مديدة الحلبة

مديدة الحلبة، للبرد الجاي على المنطقة الايام الجاية دي..
دي ما الطريقة الوحيدة ولا بقول انها احسن طريقة في الدنيا، لكن دي الطريقة البعمل بيها، كالعادة الهدف انه يكون في مقادير وطريقة واضحة للمابعرفوا يعملوها…

7ilba_final

طيب كل انواع المديدة بتعتمد على حاجتين… عنصر مُنكّه (يعني بدّي النكهة).. ده ممكن يكون حلبة او تمر، وعنصر يدي القوام وده عادة بكون دقيق او كورنفلور (نشا) او ود عمّه الكسترد او مزيج منّهم.. اهم شي في المديدة اننا نتأكد انه الحلبة استوت كويس جدا عشان ما تكون حبوبها قوية لما ناكلها.. بعد نتم الخطوة دي خلاص كده موضوع المديدة انتهى

 

بالنسبة لي عشان اختصر الوقت بستخدم الحلبة المسحونة… نبدأ بي ملعقتين كبار سمنة في الحلة ومعاهم تلاته ملاعق كبيرة حلبة مسحونة.. نقلبها تمام في السمنة ونخلي النار مرخية عشان الحلبة ما تتحرق ونقلّب تمام اصلنا ما نقيف.. لاحظوا الحلبة مسحونة يعني بتستوي أسرع كتير من لو كانت حب
7ilba_1
نستمر في التقليب كويس لحدي ما نشعر انه لون الحلبة بقى أغمق شوية.. على بُنّي كده.. ده لون التحميص.. كده معناها الحلبة ماشه كويس ونكهة الحلبة بدأت طلع في السمنة.. كل الفكرة من التحميص انه نطلّع نكهة الحلبة عشان واحنا بناكل بعدين ما نكون زي البناكل في عجين ما عنده نكهة
7ilba_2
بعداك نكب فيها كبايتين موية… الهدف من الموية بعد ده انه ندي فرصة للحلبة تستوي.. الخطوة الاولى كان الهدف نطلع النكهة.. الخطوة التانية الموية لانها بارده حتبرّد ليك الحلبة وتديها فرصة تتسلق وتطرى وتستوي.. عشان نساعدها تستوي نكب ليها ملعقة صغيرة باكينج باودر.. ده بساعد على انها تطرى وتستوي.. طبعا الناس عادة بعملوا كربونات.. لكن دي حلبة مسحونه، ما عايزه حاجه قوية زي الكربونات او العطرون عشان تخليها تطرى.. باكينج باودر كافي جدا..
7ilba_3
بعداك كبي ليها ملعقة صغيرة ونص ملح… معروف الملح بخلي النكهات تبرز في الاكل.. وبرضه بساهم في موضوع السوى بتاع الحلبة.. اصلهم الكربونات والعطرون شنو! ما كلها أملاح..
7ilba_4
بعد ده ارخي نارك اكتر وغطيها شوية وادي فرصة الحاجات دي تتفاعل مع بعضها.. الخطوة دي اخر خطوة عشان نضمن موضوع النكهة القلناه قبيل.. لأننا بعد شوية حنبدا في خطوات القوام.. ما بتاخد زمن كتير في الحتة دي.. يا دوب مسافة ما تغلي الحاجات سوا
كبي فيها لتر كامل حليب.. يعني علبة كبيرة بتاعت حليب السعودية.. شيلي منه شويه ذوّبي فيها تلاته ملاعق كبيره حليب بودره.. وكبيهم كلهم في حلّتك .. دي طبعا الكمية المناسبة للتلاته ملاعق القبيل ديلاك.. وما تقلقي لو شفتي الحلبة شكلها بقى كيف كيف .. الوضع بستعدل بعد شوية
7ilba_5
حسي احنا عايزين طعم الحلبة يجي في الحليب.. ودي ما عملية صعبة لانه الحلبة مستوية ونكهتها كلها موجوده في المويه الكبيناها قبيل ديك.. ادي الحليب فرصة يغلي ويندمج مع المكونات.. وحياخد شوية من اللون بتاع الحلبة
7ilba_6
لاحظوا انه لون الحلبة بُني بعد تتحمّص.. ما اصفر.. اللون ده بجي من الكسترد… في ناس يستخدموا الحلبة الحب وببلوها في موية وبعملوها.. موية الحلبة بتكون مايله للصفار.. لكن بعد تجيها المويه والحليب لونها بخف شديد.. يعني ما بجيك اللون الاصففففر ده الا بالكسترد
بعد ده نظبّط الطعم… كبي كباية كاملة سكر… ومعاها ملعقة كبيرة قرفة مسحونة… وسوووطي عشان السكر يذوب..
كده بقى طعمها لزيز وما عندها اي مشاكل.. نجي للقوام… في كوره كبي تلاته ملاعق كبيرة كسترد وتلاته ملاعق نشا (كورنفلور).. وكبي معاهم موية بارده.. وسوطيهم بالملعقة لحدي ما يتجانسوا تمام.. لو ما عايزه اللون ممكن تعملي الملاعق كلها نشا.. أصلا الفرق بين الكسترد والنشا هو في اللون (جاي من صفار البيض).. لو عملتي الملاعق كلها كسترد بطلع ليك لونها اصفر شديد..
لو ما عندك نشا او كسترد.. ممكن تستخدمي الدقيق… بس الدقيق عيبه انه براه في النار ممكن يديك طعم ني كده.. في ناس، زي بت خالتي جولي، بعملوا الدقيق زي البشميل.. يعني ياخد فرصة يتقلب في زبده او سمنه او زيت عشان الطعم الني بتاعه يروح
مهما كان الشي الاخترتيه للقوام.. كبّيه في حلّتك ديك… وحرّكي بي مضرب الشبك.. نارك مرخية وحرّكي بسرعة.. عشان ما تعمل ليك كلاكيع… ولو لا قدر الله عملت.. أبدا ما نهاية الدنيا.. تجيبي خلاطك اليدوي وتديها “ورّه” ترجع ناعمة حرير… كبيها في صحانتك ومن فوق ليها سمنة وزّينيها بي رشّة قرفة مسحونة..
7ilba_7
كل ما تبرد كل ما قوامها بقى اظرف.. لكن تتاكل دافيه.. ما تخلوها تبرد شديد
دي لناس التجهيز المسبق… عملته كتيره ومركّزه امس بالليل.. الليلة الصباح فطّرته بيها نادر قبل يمرق.. طلعت حلوه شديد… الخطوات لحدي ما نكب الموية زي الوصف الفوق هنا.. بعداك في حلّة تانية او طوّة، نكب حوالي اربعة ملاعق زيت ومعاها ستة ملاعق دقيق.. ونخليهم على نار هادية عشان الدقيق يحمّص
7ilba_8
بعداك ذوّبي تلاته ملاعق كسترد في مويه بارده.. وكبيه مع الدقيق وأطفئ النار وحرّكي سريع.. حيبقى ليك عجينة كده
ضيفي العجينة دي للحلبة والموية، وقلّبي سريع… حتطلع ليك زي الصورة الفوق دي… كده انت جاهزه… خليها تبرد ودخليها التلاجة… متى ما تحبي تعملي مديدة في ثواني تجهز… وبالكمية العايزاها
الليلة الصباح شلته ٣ ملعقة كبيرة من الحلبة وختيت معاها خمسة ملاعق سكر وقرفة مسحونه وكباية حليب.. وحركتهم سوا لحدي ما اندمجوا.. لو حسيتي انها تقيلة كبي حليب لو حسيتيها خفيفة كبي زيادة حلبة
7ilba_9
ده شكلها النهائي
7ilba_10

One response to “مديدة الحلبة

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s