقة الخشب.. ما تخلي موية الملفوف تنشف نهائي.. عايزين شوية منها عشان تتبل ليك النودلز..